Read Hmong Njua Yaxayas 47 Bible Online

Yaxayas 47 - Hmong Njua bible

Yaxayas 47

¹“Npanpiloos tug ntxhais nkaujxwb, koj ca le nqeg lug nyob sau c ov moov aav; Npanpiloos tug ntxhais, koj ca le nqeg lug nyob huv aav kws tsi muaj lub zwmtxwv! Vim luas yuav tsi hu has tas, koj yog tug nkauj mog kws zoo nkauj ntxiv lawm.

²Muab lub zeb lug zum moov nplej, yaws koj dlaim ntaub npug ntsejmuag, hle koj lub tsho ntev, qaws koj dlaim tab, hab dlaws koj txhais nrhoob kwm dlej moog.

³Koj yuav nyob labqaab hab luas yuav pum koj qhov chaw txaajmuag. Kuv yuav ua pauj hab yuav tsi tseg leejtwg le.”

⁴Tug kws txhwv peb dlim lub npe hu ua tug TSWV kws muaj Fwjchim Luj kawg nkaus, nwg yog cov Yixalayees tug Vaajtswv kws dlawbhuv.

⁵Tug TSWV has tas, “Npanpiloos tug ntxhais, koj ca le nyob tuabywv hab moog rua huv qhov tsaus ntuj nti; vim le ntawd luas yuav tsi hu koj ua ntau lub tebchaws tug puj vaajntxwv ntxiv lawm!

⁶Yaav taag lug kuv chim heev rua kuv tsaav tuabneeg; kuv txhaj rhu kuv txuj koob moov rov qaab lawm. Kuv muab puab cob rua koj teg, hab koj tsi hlub puab hlo le. Txawm yog cov kws tub laug lawm los koj tseem muab tug quabtwg kws nyaav tshaaj plawg khuam rua sau puab xubpwg.

⁷Koj has tas, koj yuav tau ua puj vaajntxwv moog ibtxhis,” vim le ntawd koj txhaj tsi khaws tej nuav rua nruab sab, lossis tsi xaav txug has tas tej nuav yuav txawj kawg.

⁸“Koj tug kws nyam kev lomzem, ca le noog tej lug nuav; koj xaav has tas koj tub dlim hab tau nyob kaaj sab lug lawm. Koj has tas koj muaj fwjchim luj ib yaam le Vaajtswv, hab yeej tsi muaj ib tug zoo npaum le koj. Koj xaav has tas koj yuav tsi tau ua puj ntsuag lossis tau kev txomnyem kws koj tej mivnyuas tuag tso koj tseg.

⁹Muaj ib nub koj tsi nwm txug ob yaam xwm nuav yuav lug raug koj; vim koj tej tswvyim phem hab koj tej khawvkoob, koj cov mivnyuas hab koj tug quasyawg yuav tuag tso koj tseg.

¹⁰“Koj ca sab ntsoov rua koj tej kev phem kev qas nkaus xwb; koj has tas yeej tsi muaj leejtwg pum koj hlo le. Koj lub tswvyim hab tej kev txawj ntse tub ua rua koj yuam kev, hab koj xaav huv koj lub sab has tas, ‘Kuv yog Vaajtswv ntaag, tsi muaj dlua lwm tug lawm.’

¹¹Koj yuav raug kev puamtsuaj, hab koj tej khawvkoob yuav paab tsi tau koj; koj yuav raug tej kev pemsij kws koj nwm tsi txug; yog txujkev pemsij kws koj yeej tsi tau xaav txug le.

¹²Ca sab ntsoov rua koj tej khawvkoob hab koj tej dlaab neeb kws koj ibtxwm coj thaus koj tseem hluas lug lawm. Tej zag tej ntawd yuav paab tau koj; hab tej zag yuav ua rua koj cov yeebncuab ntshai.

¹³Koj qaug zug taag vim muaj ntau tug nrug koj tuavxaam. Ca le kuas koj cov tuabneeg kws txawj saib nubqub, moog sawv tom hauv ntej hab paab koj, puab cov tuabneeg kws kawm txug tej nubqub, puab yuav muab lub ntuj faib ua tej ntsuj hab qha koj ib hlis dlhau ib hlis, saib yuav muaj xwmtxheej dlaabtsi lug raug koj.

¹⁴“Puab zoo ib yaam le cov quavnyaab npleg, hab suavtawg yuav kub puab! Puab tsi muaj peevxwm paab kuas puab dlim ntawm cov nplaim tawg ntawd le. Tsi yog cov ncaig tawg kws txhab kuas suv; hab tsi yog lub cubtawg kws rauv rua puab nte.

¹⁵Cov tuabneeg kws ua num rua koj yuav ua le nuav rua koj, puab yog cov txawj saib nubqub rua koj thaus koj tseem hluas lug. Puab yuav ncaim koj hab nyag moog nyag lawm, yuav tsi muaj leejtwg paab kuas koj dlim le.”