Read Hmong Njua Yaxayas 44 Bible Online

Yaxayas 44 - Hmong Njua bible

Yaxayas 44

¹Tug TSWV has tas, “Cov Yixalayees kws yog kuv cov tubkhai, Yakhauj cov xeebntxwv yog tsaav tuabneeg kws kuv xaiv tseg lawm, nwgnuav mej ca le noog kuv has!

²Tug TSWV has tas, ‘Kuv yog tug tsim mej, kuv tsim mej rua huv leej nam plaab hab kuv yuav paab mej: Yakhauj, kuv tug tubkhai, Yesuloos tug kws kuv xaiv tseg, mej tsi xob ntshai!

³“ ‘Kuv yuav tso dlej lug rua huv lub tebchaws kws nqhes dlej, hab ua kuas muaj dlej ndlwg sau tej aav kws qhuav nkig nkuav. Kuv yuav tso kuv tug ntsujplig lug rua mej cov xeebntxwv, hab foom koob moov rua mej cov mivnyuas.

⁴Puab yuav hlub mog nyoos le tej nroj kws tuaj ntawm ntug dlej, hab zoo le tej ntoo kws tuaj ntawm ntug dlej.

⁵“ ‘Tej tuabneeg ib leeg has rua ib leeg has tas, “Kuv yog tug TSWV le tuabneeg.” Puab yuav kaav xeem ua tuabneeg Yixalayees. Nyag taug nyag sau tug TSWV lub npe rua ntawm nyag txhais npaab has tas, nwg yog Vaajtswv tsaav tuabneeg.’ ”

⁶Tug TSWV kws yog cov Yixalayees tug Vaajntxwv hab yog puab tug cawmseej, yog tug muaj Fwjchim Luj kawg nkaus has le nuav tas: “Kuv yog lub hauvpaug hab yog lub ntsis, tsi muaj dlua lwm tug vaajtswv le lawm, tsuas yog kuv tuab leeg xwb.

⁷Leejtwg txhaj muaj peevxwm ua tau le kuv ua? Leejtwg txhaj muaj peevxwm qha txhua yaam thaus hauvpaug kws kuv tsim kuv tsaav tuabneeg lug hab moog txug thaus kawg rua peb noog?

⁸Kuv tsaav tuabneeg, mej tsi xob ntshai! Kuv tub qha txhua yaam kws tshwmsim thaus hauvpaug rua mej paub lug txug naj nub nua, hab mej yog kuv cov timkhawv ntaag. Puas muaj dlua lwm tug vaajtswv lawm? Puas muaj tej tug vaajtswv kws muaj fwjchim heev kws kuv tsi tau nov dlua le?”

⁹Cov tuabneeg kws puab mlom, yeej tsi tseemceeb hab tej vaajtswv kws puab fwm tsi muaj nqes dlaabtsi. Cov tuabneeg kws pe tej vaajtswv nuav yog tuabneeg dligmuag hab tsi paub qaabhau, puab yuav raug kev txaajmuag.

¹⁰Qhov kws tuabneeg nchuav mlom nyaj mlom kub lug pe, tsi muaj qaabhau dlaabtsi le.

¹¹Txhua tug kws pe mlom yuav raug kev txaajmuag; cov tuabneeg kws puab mlom, puab yog tuabneeg xwb, tsi muaj nqes dlaabtsi. Ca le tso puab lug rua ntawm lub rooj txav txim, puab yuav ntshai hab txaajmuag heev.

¹²Tug kws ntaus hlau muab ib thooj hlau coj moog hlawv rua huv lwjhlaus. Nwg saab npaab kws muaj zug tuav rauj ntaus thooj hlau ua tau ib tug mlom. Thaus nwg ua num nwg tshaib plaab, nqhes dlej hab tsaug muas kawg le.

¹³Tug txua ntoo, muab hlua ntsuag thooj ntoo. Nwg muab cwjmem suam thoob plawg, nwg muab txaug lug txaug thooj ntoo ntawd kuas zoo nkaus le tuabneeg tug yaam ntxwv hab coj moog teeb rua huv nwg lub tsev.

¹⁴Nwg ntuv tej ntoo cab lossis xaiv tej ntoo npeb lossis ntoo qheb huv haav zoov lug siv. Lossis nwg cog yub ntoo thuv ca, tog naag lug ywg kuas tej yub thuv ntawd hlub.

