Read Hmong Njua Yaxayas 48 Bible Online

Yaxayas 48 - Hmong Njua bible

Yaxayas 48

¹Cov Yixalayees kws yog Yudas cov xeebntxwv: mej ca le noog tej lug nuav: mej tuav Vaajtswv lub npe coglug has tas, yuav pehawm cov Yixalayees tug Vaajtswv, tabsis mej tsi ua lawv le tej lug ntawd.

²Mej has tas mej yog cov pejxeem kws nyob huv lub nroog dlawbhuv, hab tso sab plhuav rua cov Yixalayees tug Vaajtswv, nwg lub npe hu ua tug TSWV kws muaj Fwjchim Luj kawg nkaus.

³“Tug TSWV has rua cov Yixalayees has tas: thaus u kuv tub qha rua mej lawm has tas, yuav muaj dlaabtsi tshwmsim lug; yog le ntawd, thaus mej tsi nwm txug kuv txhaj yuav ua kuas tej ntawd tshwm lug.

⁴Kuv yeej paub has tas, mej yog tuabneeg tawv ncauj, mej lub cejdlaab tawv npaum le hlau hab mej lub hauvplaj tawv npaum le tooj dlaag.

⁵Yog le ntawd kuv tub xub qha txug mej lub neej yaav pegsuab rua mej paub thaus u lawm. Kuv qha ua ntej kws tej ntawd tshwmsim lug, kuas mej tsi xob khaav has tas, yog mej tej mlom ntoo lossis mlom tooj ua kuas tej ntawd tshwmsim lug.

⁶“Mej tub nov tej nuav hab pum tej ntawd lawm. Mej txawm tsi leeg paub le los? Txij nuav moog kuv yuav qha tej yaam tshab rua mej paub, yog tej yaam zais quas nreeg kws mej tsi tau paub dlua le.

⁷Tej xwmtxheej kws kuv nyavnyuas ua nuav mej yeej tsi tau nov dlua le. Yog mej nov lawm, mej yuav khaav has tas, ‘Peb tub paub lawm.’

⁸Mej yeej ibtxwm tsi nov, mej yeej ibtxwm tsi paub le, txij thaus u lug mej lub qhovntsej yeej tsi qheb. Vim kuv paub mej lub sab yeej tsi ncaaj, hab mej yeej yog tuabneeg ntxeev sab thaus yug tau mej lug le lawm.

⁹“Vim kuv xaav kuas tuabneeg qhuas kuv lub npe, kuv cheem kuv txujkev chim tseg rua nruab sab. Kuv cheem tej ntawd txhaj tsi ua rua mej puamtsuaj.

¹⁰Kuv coj kev nyuaj sab lug sim mej ib yaam le nchuav nyaj huv yeejvub, tabsis kuv pum has tas mej tsi muaj nqes dlaabtsi le.

¹¹Vim kuv xaav ua rua kuv, vim kuv xaav ua rua kuv xwb, kuv txhaj ua tej nuav, kuv yuav tsi pub leejtwg saib tsi taug kuv lub npe, lossis tsi pub leejtwg muaj feem koom nrug kuv tug tshwjchim le.”

¹²“Yakhauj, koj ca le noog kuv tej lug, Yixalayees tug kws kuv tau hu! Kuv yog Vaajtswv, kuv yog lub hauvpaug hab yog lub ntsis.

¹³Yog kuv txhais teg tsim lub nplajteb, hab kuv saab teg xis nthuav lub ntuj; thaus kuv hu, lub nplajteb hab lub ntuj tuab txhij tawm tuaj.

¹⁴“Mej suavdlawg ca le sis sau lug ua ke hab noog kuv has! Puab cov ntawd, leejtwg txhaj tshaajtawm tau tej nuav rua suavdlawg? Tug TSWV hlub Xailas heev, tug TSWV txhaj tau xaiv Xailas ua nwg teg num rua lub nroog Npanpiloos, hab tug TSWV txhais teg yuav tawmtsaam lub nroog Npanpiloos.

¹⁵Kuv yog tug has hab yog tug hu Xailas ntaag; kuv coj nwg lug hab ua kuas nwg vaammeej.

¹⁶“Ca le txaav lug kuas ze txhaj nov zaaj kws kuv has nuav, kuv yeej qha zaaj nuav thaus chivkeeb lug tsi zais le, hab yeej tshwm muaj tseeb lawv le kuv tej lug.” (Nwgnuav tug TSWV kws yog Vaajtswv muab nwg lub fwjchim rua kuv hab khaiv kuv moog.)

¹⁷Cov Yixalayees tug Vaajtswv kws dlawbhuv, tug TSWV kws txhwv mej dlim has tas: “Kuv yog tug TSWV kws yog mej tug Vaajtswv, tug kws qha tej kev zoo rua mej, tug kws coj mej txujkev kws tsimnyog taug.

¹⁸“Yog mej ua tuab zoo noog kuv tej lug saamfwm! Ces tej koob moov yuav ndlwg laub lug lug rua mej ib yaam le tug dlej ndlwg tsi paub nqhuab le. Mej tej kev vaammeej yuav zoo ib yaam le havtxwv ndlaas.

¹⁹Mej tej tubki yuav fuamvaam coob suav tsi txheeb ib yaam le tej xuabzeb, puab tej npe yuav tsi raug rhu tawm ntawm kuv lossis tsi raug puamtsuaj le.”

²⁰Ca le tsiv tawm huv lub nroog Npanpiloos moog, ca le tsiv kuas dlim. Ca le hu nkauj zoo sab rua txhua qhov paub has tas, “Tug TSWV tau txhwv nwg tug tubkhai Yixalayees dlim lawm!”

²¹Thaus tug TSWV coj nwg tsaav tuabneeg taug kev lug hlaa taj suabpuam kws tshaav ntuj kub heev ntawd, puab yeej tsi raug kev txomnyem hab nqhes dlej le. Tug TSWV ua kuas dlej txhawv huv pobzeb lug rua puab haus; nwg rua lub pobzeb dlej txhaj tawm huv lug.

²²Tug TSWV has tas, “Tsi muaj kev kaaj sab rua cov tuabneeg ua txhum le.”