Read Hmong Njua Yaxayas 43 Bible Online

Yaxayas 43 - Hmong Njua bible

Yaxayas 43

¹Cov Yixalayees, tug TSWV kws tsim mej has tas, “Mej tsi xob ntshai, kuv yuav cawm kuas mej dlim. Kuv tub tuav mej npe hu mej lawm, vim mej yog kuv tsaav tuabneeg.

²Thaus mej hlaa tej dlej tub, kuv yuav nrug nraim mej, lossis mej moog huv dlej, dlej yuav tsi tshoob mej. Thaus mej moog huv cov nplaim tawg, suavtawg yuav tsi kub mej, txujkev sim sab nuav yuav txuv tsi tau mej.

³Rua qhov kuv yog tug TSWV, mej tug Vaajtswv, Kuv yog cov Yixalayees tug Vaajtswv kws dlawbhuv, kuv yog tug cawm kuas mej dlim. Kuv muab cov Iziv lug ua nqe txhwv mej, muab cov Sudaas hab cov Xenpas lug pauv mej.

⁴Kuv muab taagnrho txhua tsaav tuabneeg lug txhwv kuas tau mej txujsa, rua qhov mej muaj nqes rua kuv heev, kuv ua kuas mej tau ntsejmuag, hab kuv hlub mej kawg nkaus le.

⁵Tsi xob ntshai, kuv nrug nraim mej! “Kuv yuav coj mej tim nubtuaj hab sau mej tim nubpoob rov qaab lug.

⁶Kuv yuav has rua cov nyob saab qaumteb kuas tso puab lug, hab cov nyob saab qaabteb kuas tsi xob cheem puab nyob. Ca le tso kuv cov tub kws nyob dleb heev rov lug, hab cov kws nyob tim qaab ntuj kawg rov lug.

⁷Puab yog kuv tsaav tuabneeg, kuv tsim puab lug ua kuas kuv tau koob meej, kuv yog tug puab puab hab tsim puab ntaag.”

⁸Vaajtswv has tas, “Coj tsaav tuabneeg kws muaj qhovmuag, tabsis tsi pum kev, muaj qhovntsej, tabsis tsi nov lug tuaj!

⁹Ca txhua tsaav tuabneeg tuaj sis sau ua ke. Leejtwg muaj cuabkaav has tau nwg zaaj, hab qha rua peb saib yuav muaj yaam dlaabtsi tshwmsim yaav tom ntej? Ca puab coj puab tej vaajtswv tuaj ua timkhawv rua puab, ca puab nov hab tau has tej lug tseeb.”

¹⁰Tug TSWV has tas, “Cov Yixalayees, mej yog kuv cov timkhawv, kuv xaiv mej lug ua kuv cov tubkhai, kuas mej txhaj paub kuv hab ntseeg kuv, hab paub has tas kuv tuab leeg xwb txhaj yog Vaajtswv. Yeej ibtxwm tsi muaj lwm tug vaajtswv kws nyob ua ntej kuv, hab yaav tom ntej los yuav tsi muaj le.

¹¹“Kuv tuab leeg xwb txhaj yog tug TSWV, tsuas yog kuv tuab leeg xwb txhaj cawm tau mej dlim.

¹²Kuv tub xub qha tej xwm nuav rua mej paub ua ntej, ces kuv maam lug paab kuas mej dlim, cov tuabneeg txawv tebchaws tsi muaj ib tug vaajtswv ua tau tej kws kuv ua nuav; mej puavleej yog kuv cov timkhawv.

¹³Kuv yog Vaajtswv hab kuv yeej yuav zoo le nuav moog ibtxhis le. Tsi muaj ib tug twg yuav tsiv dlhau kuv lub fwjchim, tej kws kuv ua yeej tsi muaj leejtwg hloov tau ib zag le.”