¹⁵Tug tuabneeg ntawd muab ib tog ntoo lug ua tawg rauv hab muab ib tog lug txua ua mlom. Nwg muab ib tog ua tawg rauv nte hab rauv ci ncuav; dlua le ntawd nwg muab ib tog lug txua ua ib tug mlom rua nwg teev.

¹⁶Nwg muab ibtxha ua tawg rauv; nwg ci nqaj noj qhuas ntxhas, hab nwg txaus sab heev; nwg tau tej suavtawg ntawd nte, nwg has tas, “Ua caag yuav zoo hab suv ua luaj! Tej ntoo nuav cig zoo kawg.”

¹⁷Tog ntoo kws seem, nwg muab txua ua ib tug mlom; nwg pe hab teev tug mlom ntawd. Nwg thov tug mlom ntawd has tas, “Koj yog kuv tug vaajtswv, thov paab kuas kuv dlim lauj!”

¹⁸Puab lub sab ruag kawg le, puab qe muag nti hab ntsaws qhovntsej, kuas puab tsi pum hab tsi paub dlaabtsi.

¹⁹Tug kws txua mlom tub raag tsi txug has tas, “Kuv muab ib tog ntoo lug ua tawg rauv. Kuv ci ncuav hab ci nqaj sau cov ncaig lug noj. Tog ntoo kws seem, kuv muab txua ua ib tug mlom, hab kuv taabtom pe tog ntoo ntawd ntaag!”

²⁰Qhov kws nwg pe mlom ntawd cuag le noj tshauv ntaag. Puab lub sab ruag coj puab moog yuam kev. Puab tsi pum has tas, tug mlom kws puab tuav rawv ntawm teg tsi yog vaajtswv hlo le.

²¹Tug TSWV has tas, “Yakhauj, ncu ntsoov tej nuav; Yixalayees, mej yog kuv cov tubkhai kws kuv tsim. Yixalayees, mej yog kuv cov tubkhai kuv yuav ncu ntsoov mej moog le.

²²Kuv muab mej tej kev txhum tshem moog povtseg ib yaam le tauv fuab, hab tshem mej lub txim ib yaam le lub lwg dlej thaus sawv ntxuv. Mej ca le rov lug cuag kuv, kuv yog tug kws txhwv mej dlim.”

²³Lub ntuj ca le hu nkauj zoo sab, rua qhov tug TSWV ua tej nuav tav lawm; nruab tivtxwv ca le tsaa suab qw nrov nrov, tej hauv roob, ca le hu nkauj zoo sab, haav zoov hab txhua tug ntoo, ca le hu nkauj zoo sab! Tug TSWV tub txhwv tsaav tuabneeg Yixalayees dlim lawm, qhov kws nwg ua le ntawd, ua kuas suavdlawg pum nwg tug tshwjchim kws ci ntsaa ab.

²⁴“Kuv yog tug TSWV, mej tug Cawmseej, kuv yog tug tsim mej rua huv leej nam plaab. Kuv yog tug TSWV kws tsim ib puas tsaav yaam. Kuv tuab leeg yog tug nthuav lub ntuj, kuv tuab leeg yog tug tsim lub nplajteb.

²⁵Kuv ua kuas cov tuabneeg saib moov tej lug tsi tseeb, hab muab cov tuabneeg kws txawj saib nub, saib hli tej lug rhuav kuas tsi tshwmsim lawv le puab has. Kuv tsi noog tej lug kws cov tuabneeg ntse has, hab kuv ua kuas puab has puab tej lug tsi muaj kuab.

²⁶Tabsis thaus kuv tug tubkhai moog qha tej kws yuav tshwmsim lug, hab thaus kuv tug tubkhai moog qha tej kws kuv yuav ua, kuv yuav ua kuas tej ntawd tav lawv le tej lug kws kuv has. Kuv qha lub nroog Yeluxalees has tas yuav muaj tuabneeg rov lug nyob huv, hab puab yuav rov txhim khu cov Yudas tej nroog dlua tshab; hab kuv yuav tsaa puab tej nroog kws raug puamtsuaj lawm sawv rov lug.

²⁷Kuv has rua dlej havtxwv tub has tas, ‘Ca le nqhuab, kuv yuav ua kuas tej dlej nqhuab taag huv tuabsi.’

²⁸Kuv has rua Xailas has tas, ‘Koj yog kuv tug tub yug yaaj, koj yuav ua kuv teg num kuas tav lawv le kuv lub sab nyam; koj yuav has kuas tuabneeg txhim khu lub nroog Yeluxalees dlua tshab, hab has kuas puab rov pua lub tuamtsev dlua tshab.’ ”