Read Hmong Njua Yaxayas 41 Bible Online

Yaxayas 41 - Hmong Njua bible

Yaxayas 41

¹Vaajtswv has tas, “Tej tebchaws kws nyob dleb, mej ca le noog kuv has hab nyob tuabywv! Mej ca le npaaj moog has plaub huv tsev tu plaub; mej yuav muaj sijhawm has mej zaaj. Ca peb ua ke moog txav txim saib leejtwg yog tug muaj cai.

²“Leejtwg moog zig tug kws muaj yeej tim saab nubtuaj tuaj? hab ca nwg kovyeej txhua qhov txhua chaw kws nwg moog lawm? Leejtwg ca nwg tua yeej txhua tug vaajntxwv hab txhua tsaav tuabneeg? Nwg raab ntaaj tua puab qaug pawg lug ib yaam le puab yog tej moov aav xwb. Nwg raab neevnti tua puab tawg tsiv ri sua ib yaam le cua ntsawj tej quavnyaab npleg yaa.

³Nwg caum puab qaab hab dlha dlhau puab moog tsi raug xwmtxheej dlaabtsi, nwg dlha ceev heev kutaw yuav laug tsi chwv aav.

⁴Leejtwg yog tug ua kuas muaj tej xwm nuav tshwmsim tuaj? Leejtwg yog tug kws teev caij nyoog keebkwm thaus u lug? Kuv yog tug TSWV kws nyob thaus chivkeeb, hab yog tug kws yuav nyob thaus kawg.

⁵“Cov tuabneeg kws nyob tej tebchaws dleb, pum tej num kws kuv ua taag lug lawm; puab ntshai tshee nyo. Yog le ntawd puab txhaj sis sau tuaj ua ke.

⁶Txhua tug nyag paab nyag tej kwvtij zej zog hab has rua puab tej kwvtij tas, ‘Ua sab luj tsi xob ntshai.’

⁷Tug kws txua ntoo txhawb tug kws nchuav kub zug has tas, ‘Zoo kawg le!’ Tug kws muab rauj ntaus tej mlom kuas dlu ndlaug quas leeg, txhawb tug kws muab ntsa lug ntsa zug. Puab has tas, ‘Haam zoo kawg le,’ hab puab muab ntsa hlau ntsa tug mlom ntawd rua ntawm nwg qhov chaw.

⁸“Tabsis mej cov Yixalayees kws yog kuv cov tubkhai, Yakhauj tug kws kuv tau xaiv tseg, hab yog kuv tug phoojywg Anplahaas cov xeebntxwv;

⁹mej yog cov kws kuv tau coj tim qaab ntuj kawg rov lug, hab hu mej tim plaub ceg kaum ntuj kws dleb kawg nkaus lug, kuv has rua mej tas, ‘Mej yog kuv cov tubkhai, kuv tub xaiv mej ca lawm, hab kuv tsi tso mej tseg ib zag le’;

¹⁰Mej tsi xob ntshai, rua qhov kuv nrug nraim mej, kuv yog mej tug Vaajtswv, mej tsi xob poob sab; kuv yuav paab mej hab txhawb kuas mej muaj zug, kuv saab teg xis yuav puag rawv mej.

¹¹“Cov tuabneeg kws chim rua mej, puab yuav swb hab raug txaajmuag; cov tuabneeg kws ua rog tawmtsaam mej, puab yuav puamtsuaj hab tuag taag.

¹²Mej moog nrhav cov yeebncuab kws tawmtsaam mej, tabsis mej tsi ntsib puab, cov tuabneeg kws ua rog rua mej puab tub puamtsuaj hab tuag taag lawm.

¹³Kuv yog tug TSWV, mej tug Vaajtswv; kuv yeej tuav rawv mej saab teg xis, hab kuv has rua mej tas, ‘Tsi xob ntshai kuv yuav paab mej!’ ”

¹⁴Tug TSWV has tas, “Cov Yixalayees kws yog Yakhauj cov xeebntxwv! Kuv yog cov Yixalayees tug Vaajtswv kws dlawbhuv. Kuv yuav paab mej, hab txhwv kuas mej dlim.

¹⁵Kuv yuav ua kuas mej zoo ib yaam le lub tshuab zum nplej kws nav tshab hab ntse zuag plag. Mej yuav ntaus tej hauv roob hab muab tsoo kuas tawg ntsoog ntxawg, hab mej yuav muab tej ncov roob tsoo kuas ua moov taag.

