Read Hmong Njua Yaxayas 50 Bible Online

Yaxayas 50 - Hmong Njua bible

Yaxayas 50

¹Vaajtswv has tas, “Koj xaav has tas, kuv tso kuv tsaav tuabneeg tseg, ib yaam le tug txivneej kws muab nwg tug quaspuj nrauj nua los? Dlaim ntawv nrauj nyob qhov twg? Koj xaav has tas kuv muab koj muag rua luas coj moog rau txim, ib yaam le tug txivneej kws muab nwg cov mivnyuas muag moog ua qhev nua los? Tsis yog le ntawd, koj raug muag vim koj tej kev txhum; koj raug xaa moog povtseg, vim koj nam tau ua txhum xwb.

²“Vim le caag thaus kuv lug tsi muaj ib tug tuabneeg nyob ntawd? Vim le caag thaus kuv hu tsi muaj ib tug tuabneeg teb? Kuv txhais npaab tuab lu heev, paab tsi tau koj los? Lossis yog kuv tsi muaj fwjchim tso koj dlim? Kuv muaj peevxwm has kuas dlej havtxwv nqhuab hab muab tej haav dlej hloov ua suabpuam, tej ntseg yuav tuag tsw lwj ntxag.

³Kuv muab kev tsaus ntuj lug thaiv lub ntuj, hab muab ntaub tsaaj lug qhwv lub ntuj.”

⁴Tug TSWV kws yog Vaajtswv pub tswvyim rua kuv, yog le ntawd kuv txhaj txawj txhawb tau cov tuabneeg kws qaug zug. Txhua taagkig nwg pub kuv muaj lub sab kub lug noog tej lug kws nwg qha rua kuv.

⁵Tug TSWV kws yog Vaajtswv ua rua kuv txawj totaub, kuv tsi tau ntxeev sab lossis tsiv tawm ntawm nwg.

⁶Kuv tig nrausqaum rua cov tuabneeg kws nplawm kuv. Kuv tsi tau cheem cov tuabneeg kws thuam kuv, kuv tig xubndlag rua puab thaus puab rhu kuv cov fwjtxwv, hab ntu quavncaug rua kuv lub ntsejmuag.

⁷Tabsis tej lug kws puab thuam tsi mob kuv le, rua qhov tug TSWV kws yog Vaajtswv paab kuv lawm. Kuv ua sab ntev rua puab. Kuv paub has tas, kuv yeej tsi raug kev txaajmuag ib zag le,

⁸rua qhov Vaajtswv nyob ze kuv, hab nwg paub has tas kuv yog tuabneeg tsi muaj txim. Leejtwg xaav ua plaub rua kuv, wb ca le ua ke moog rua huv tsev tu plaub. leejtwg xaav ua yeebncuab rua kuv, nwg sim txaav lug ze kuv saib.

⁹Tug TSWV kws yog Vaajtswv yeej paab kuv; leejtwg txhaj yuav has tau tas kuv ua txhum? Puab yuav pluj taag ib yaam le tej rig tsho kws ntsaum kaabrwg noj lawm.

¹⁰Mej cov ntawm ko puas muaj leejtwg fwm Vaajtswv hab noog tej lug kws nwg tug tubkhai qha? Txawm yog nwg taug txujkev kws tsaus ntuj nti los nwg ca sab rua tug TSWV lub npe, hab tso sab plhuav rua nwg tug Vaajtswv.

¹¹Mej txhua tug kws tuav tswvyim txuv lwm tug, mej tej tswvyim ntawd yuav rov lug txuv mej. Tug TSWV yuav ua kuas tej ntawd lug raug mej ntaag. Mej yuav raug kev tsimtxom hab txomnyem kawg le.