Read Hmong Njua Yaxayas 40 Bible Online

Yaxayas 40 - Hmong Njua bible

Yaxayas 40

¹Vaajtswv has tas, “Nplig kuv tsaav tuabneeg lub sab, nplig puab sab los mas!

²Txhawb cov tuabneeg kws nyob huv lub nroog Yeluxalees zug. Qha rua puab has tas, puab tub raug kev txomnyem txaus lawm hab nwgnuav kuv tub zaam puab tej kev txhum taag lawm. Kuv rau txim ob npaug rua puab tej kev txhum.”

³Muaj ib lub suab qw has tas, “Khu kev tom roob mojsaab qhua tog tug TSWV! Khu kev tom taj suabpuam kuas ncaaj tog peb tug Vaajtswv.

⁴Txhub txhua lub kwj haa kuas puv, khawb txhua lub roob hab txhua lub pov roob kuas taj; tej qhov zawj muab txhub kuas sis txig, muab qhov sab hab qhov qeg pheej kuas taj xwmyeem.

⁵Thaus ntawd tug TSWV yuav muab nwg tug tshwjchim kws ci ntsaa ab nthuav qha rua tuabneeg txhua tug pum. Tug TSWV yog tug has tej lug nuav ntaag.”

⁶Muaj ib lub suab qw has tas, “Ca le qha rua suavdlawg!” Kuv nug has tas, “Kuv yuav qha dlaabtsi? Qha has tas, txhua tug tuabneeg zoo ib yaam le tej nroj ntsuag; hab puab zoo ib yaam le tej paaj ntoos.

⁷Thaus tug TSWV tshuab paa tuaj ntsawj, tej nroj tsuag qhuav, tej paaj los yuav zeeg taag; tuabneeg zoo ib yaam le tej nroj tsuag ntawd.

⁸Tej nroj yeej txawj qhuav hab tej paaj yeej txawj zeeg; tabsis peb tug Vaajtswv txujlug nyob moog ibtxhis le.”

⁹Yeluxalees, ca le nce moog sau roob sab, hab qha txujmoo zoo! Xi-oos, ca le hu nrov nrov tshaajtawm txujmoo zoo!

¹⁰Tug TSWV kws yog Vaajtswv nrug nwg lub fwjchim lug, hab nwg txhais npaab yuav tswjfwm. Nwg coj nqe zug lug rua cov tuabneeg kws nwg cawm dlim lawm.

¹¹Nwg yuav tu nwg paab yaaj ib yaam le tug tswv yug yaaj, nwg yuav sau zog tej mivnyuas yaaj lug puag rua ntawm nwg ob txhais npaab, nwg yuav muab puab puag hlo rua huv nwg lub xubndlag, hab ua sab ntev coj tej yaaj kws muaj mivnyuas mog.

¹²Leejtwg muaj peevxwm muab phoov teg yeem dlej havtxwv saib nyaav npaum le caag, lossis muab nwg txhais teg ntsuag tau lub ntuj? Leejtwg muaj peevxwm muab lub nplajteb nuav sau lug ntim rua huv khob, lossis muab tej hauv roob hab tej ncov roob lug tso rua sau teev luj?

¹³Leejtwg txhaj muaj peevxwm qha tau tug TSWV tug ntsujplig, lossis ua tau nwg tug tuavxaam kws qha nwg?

¹⁴Vaajtswv nrug leejtwg tuavxaam kuas nwg thoob tsib to nrog, hab leejtwg qha kev ncaaj nceeg, kev txawj ntse, kev totaub, hab kev paub rua nwg?

¹⁵Txhua tsaav tuabneeg tub tsi muaj nqes dlaabtsi rua tug TSWV le, tub tsi npaum le teev dlej nrug ntawm lub tshuajtaub lug; nwg suav puab zoo le tej moov aav kws lu ntawm raab teev xwb; hab nwg nqaa tej koog povtxwv sib ib yaam le tej moov aav.