¹⁶Mej yuav tsuab puab w rua sau nruab ntug, cua yuav muab puab ntsawj yaa moog povtseg, hab cua dlaaj cua dlub yuav muab puab ntsawj yaa ri nab. Hab mej yuav zoo sab heev, rua qhov kuv yog mej tug Vaajtswv; mej yuav qhuas kuv kws yog cov Yixalayees tug Vaajtswv kws dlawbhuv.

¹⁷“Thaus kuv tsaav tuabneeg kws pluag hab txomnyem tuaj nrhav dlej haus, thaus puab nqhes dlej qaa qhuav qhawv lawm, kuv kws yog tug TSWV maam le teb puab tej lug thov, kuv kws yog cov Yixalayees tug Vaajtswv tsi tso puab tseg le.

¹⁸Kuv yuav ua kuas muaj dlej txhawv sau tej roob qhua, hab ua kuas dlej txhawv huv tej haav. Kuv yuav ua rua tej taj suabpuam kuas muaj paag dlej txhua qhov.

¹⁹Kuv yuav ua kuas ntoo thuv, ntoo akaxias, ntoo lwgzaaj, hab ntoo ntseej, tuaj taug sau tej roob mojsaab qhua kws qhuav nkig nkuav. Kuv yuav ua kuas taj suabpuam caj zoov nujtxeeg, ntoo thuv, ntoo cab hab ntoo thwjsuab yuav tuaj ua ke.

²⁰Ca tuabneeg nplajteb pum hab paub has tas, kuv yog tug TSWV kws ua tej nuav. Puab txhaj yuav paub has tas, tsaav tuabneeg Yixalayees tug Vaajtswv dlawbhuv yog tug kws tsim tej nuav.”

²¹Tug TSWV has tas, “Ca le tuaj has mej rooj plaub,” Yakhauj tug Vaajntxwv has tas, “Coj mej lub tswvyim sis caav kws zoo tshaaj plawg nrug mej tuaj ntawm nuav!”

²²Ca puab coj tej mlom tuaj, hab kuas tej mlom ntawd qha rua peb saib yuav muaj dlaabtsi tshwmsim tuaj. Qha tej xwmtxheej thaus u rua peb saib yog dlaabtsi, peb txhaj paub tej ntawd, hab peb txhaj paub has tas puab tawm qhov twg lug; lossis qha tej yaam kws yuav tshwmsim lug yaav tom ntej nuav rua peb.

²³Qha rua peb saib yuav muaj dlaabtsi tshwmsim lug yaav tom ntej nuav, kuas peb txhaj paub has tas, mej yog vaajtswv tag! Ua tej yaam zoo lossis tej yaam phem kuas peb ntshai hab yoob taag le saib.

²⁴Mej tsi tseemceeb dlaabtsi, hab tej kws mej ua los tsi muaj qaabhau; cov tuabneeg kws xaiv mej ua puab tej vaajtswv, mas vuabtsuab kawg le.

²⁵“Kuv tub xaiv ib tug tuabneeg kws nyob saab nubtuaj tseg lawm, kuv yuav coj nwg peg saab qaumteb tuaj tua mej. Nwg yuav tsuj cov numtswv ib yaam le tsuj tej moov aav, hab zoo le tug puab laujkaub tsuj tej aav nplaum.

²⁶Leejtwg qha zaaj nuav thaus u lawm peb txhaj paub, lossis qha ua ntej, peb txhaj has tau tas ‘Nwg has yog lawm’? Mej tsi muaj ib tug twg has txug zaaj nuav, tsi muaj leejtwg nov mej pav ib lus hlo le.

²⁷Kuv yog tug TSWV, tug kws xub qha xuv zoo rua lub nroog Xi-oos; kuv khaiv ib tug xaa xuv moog qha lub nroog Yeluxalees has tas, ‘Koj cov pejxeem taabtom lug lawm! Puab taabtom lug tsev!’

²⁸Thaus kuv saib cov mlom ntawd, puab has tsi tau lug, tsi muaj ib tug twg teb tau tej lug kws kuv nug hlo le.

²⁹Taagnrho cov mlom nuav tsi muaj qaabhau kag le; puab ua tsi tau ib yaam dlaabtsi, cov mlom ntawd tsi muaj zug hab tsi muaj fwjchim.”