Read Hmong Njua Yaxayas 53 Bible Online

Yaxayas 53 - Hmong Njua bible

Yaxayas 53

¹Leejtwg yuav ntseeg tej kws peb has? “Leejtwg yuav pum has tas tej nuav yog tug TSWV txhais teg ua?

²Tub yog tug TSWV pum zoo kuas nwg tug tubkhai luj hlub ib yaam le tsob ntoo kws nrhau caag tuaj ntawm thaaj aav qhuav. Nwg lub cev ntaaj ntsug tsi zoo nraug peb txhaj tsi nyam nwg; nwg tsi muaj ib qho zoo txaus nyam, peb txhaj tsi ntshaw nwg.

³Peb saib tsi taug nwg hab muab nwg tso povtseg, nwg raug kev txomnyem hab nyaj rawv txujkev mob, tsi muaj leejtwg yuav tig saib nwg. Peb tsi quavntsej nwg ib yaam le nwg tsi tsimtxaj dlaabtsi.

⁴“Tabsis nwg ris peb tej kev txomnyem hab ris peb tej kev mob kev nkeeg, txawm yog nwg paab peb npaum le ntawd los peb tseem has tas qhov kws nwg raug kev txomnyem tub yog Vaajtswv rau txim rua nwg.

⁵Tub yog vim peb tej kev txhum, nwg txhaj raug nqaj ndluag ntshaav nrug, tub yog vim tej kev phem kws peb ua, nwg txhaj raug nplawm. Qhov kws nwg raug txim txomnyem ntsuav, yog paab kuas peb tau nyob kaaj sab lug, nwg raug nplawm tub yog khu kuas peb tej kev mob kev nkeeg zoo.

⁶Peb txhua tug zoo le tej yaaj kws yuam kev lawm; peb suavdlawg nyag moog nyag ib txujkev lawv le nyag lub sab nyam, tabsis tug TSWV muab peb lub txim kws tsimnyog peb raug tso rua nwg ris.

⁷“Nwg raug tsimtxom, hab nwg ntxhuv sab kawg; tabsis nwg muaj lub sab mog muas, nwg tsi has ib lus le. Nwg zoo ib yaam le tug yaaj kws luas caab moog tua, hab zoo ib yaam le tug yaaj kws luas taabtom muab txav plaub los nwg tub tsi quaj ib suab le.

⁸Nwg raug nteg, raug tsimtxom hab raug coj moog tua povtseg los tsi muaj leejtwg quavntsej nwg le. Tub yog vim peb suavdlawg lub txim, nwg txhaj raug tua tuag.

⁹Txawm yog nwg yeej tsi tau ua ib qhov txhum, hab nwg lub qhovncauj yeej tsi tau has ib lu lug dlaag le los puab ca le muab nwg coj moog log nrug cov tuabneeg txhum, hab log rua huv tug txivneej kws npluanuj lub qhov ntxaa.”

¹⁰Tug TSWV has tas, “Kuv yeej pum zoo ca nwg raug kev txomnyem, Nwg tuag txhaj theej tau tuabneeg lub txhoj, hab zaam tau tuabneeg lub txim. Yog le ntawd, nwg yuav pum nwg tej xeebntxwv; nwg yuav muaj sa nyob ntev hab nwg yuav ua kuas kuv teg num tav.

¹¹Tom qaab kws nwg raug kev txomnyem dlhau lawm, nwg yuav rov muaj kev zoo sab dlua ntxiv; nwg yuav paub has tas txujkev txomnyem kws nwg raug ntawd tsi nkim nwg tug zug. Kuv tug tubkhai ncaaj nceeg kws kuv txaus sab yuav ris coob leej ntau tug lub txim, vim tej kws nwg ua ntawd, kuv txhaj zaam puab lub txim.

¹²Yog le ntawd, kuv yuav pub koob meej rua nwg, nwg yuav tau nrug cov tuabneeg kws ua tug luj hab muaj fwjchim nyob; nwg txaus sab tso nwg txujsa tseg, nwg lug nrug cov tuabneeg txhum nyob. Nwg ris suavdlawg lub txim; hab thov tug TSWV zaam puab lub txim.”