¹⁶Txawm yog tej tsaj peg Lenpanoos los tub tsi txaus tua hlawv fij rua Vaajtswv, hab tej ntoo los yeej tsi txaus ua tawg hlawv.

¹⁷Tug TSWV suav has tas txhua tsaav tuabneeg yeej tsi tseemceeb dlaabtsi hab tsi muaj nqes dlaabtsi rua tug TSWV hlo le.

¹⁸Mej yuav muab Vaajtswv pev rua leejtwg? Mej yuav ua le caag pav tau has tas nwg tug yaam ntxwv zoo le caag?

¹⁹Nwg tsi zoo le tug mlom kws tuabneeg puab kws muab kub lug vuam rua hab muab saw nyaj lug dlai rua.

²⁰Tug tuabneeg pluag kws tsi muaj nyaj tsi muaj kub coj moog fij, nwg moog xaiv tej ntoo kws tsi txawj lwj coj lug fij. Nwg coj moog rua tug kws txua ntoo txua ib tug mlom kws tsi txawj txaav taw le rua nwg.

²¹Tsi muaj tuabneeg qha rua mej paub le los? Mej tsi tau nov dlua le los? Mej tsi paub has tas lub nplajteb nuav pib le caag lug le los?

²²Tug tsim lub nplajteb nuav yog tug kws nyob sau lub zwmtxwv kws sab kawg nkaus. Nwg tuaj sau saib tuabneeg nplajteb luaj le tug kooj xwb; nwg muab lub ntuj nthuav ib yaam le dlaim ntaub qhovrais, hab nthuav lub ntuj ib yaam le lub tsevntaub rua tuabneeg nyob.

²³Nwg muab cov numtswv txu kuas poob fwjchim, hab ua rua puab tsi muaj nqes dlaabtsi hlo le.

²⁴Puab zoo ib yaam le tej yub zaub kws muab cog kag ces txawm nrhau caag, thaus Vaajtswv ua paa, tej yub zaub ca le ntsws hab tuag taag, hab yaa ri nab ib yaam le tej quavnyaab npleg.

²⁵Vaajtswv tug kws dlawbhuv nug has tas, mej muab kuv pev rua leejtwg, hab kuv zoo le leejtwg?

²⁶Tsaa koj ob lub qhovmuag saib sau nruab ntug saib! Leejtwg yog tug tsim tej nubqub kws koj pum ntawd? Nwg coj tej nubqub ntawd tawm tuaj ua tsheej paab ib yaam le paab tubrog, nwg paub muaj pistsawg lub hab nwg tis npe rua txhua lub nyag muaj nyag npe. Nwg lub fwjchim hab tug zug kaav tej ntawd txhaj tsi muaj ib lub pluj le.

²⁷Cov Yixalayees, vim le caag mej txhaj ywg has tas, tug TSWV tsi pum txug mej tej kev txomnyem lossis tsi paab thaus mej raug luas ua tsi ncaaj rua mej?

²⁸Mej tsi tau paub dlua le los? Mej tsi tau nov dlua le los? Tug TSWV yog Vaajtswv tug kws muaj sa nyob moog ibtxhis; nwg tsim taagnrho lub nplajteb nuav. Nwg ibtxwm tsi tsaug leeg lossis qaug zug ib zag le. Tsi muaj leejtwg paub txug nwg lub sab xaav hlo le.

²⁹Nwg ntxiv zug rua tug kws qaug zug hab tsaug leeg kuas nwg rov muaj zug tuaj.

³⁰Txawm yog tej hluas los puab yeej txawj qaug zug, hab cov tub hluas los qaug puj poog;

³¹tabsis cov tuabneeg kws ca sab ntsoov rua tug TSWV puab yuav muaj zug, puab yuav nthuav tis yaa ib yaam le tug dlaav. Thaus puab dlha, puab yuav tsi qaug zug? Thaus puab moog kev, puab yuav tsi tsaug leeg?