Read Hmong Njua Yaxayas 39 Bible Online

Yaxayas 39 - Hmong Njua bible

Yaxayas 39

¹Lub sijhawm ntawd Npaladaas tug tub Melaudas Npaladaas kws ua vaajntxwv kaav tebchaws Npanpiloos nov has tas Vaajntxwv Hexekiyas mob, nwg txhaj sau ib tsaab ntawv hab xaa ib co khoom tuaj pub rua Hexekiyas.

²Hexekiyas tog txais puab hab coj puab moog saib nwg tej txhaab nyaj txhaab kub, tej txumlom, tej roj tsw qaab, hab tej cuabyeej ua rog. Tsi muaj ib yaam dlaabtsi huv nwg tej txhaab lossis huv nwg lub tebchaws kws nwg tsi tau coj puab moog saib le.

³Ces Yaxayas kws yog tug cev Vaajtswv lug txawm tuaj cuag Vaajntxwv Hexekiyas hab nug nwg has tas, “Cov tuabneeg ntawd tuaj qhov twg tuaj hab puab has le caag rua koj?” Hexekiyas teb has tas, “Puab tuaj tim tebchaws Npanpiloos kws dleb heev tuaj.”

⁴Yaxayas nug has tas, “Puab pum dlaabtsi huv koj lub loog?” Hexekiyas teb has tas, “Puab pum txhua yaam huv tuabsi; tsi tshuav ib yaam nyob huv tej txhaab kws kuv tsi tau qha rua puab le.”

⁵Ces Yaxayas txawm has rua Vaajntxwv Hexekiyas has tas, “Tug TSWV kws muaj Fwjchim Luj kawg nkaus has le nuav:

⁶Saib lauj, lub sijhawm tub lug ze zuj zug rua txhua yaam kws nyob rua huv koj lub loog nuav lawm, hab txhua yaam kws koj cov yawmkoob khaws ca thaus u lug txug naj nub nua, yuav raug luas coj moog kuas taag rua tim tebchaws Npanpiloos, tsi seem ib yaam dlaabtsi hlo le, tug TSWV has le ntawd.

⁷Koj cov tub kws koj yug hab koj tej xeebntxwv puavleej yuav raug puab nteg coj moog hab muab saam ca ua num nyob huv tug vaajntxwv kws kaav lub nroog Npanpiloos lub loog.”

⁸Vaajntxwv Hexekiyas teb Yaxayas has tas, “Tug TSWV tej lug kws koj has nuav zoo kawg le. Vim kuv xaav has tas, yuav muaj kev thaajyeeb hab kev kaaj sab rua tam kws kuv tseem ua neej nyob nuav.”