Read Hmong Njua Yaxayas 46 Bible Online

Yaxayas 46 - Hmong Njua bible

Yaxayas 46

¹“Thaus u muaj tuabneeg tuaj pe tug mlom Npees hab tug mlom Nenpaus. Tabsis nwgnuav luas muab rua tsaj thauj lawm xwb, tej mlom ntawd tsuas ua lub nraa nyaav rua tej tsaj xwb.

²Cov mlom ntawd yeej paab tsi tau kuas mlom dlim le; cov mlom ntawd txhaj raug luas muab coj moog lawm. Nuav yog qhov kawg rua lub nroog Npanpiloos tej vaajtswv.

³“Yakhauj cov xeebntxwv kws yog tsaav tuabneeg Yixalayees kws tseem tshuav nyob, mej ca le noog kuv has, kuv yeej tsomkwm mej thaus kws nyavnyuas yug tau mej lug lawm.

⁴Kuv yog mej tug Vaajtswv, hab kuv yuav tsomkwm mej moog txug thaus mej laug hab plaubhau dlawb lawm. Kuv yog tug tsim mej hab yuav tu mej; kuv yuav paab mej hab tso kuas mej dlim.

⁵“Tug TSWV has tas, ‘Mej yuav muab kuv pev rua leejtwg?’ ” “Puas muaj lwm tug zoo le kuv hab?

⁶Cov tuabneeg qheb puab tej naab rhu puab tej kub lug; hab muab puab tej nyaj lug luj sau teev. Puab ndlav ib tug txawj nchuav kub tuaj nchuav ib tug mlom; ces puab moog txhus caug pe tug mlom ntawd.

⁷Puab tsaws tug mlom ntawd rua sau xubpwg kwv moog; puab coj moog txawb rua ib qhov chaw, tug mlom ntawd moog tsi tau qhov twg le. leejtwg thov nwg los nwg tsi paub teb, lossis nwg cawm tsi tau leejtwg dlim ntawm txujkev puamtsuaj le.

⁸“Ncu ntsoov tej nuav hab ua tuab zoo xaav, mej cov tuabneeg kws ntxeev sab, ca le khaws nkaus ca rua nruab sab.

⁹Ncu ntsoov tej xwmtxheej kws tshwmsim thaus u lug lawm; kuv yog Vaajtswv, tsi muaj dlua lwm tug lawm; kuv yog Vaajtswv, tsi muaj lwm tug zoo le kuv,

¹⁰thaus chivkeeb kuv tub yeej qha zaaj kws yuav muaj tshwmsim lug thaus nplajteb yuav kawg lawm. Kuv has tas, ‘Tej kws kuv tub npaaj lawm, yuav nyob khov kho, kuv yuav ua txhua yaam kuas tav lawv le kuv tau npaaj tseg lawm.’ ”

¹¹Kuv taabtom hu ib tug tuabneeg dlha ceev cuag dlaav yaa tim nubtuaj tuaj; nwg nyob lub tebchaws kws dleb kawg le tuaj, nwg yuav ua kuas kuv teg num tav, kuv has le caag, kuv yuav ua le ntawd, hab kuv npaaj sab le caag, kuv yuav ua le ntawd ntaag.

¹²“Cov tuabneeg sab tawv, yog leejtwg xaav has tas nwg tseem nyob dleb ntawm txujkev dlim, ces ca le noog kuv tej lug!

¹³Kuv coj txujkev cawm dlim lug ze, hab nyob tsi dleb mej lawm. Kuv txujkev cawm dlim yuav tsi muab ncua tseg le; kuv yuav cawm lub nroog Yeluxalees hab yuav coj lub koob meej zoo lug rua cov Yixalayees.”