Read Hmong Njua Yaxayas 51 Bible Online

Yaxayas 51 - Hmong Njua bible

Yaxayas 51

¹Tug TSWV has tas, “Mej cov kws nrhav txujkev ncaaj nceeg hab nrhav tug TSWV, mej ca le noog kuv has. Ca le saib lub pobzeb kws mej muab txaug hab qhov chaw kws mej khawb pobzeb.

²Ca le saib mej yawmkoob Anplahaas hab mej pujkoob Xalas, tug kws yug mej cov kws ua xeebntxwv; thaus kuv hu Anplahaas, nwg tsi muaj ib tug mivnyuas le, tabsis kuv foom koob moov rua nwg hab pub rua nwg muaj mivnyuas; kuv pub rua nwg muaj xeebntxwv coob suav tsi txheeb le.

³“Tug TSWV yuav nplig cov tuabneeg huv lub nroog Yeluxalees, hab cov tuabneeg nyob huv lub nroog kws raug puamtsuaj taag lawm sab, hab yuav muab lub nroog Yeluxalees tej nraag mojsaab ua kuas zoo le lub Vaaj Edees. Yeluxalees tej taj suabpuam yuav zoo le tug TSWV lub vaaj; yuav muaj kev zoo sab hab kev kaaj sab nyob huv Yeluxalees, yuav muaj lub suab hu nkauj qhuas kuv hab ua kuv tsaug.

⁴“Kuv tsaav tuabneeg, mej ca le noog kuv has, hab mej ca le tig qhovntsej noog kuv tej lug; kuv txuj kevcai hab txujkev ncaaj nceeg yuav ua lub teeb ci rua txhua tsaav tuabneeg pum kev.

⁵Kuv yuav lug cawm puab sai sai ntaag; kuv txujkev cawm dlim tub lug lawm, hab kuv txhais npaab yuav kaav txhua tsaav tuabneeg. Cov tebchaws kws nyob dleb tog rawv kuv; hab ca sab ntsoov rua kuv txhais npaab kws yuav cawm puab dlim.

⁶Mej ca le tsaa qhovmuag saib sau nruab ntug; hab saib rua huv nplajteb; vim lub ntuj yuav yaaj ntshis ib yaam le tej paa tawg; lub nplajteb yuav ndluag taag le tej qub rig tsho, hab tej tuabneeg kws nyob huv nplajteb yuav tuag taag ib yaam le tej yoov. Tabsis kuv txujkev cawm dlim yuav nyob moog ibtxhis; hab kuv txujkev ncaaj nceeg yuav nyob moog tsi paub kawg le.

⁷“Mej cov kws paub txujkev ncaaj nceeg mej ca le noog kuv has, cov tuabneeg kws khaws kuv txuj kevcai rua nruab sab, mej tsi xob ntshai thaus tuabneeg thuam hab saib tsi taug mej;

⁸vim ntsaum kaabrwg yuav noj puab ib yaam le noj tej qub rig tsho, hab kaas yuav noj puab ib yaam le noj tej tawv yaaj; tabsis kuv txujkev ncaaj nceeg yuav muaj nyob moog ibtxhis, hab kuv txujkev cawm dlim yuav muaj rua txhua tam tuabneeg.”

⁹Tug TSWV, sawv lug paab peb lauj! Siv koj lub fwjchim cawm peb, ib yaam le koj tau ua lug lawm. Tsi yog koj tub muab Lahaj txav ua tej thooj, hab muab tug zaaj huv havtxwv tsuav tu taag lawm los?

¹⁰Tub yog koj ua rua dlej havtxwv nqhuab, hab ua kev qhuav qhawv huv dlej moog rua saab tim u, kuas cov tuabneeg kws koj tub cawm dlim lawm hlaa dlhau dlej rua saab tid.

¹¹Cov tuabneeg kws koj tub cawm dlim lawm, yuav rov qaab lug, hab hu nkauj zoo sab huv lub nroog Yeluxalees; puab yuav muaj kev zoo sab hab kaaj sab lug moog ibtxhis; kev txomnyem quaj ntsuag hab kev tu sab yuav tsi raug puab lawm.

¹²Tug TSWV has tas, “Kuv yog tug txhawb mej tug zug. Vim le caag mej yuav ntshai cov tuabneeg kws txawj tuag kws tub tsi muaj sa nyob ntev npaum le tej nyom?

¹³Mej tsi ncu qaab tug TSWV kws tsim mej, tug kws nthuav lub ntuj hab pua lub nplajteb lawm los? Vim le caag mej ua neej nyob naj nub ntshai cov tuabneeg kws tsimtxom mej hab xaav kuas mej puamtsuaj? Puab tej kev nruj tsiv yeej ua tsi tau le caag rua mej.

¹⁴Tshuav tsi ntev kuv yuav tso cov tuabneeg raug txim dlim lug; puab yuav tsi tuag hab tsi tau moog rua huv lub qhov ntxaa, hab puab yuav tsi tu ncua zaub mov noj le lawm.

¹⁵“Kuv kws yog tug TSWV kws yog mej tug Vaajtswv, kuv yog tug dlu havtxwv kuas ndlaas nphau tej nam twv hab nrov nroo ntwg. Kuv lub npe hu ua tug TSWV kws muaj Fwjchim Luj kawg nkaus!

¹⁶Kuv muab kuv tej lug qha cob rua mej hab kuv txhais teg tiv thaiv mej, kuv nthuav lub ntuj hab pua lub nplajteb, kuv has rua cov tuabneeg huv lub nroog Yeluxalees tas, ‘Mej yog kuv tsaav tuabneeg.’ ”

¹⁷Yeluxalees, sawv los mas! Koj ca le sawv tseeg lug! Koj tub haus tug TSWV lub khob kws yog txujkev txav txim lawm. Lub khob ntawd yog nwg txujkev chim kws ua rua koj qaug puj poog.

¹⁸Cov mivnyuas kws koj yug tsi muaj ib tug coj koj kev; cov mivnyuas kws koj tu hlub, tsi muaj ib tug lug tuav koj teg.

¹⁹Yuav muaj ob yaam kev puamtsuaj lug raug koj; koj lub tebchaws yuav raug kev tsuv kev rog kuas pemsij taag. Koj tsaav tuabneeg yuav tuag taag rua kev tshaib kev nqhes, hab nav ntaaj nav rag. Yuav tsi muaj leejtwg tuaj nplig koj sab le.

²⁰Koj cov mivnyuas yuav tsaug muas, puab pw pawg lug ntawm tej kev, puab zoo ib yaam le tug kauv kws maag tug tuabneeg cuab tsaj lub vaag; puab raug mej tug Vaajtswv txujkev chim hab nwg tej lug tshev.

²¹Mej cov tuabneeg kws raug kev txomnyem huv nroog Yeluxalees, mej qaug puj poog cuag qaug cawv, tabsis tsi yog haus cawv ntxws.

²²Tug TSWV kws yog mej tug Vaajtswv, tug kws tuaj nwg tsaav tuabneeg tog has tas, “Saib lauj! Kuv muab lub khob kws yog txujkev chim tshem tawm ntawm mej moog lawm; lub taig kws yog kuv txujkev chim, mej tsi tau haus ntxiv lawm.

²³Kuv yuav muab lub khob ntawd rua tug tuabneeg kws tsimtxom mej kws has rua mej tas, ‘Mej ca le pw huv aav ua kev rua peb moog; hab muab mej lub nrausqaum ua kev rua peb taug.’ ”