Read Hmong Njua Yaxayas 45 Bible Online

Yaxayas 45 - Hmong Njua bible

Yaxayas 45

¹Tug TSWV xaiv Xailas ua vaajntxwv. Tug TSWV tsaa Xailas ntaus kuas yeej txhua tsaav tuabneeg; nwg khaiv Xailas moog txu tej vaajntxwv kuas poob fwjchim; tug TSWV yuav qheb ntau lub nroog tej roojvaag rua nwg txeem moog rua huv. Tug TSWV txhaj le has rua Xailas has tas:

²“Kuv yuav ua koj ntej moog khu kev rua koj, hab muab tej hauv roob nphau kuas taj sis txig. Kuv yuav tsoo tej roojvaag tooj kuas tawg ua tej dlaim, hab muab tej nqaaj hlau txav kuas tu taag huv tuabsi.

³Kuv yuav muab tej nyaj huv qhov tsaus ntuj nti kws tsi muaj leejtwg paub pub rua koj; ces koj txhaj yuav paub has tas, kuv yog tug TSWV kws yog cov Yixalayees tug Vaajtswv tuav koj lub npe hu koj.

⁴Vim kuv pum txug Yakhauj kws yog kuv tug tubkhai, hab cov Yixalayees kws kuv xaiv tseg lawm, kuv txhaj tuav koj lub npe hu koj, txawm yog koj tsi paub kuv los kuv tub pub rua koj tau koob meej lawm.

⁵“Kuv yog tug TSWV, yeej tsi muaj dlua lwm tug Vaajtswv le lawm, txawm yog koj tsi paub kuv los kuv yuav txhawb koj tug zug.

⁶Kuv ua le nuav kuas txhua tug kws nyob thoob qaab ntuj txhaj paub has tas kuv yog tug TSWV hab tsi muaj dlua lwm tug Vaajtswv le lawm.

⁷Kuv tsim qhov kaaj hab qhov tsaus, kuv yog tug pub koob moov hab tso kev puamtsuaj lug. Kuv yog tug TSWV, tej nuav puavleej yog kuv tsim huv tuabsi.

⁸Kuv yuav tso kev muaj yeej ib yaam le naag lug sau ntuj lug, lub nplajteb yuav tau txais txujkev muaj yeej ntawd, kev thaajyeeb hab kev ncaaj nceeg yuav tawg paaj txi txiv huv lub nplajteb. Kuv yog tug TSWV kws yuav ua kuas tej nuav tshwmsim lug.”

⁹Lub laujkaub aav muaj cuabkaav nrug tug kws puab laujkaub aav sis caav los? Nwg tsuas yog ib lub laujkaub kws zoo le lwm lub xwb los sav? Cov aav nplaum puas nug tug puab lub laujkaub has tas, “Koj ua dlaabtsi?” Lub laujkaub puas ywg tug kws puab lub laujkaub has tas, “Koj tub tsi txawj puab le los sav!”

¹⁰Kev puamtsuaj yuav lug raug tug kws nug nwg nam nwg txiv has tas, “Vim le caag meb yug tau kuv zoo le nuav?”

¹¹Tug TSWV kws yog cov Yixalayees tug Vaajtswv dlawbhuv yog tug npaaj tej kws yuav muaj lug yaav tom ntej, nwg has tas: “Mej tsi muaj cai yuav nug txug kuv cov mivnyuas, lossis qha num rua kuv ua le!

¹²Kuv yog tug kws tsim lub nplajteb hab tsim tuabneeg lug nyob rua huv. Kuv siv kuv lub fwjchim lug nthuav lub ntuj; kuv kaav lub nub, lub hli hab tej nubqub huv tuabsi.

¹³Kuv tshoov Xailas sab kuas nwg ua tej nuav tav lawv le kuv npaaj tseg hab khu tej kws tsi zoo kuas zoo. Txhua txujkev kws nwg taug kuv yuav khu kuas ncaaj. Nwg yuav rov txhim khu kuv lub nroog Yeluxalees dlua tshab, hab tso kuv cov tuabneeg kws raug luas nteg moog kuas dlim rov lug. Tsi muaj leejtwg ndlav lossis muab nyaj xab kuas nwg ua tej nuav le.” Tug TSWV kws muaj Fwjchim Luj kawg nkaus, yog tug has tej lug nuav ntaag.

