Read Hmong Njua Yaxayas 52 Bible Online

Yaxayas 52 - Hmong Njua bible

Yaxayas 52

¹Yeluxalees, sawv los mas, ca le sawv, cuab koj tug zug khov kho! Vaajtswv lub nroog kws dlawbhuv, ca le naav tej rig tsho kws zoo tshaaj plawg! Cov tuabneeg kws tsi ua kevcai txav tawv hab cov tuabneeg tsi huv, yuav tsi tuaj rua huv koj ntxiv lawm.

²Yeluxalees, nchus koj tej moov aav! Sawv moog nyob sau lub zwmtxwv. Xi-oos tug ntxhais, dlaws txuj saw hlau kws khi koj cejdlaab kuas nplaam.

³Tug TSWV kws kaav txhua tsaav yaam has rua nwg tsaav tuabneeg tas, “Thaus mej moog ua luas qhev, luas tub tsi muab nyaj yuav mej; ib yaam le ntawd tsi taag yuav muab nyaj txhwv mej rov qaab lug le hab.”

⁴Vim tug TSWV kws yog Vaajtswv has tas, “Thawj zag kws kuv tsaav tuabneeg nyob nraag tebchaws Iziv, tsi muaj leejtwg yuam kuas puab moog, tabsis tom qaab ntawd cov Axilias tau tuaj yuam puab moog hab tsi them ib yaam dlaabtsi le.”

⁵Tug TSWV has tas, “Nwgnuav tej xwm kws zoo le nuav tub muaj nyob huv lub nroog Npanpiloos lawm hab. Mej raug puab nteg moog ua qhev, puab tub tsi them nqe yuav mej. Cov tuabneeg kws kaav mej, puab muab hlub, khaavtheeb hab saib tsi taug kuv le.

⁶Muaj ib nub twg mej yuav leeg paub has tas, kuv yog Vaajtswv, hab thaus ntawd mej yuav paub has tas, kuv tub has tej lug nuav rua mej lawm.”

⁷Thaus mej pum tug tuabneeg hlaa toj roob hauv peg xaa xuv zoo tuaj, mas mej zoo sab kawg le, puab tuaj qha txujkev thaajyeeb kws yog txujmoo zoo! Nwg tshaajtawm txujkev cawm dlim; nwg has rua cov tuabneeg huv lub nroog Yeluxalees has tas, “Mej tug Vaajtswv yog vaajntxwv!”

⁸Cov tuabneeg kws zuv lub nroog qw zum zawg zoo sab heev, vim puab qhovmuag pum ntsoov tug TSWV rov lug rua huv lub nroog Yeluxalees lawm.

⁹Lub nroog Yeluxalees kws tawg taag lawm, ca le hu nkauj zoo sab luag ntxhi! Tug TSWV yuav cawm nwg lub nroog Yeluxalees hab nplig nwg tsaav tuabneeg sab.

¹⁰Ib tsoom tuabneeg thoob nplajteb yuav pum tug TSWV siv nwg lub fwjchim kws luj kawg nkaus cawm nwg tsaav tuabneeg.

¹¹Ca le tawm huv lub nroog Npanpiloos nuav moog kuas taag! Tsi xob kov tej yaam kws tsi huv hlo le; mej cov kws nqaa tug TSWV tej cuabyeej siv huv lub Tuamtsev, ca le tawm huv lub nroog moog hab ua kevcai ntxuav kuas mej huv.

¹²Zag nuav tsi taag mej yuav maaj tawm, rua qhov tsi yog mej nyag kev tsiv, tug TSWV kws yog mej tug Vaajtswv yuav coj mej txuj hauv kev; hab cov Yixalayees tug Vaajtswv yuav thaiv tom mej qaab.

¹³Tug TSWV has tas, “Kuv tug tubkhai yuav ua nwg teg num kuas tav; nwg yuav tau ntsejmuag hab suavdlawg yuav txhawb nqaa nwg. Yuav tsaa nwg ua tug luj tshaaj plawg.

¹⁴Thaus puab pum dlheev nwg, muaj coob leej yuav ntshai hab yoob taag; nwg lub ntsejmuag hab nwg lub cev txawv heev, zoo tsi thooj le tuabneeg lub.

¹⁵Nwgnuav nwg yuav ua rua ntau tsaav tuabneeg xaav tsi thoob, hab tej vaajntxwv yuav yoob taag has tsi taug ib lu lug le. Tej kws puab tsi tau paub hab tsi tau pum dlua, puab yuav pum hab totaub.”