Read Hmong Njua Yaxayas 42 Bible Online

Yaxayas 42 - Hmong Njua bible

Yaxayas 42

¹Tug TSWV has tas, “Tug nuav yog kuv tug tubkhai kws kuv txhawb nwg tug zug, nwg yog tug kws kuv xaiv tseg, kuv txaus sab heev rua nwg. Kuv muab kuv tug ntsujplig rua nwg, hab nwg yuav coj kev ncaaj nceeg lug rua txhua tsaav tuabneeg.

²Nwg yuav tsi qw lossis tsaa suab quaj lossis has lug nrov huv tej plawv kev.

³Tug lojkov kws tub po lawm, nwg yuav tsi muab luv, lossis lub teeb kws tub yuav tuag nwg tsi muab tshuab kuas tuag. Nwg yuav coj txujkev ncaaj nceeg moog ibtxhis lug rua suavdlawg.

⁴Nwg yuav tsi taag kev ca sab lossis qaug zug hlo le, nwg yuav rhawv kuas muaj kev ncaaj nceeg nyob huv lub nplajteb nuav; hab tej tebchaws kws nyob dleb tog ntsoov nwg txuj kevcai.”

⁵Vaajtswv tsim lub ntuj hab muab lub ntuj nthuav khwb rua sau; nwg tsim lub nplajteb hab txhua yaam kws nyob huv; nwg rau sav hab rau paa rua txhua tug tuabneeg kws nyob huv lub nplajteb. Hab nwgnuav tug TSWV kws yog Vaajtswv has rua nwg tug tubkhai has tas,

⁶“Kuv yog tug TSWV kws tau hu koj lug hab muab lub fwjchim rua koj kuas pum txujkev ncaaj nceeg kws nyob huv lub nplajteb nuav. Kuv yuav muab koj ua lu lug coglug tseg rua txhua tug tuabneeg; kuv yuav muab koj ua lub teeb ci moog rua txhua tsaav tuabneeg.

⁷Koj yuav ua rua tej tuabneeg dligmuag pum kev, hab yuav tso cov tuabneeg kws raug kaw huv tsev lojcuj kws tsaus ntuj nti tawm lug.

⁸“Kuv tuab leeg xwb txhaj yog tug TSWV kws yog koj tug Vaajtswv. Tsi pub ib tug vaajtswv twg muaj feem koom kuv lub fwjchim; kuv tsi pub tej mlom muaj feem koom kuv lub koob meej.

⁹Tej kws kuv has tseg tub muaj lawm, nwgnuav kuv yuav qha tej yaam tshab rua mej ua ntej thaus kws tej ntawd tsi tau tshwm lug.”

¹⁰Ca le hu ib zaaj nkauj tshab qhuas tug TSWV, tuabneeg nplajteb ca le hu nkauj qhuas nwg! Mej cov kws tsaav nkoj huv huv havtxwv, ca le qhuas nwg, txhua tsaav yaam tsaj kws nyob huv havtxwv, ca le qhuas nwg. Cov tebchaws kws nyob dleb hab txhua tug tuabneeg kws nyob huv ca le hu nkauj qhuas nwg!

¹¹Ca taj suabpuam hab tej nroog kws nyob huv qhuas Vaajtswv; ca cov tuabneeg kws nyob huv lub nroog Kedas qhuas nwg! ca cov tuabneeg kws nyob huv lub nroog Xelas qw sau tej ncov roob tuaj.

¹²Ca puab txhawb nqaa tug Tswv lub koob meej, hab ca cov tuabneeg kws nyob tej tebchaws dleb qhuas nwg.

¹³Tug TSWV tawm moog ntaus rog ib yaam le tug tubrog kws muaj zug heev, nwg npaaj txhij hab kub sab lug moog sis tua huv tshaav rog, nwg nthe nqho ntaus rog hab nwg qw nrov heev; nwg qha nwg lub fwjchim rua nwg cov yeebncuab pum.

¹⁴Vaajtswv has tas, “Kuv ua tuabywv tau ntev lug lawm, kuv tsi teb kuv tsaav tuabneeg. Tabsis nwgnuav tub txug lub sijhawm kws kuv pib ua num lawm; kuv qw ib yaam le tug quaspuj kws taabtom yug mivnyuas.

¹⁵Kuv yuav rhuav tej hauv roob hab ncov roob kuas puamtsuaj, hab muab tej xyoob ntoo hab tej nroj tsuag ua kuas qhuav taag. Kuv yuav ua kuas tej dlej nqhuab ua suabpuam hab muab tej paag dlej ua kuas nqhuab huv tuabsi.

¹⁶“Kuv yuav coj kuv tsaav tuabneeg kws dligmuag taug txujkev kws puab ibtxwm tsi tau taug dlua. Kuv yuav muab puab txujkev tsaus ntuj hloov ua kev kaaj, hab muab tej kev kws tsi xwmyeem ncaws kuas taj rua puab taug. Tej nuav yog tej kws kuv yuav ua, hab kuv yuav tsi muab tej nuav tso tseg ib zag le.

¹⁷Cov tuabneeg kws ca sab rua tej mlom, puab hu tej mlom ntawd has tas, ‘Mej yog peb cov vaajtswv,’ puab yuav raug txaajmuag hab poob ntsejmuag.”

¹⁸Tug TSWV has tas, “Mej cov tuabneeg laag ntseg, ua tuab zoo noog! Mej cov tuabneeg dligmuag, ua tuab zoo saib kuas tseeb tseeb!

¹⁹Puas muaj leejtwg dligmuag tshaaj kuv tug tubkhai, lossis laag ntseg tshaaj tug xaa xuv kws kuv khaiv lug?

²⁰Cov Yixalayees, mej tub pum ntau yaam lug lawm, tabsis zoo le mej tsi pum le. Mej muaj qhovntsej, tabsis zoo le mej tsi nov le.”

²¹Tug TSWV yog tug Vaajtswv kws muaj lub sab kub lug cawm kuas tuabneeg dlim, nwg txhaj muab nwg tej kevcai hab tej lug qhuab qha saib rua qhov sab; hab nwg xaav kuas nwg tsaav tuabneeg fwm tej kevcai ntawd.

²²Tabsis nwg tsaav tuabneeg tub raug luas fuab hab luas nyag; puab raug nteg kaw rua huv tej qhov kws tsaus ntuj nti, hab muab zais rua huv tej tsev lojcuj; puab puavleej raug luas fuab hab raug luas nyag, tsi muaj leejtwg yuav cawm tau puab, puab tub raug luas nyag, tabsis tsi muaj leejtwg tuaj has has, “Ca le tso puab rov qaab.”

²³Mej cov leejtwg yuav tig qhovntsej noog zaaj nuav? Txij nuav moog mej puas yuav ua tuab zoo noog?

²⁴Leejtwg muab cov Yixalayees cob rua cov tuabneeg kws tuaj fuab puab? Tub yog tug TSWV kws peb tau ua txhum rua nwg lawm! Peb tsi ua peb lub neej lawv le nwg lub sab nyam, lossis tsi noog tej lug qhuab qha kws nwg tau qha rua peb.

²⁵Yog le ntawd, nwg txhaj tso nwg txujkev chim lug raug peb, hab ua kuas peb ntsib kev tsuv kev rog kws txomnyem ntsuav. Nwg txujkev chim kub cov Yixalayees ib yaam le suavtawg, tabsis peb tsi paub has tas muaj xwm dlaabtsi hab peb yeej tsi xeevxwm hlo le.