¹⁴Cov Yixalayees tug Vaajtswv kws dlawbhuv, tug TSWV kws txhwv mej dlim has tas, “Vim kuv xaav cawm kuas mej dlim, kuv txhaj txhij tubrog moog tua lub nroog Npanpiloos; kuv yuav tsoo tej roojvaag nroog kuas tawg taag, hab tej tuabneeg lub suab qw yuav ua suab quaj suab nyav.

¹⁵Kuv yog tug TSWV, mej tug Vaajtswv kws dlawbhuv. Cov Yixalayees, kuv yog tug kws tsim mej hab yog tug vaajntxwv kws kaav mej ntaag.”

¹⁶Tug TSWV has le nuav, leejtwg yog tug rhawv txujkev phua plhawv havtxwv rua saab tim u, yog txujkev kws tshaab plawg huv tug dlej kws ntsawj ceev heev?

¹⁷Tug TSWV txhaj coj puab paab tubrog coob coob kws muaj zug heev moog raug kev puamtuaj, cov tubrog tsaav tsheb neeg hab tej neeg tog taag rua huv dlej hab puab tsi sawv le lawm, puab pluj ntshis moog ib yaam le tug nplaim teeb kws tuag lawm.

¹⁸Tabsis tug TSWV has tas, “Tsi xob ncu txug tej xwmtxheej kws tub dlhau lug lawm lossis tsi xob xaav txug tej xwm ntawd le.

¹⁹Kuv taabtom ua yaam tshab; nwgnuav yaam ntawd tub tshwm tuaj lawm, mej tsi pum yaam ntawd le los? Kuv yuav ua ib txujkev moog phua plhawv huv tej nraag mojsaab qhua, hab muaj dlej txhawv ndlwg ndlo huv taj suabpuam.

²⁰Txawm yog tej tsaj qus los los yuav fwm kuv, tej maa hab noog ntxhuav puavleej yuav qhuas kuv, rua qhov kuv ua kuas muaj dlej nyob huv tej nraag mojsaab qhua, hab ua kuas muaj dlej txhawv ndlwg ndlo huv taj suabpuam, tsaav tuabneeg kws kuv xaiv txhaj tau dlej haus.

²¹Puab yog tsaav tuabneeg kws kuv tsim tseg ua kuv tug, puab yuav hu nkauj qhuas kuv!”

²²Tug TSWV has tas, “Cov Yixalayees, txawm yog kuv paab mej npaum le ntawd los mej tseem dlhuav kuv hab tsi pehawm kuv le.

²³Mej tub tsi coj mej tej yaaj tuaj tua hlawv fij rua kuv, lossis ua rua kuv tau ntsejmuag lug ntawm mej tej khoom fij le. Kuv tsi tau ua kuas mej nyuaj sab vim tej khoom fij ntawd, lossis ua kuas mej qaug zug vim tej moov tshuaj tsw qaab.

²⁴Mej tub tsi tau muab nyaj yuav moov tshuaj tsw qaab tuaj rua kuv, lossis muab tej roj tsaj kws mej tua ua khoom fij pub rua kuv. Tabsis mej ua rua kuv nyuaj sab vim mej tej kev txhum, kuv dlhuav mej tej kev txhum kawg le.

²⁵Kuv yog Vaajtswv tug kws zaam txim rua mej, kuv ua le nuav, vim kuv yog tug zoo, hab kuv yuav tsi cim ntsoov mej tej kev txhum ca.

²⁶“Ca le pav tej qub lug rua kuv, peb lug sis caav ua ke, hab peev mej zaaj tuaj saib mej puas yog tug kws tsi muaj txhum.

²⁷Mej thawj tug yawmkoob tau ua txhum; mej cov thawjcoj tau ntxeev sab rua kuv,

²⁸hab mej cov numtswv saib tsi taug kuv qhov chaw dlawbhuv. Kuv txhaj tso kev puamtsuaj lug raug tsaav tuabneeg Yixalayees; kuv txhaj tso kuv tsaav tuabneeg rua luas txobthuam.”