¹⁴Tug TSWV has rua cov Yixalayees has tas, “Cov Iziv hab cov Sudaas tej nyaj txag yuav yog mej tug, hab cov tuabneeg Xenpas kws luj sab yuav tau ua mej qhev; puab yuav raug saw hlau khi rawv lawv mej qaab. Puab yuav txhus caug ndlua pe mej hab leeg has tas, ‘Vaajtswv nrug nraim mej nyob, hab nwg tuab leeg xwb txhaj yog Vaajtswv.

¹⁵Cov Yixalayees tug Vaajtswv kws cawm nwg tsaav tuabneeg dlim kev puamtsuaj, yog tug Vaajtswv kws tsi tshwm rua leejtwg pum.

¹⁶Cov tuabneeg kws puab mlom yuav raug txaajmuag hab poob ntsejmuag.

¹⁷Tabsis tug TSWV yog tug kws cawm cov Yixalayees dlim, puab yuav kovyeej moog ibtxhis, hab puab yuav tsi poob ntsejmuag ib zag le.’ ”

¹⁸Tug TSWV yog tug kws tsim lub ntuj, nwg tuab leeg txhaj yog Vaajtswv, nwg yog tug kws tsim lub nplajteb, nwg ua kuas nplajteb nyob ruaj khov moog ibtxhis. Nwg tsi tau tsim lub nplajteb lug nyob dlo cuas tsi muaj dlaabtsi, tabsis nwg tsim lug rua tuabneeg nyob. Nwg yog tug kws has tas, “Kuv yog tug TSWV, tsi muaj dlua lwm tug Vaajtswv le lawm.

¹⁹Kuv tsi tau has nraim nkoog tsi pub leejtwg nov, lossis npog tej kws kuv ua lub ntsab tsi pub leejtwg paub. Kuv tsi tau has kuas cov Yixalayees tuaj nrhav kuv huv qhov tsaus ntuj nti. Kuv yog tug TSWV, kuv has tej lug tseeb xwb; hab yaam kws yog kuv txhaj qha rua suavdlawg paub.”

²⁰Tug TSWV has tas, “Mej cov kws dlim kev tuag ntawm txhua tsaav tuabneeg, mej ca le sis sau lug ua ke hab txaav lug kuas ze! Tej tuabneeg nqaa rawv tej mlom ntoo hab thov tug vaajtswv kws cawm tsi tau puab, puab tsi paub dlaabtsi.

²¹Ca le tuaj rua huv tsev tu plaub hab peev mej tej lug, ca cov tuabneeg kws puab has dlaws puab zaaj sis tuavxaam ua ke. Leejtwg pav tej nuav thaus u lug lawm, tsi yog kuv kws yog tug TSWV pav los? Kuv yog Vaajtswv tug dlawbhuv hab yog tug Cawmseej; yeej tsi muaj dlua lwm tug Vaajtswv le lawm.

²²“Txhua tsaav tuabneeg kws kws nyob huv nplajteb, ca le tig lug cuag kuv, mej txhaj yuav dlim! Kuv txhaj yog Vaajtswv, yeej tsi muaj dlua lwm tug Vaajtswv le.

²³Kuv tej lug cog tseg yeej yog lug tseeb hab yuav tsi hloov le. Kuv qha tseeb has tas txhua tug yuav tau txhus caug ntawm kuv xubndlag hab leeg has tas puab yuav muab sab npuab kuv.

²⁴“Puab yuav has tas, tsuas yog tug TSWV tuab leeg xwb, txhaj yuav pub puab kovyeej hab muaj zug; tabsis txhua tug kws ntxub kuv yuav raug kev txaajmuag.

²⁵Kuv yog tug TSWV kws cawm taagnrho Yakhauj cov xeebntxwv kuas dlim hab puab yuav ua kuv tsaug.”