Read Hmong Njua Yaxayas 54 Bible Online

Yaxayas 54 - Hmong Njua bible

Yaxayas 54

¹Yeluxalees, koj zoo le tug quaspuj kws muaj tsi taug mivnyuas, tabsis nwgnuav koj yuav tau hu nkauj zoo sab! Nwgnuav koj yuav muaj mivnyuas coob tshaaj tug quaspuj kws nwg tug quasyawg nrug nraim nwg nyob.

²Ca le nqug koj lub tsevntaub kuas dlaav ntxiv, txuas tej hlua tsevntaub kuas ntev, hab txhus tej tswg kuas khov!

³Koj yuav txaav koj nrim dlej nrim aav kuas dlaav moog ntxiv, koj tej pejxeem yuav rov lug nyob huv puab tej qub teb qub chaw kws nwgnuav lwm tsaav tuabneeg kaav lawm. Tej nroog kws nwgnuav caj suabpuam taag lawm yuav rov muaj tuabneeg nyob puv nkaus.

⁴Koj tsi xob ntshai, koj yuav tsi raug kev txaajmuag lawm, koj yuav tsi swb leejtwg le. Koj yuav tsi ncu txug tej kev pleeg kev yi kws koj tau ua thaus koj tseem hluas, hab tsi ncu txug tej kev nyuaj sab kws thaus koj ua puj ntsuag lawm.

⁵Tug kws tsim koj yuav zoo le koj tug quasyawg, nwg lub npe yog tug TSWV kws muaj Fwjchim Luj kawg nkaus. Cov Yixalayees tug Vaajtswv dlawbhuv kws paab kuas koj dlim yog tug kaav taagnrho lub nplajteb nuav huv tuabsi.

⁶Yixalayees, koj zoo nkaus le tug quaspuj hluas kws tug quasyawg muab tso tseg ua rua koj nyuaj sab kawg le. Tabsis tug TSWV hu koj rov lug cuag nwg hab has rua koj tas:

⁷“Kuv tso koj tseg ib nyuas ntu xwb, vim kuv hlub koj heev, kuv yuav coj koj rov lug.

⁸Vim kuv chim heev, kuv txhaj fee plhu rua koj ib ntus, tabsis kuv yuav rov hlub koj moog ibtxhis.” Tug TSWV kws paab koj dlim, yog tug has tej lug nuav.

⁹“Thaus Nau-es tam kuv tau coglug tseg ca yuav tsi pub dlej nyaab lub nplajteb ib zag ntxiv lawm. Nwgnuav kuv coglug yuav tsi chim rua koj ib zag ntxiv le lawm hab; kuv yuav tsi tshev lossis rau txim rua koj le.

¹⁰Tej zag cov hauv roob hab cov pov roob yuav tawg moog, tabsis kuv txujkev kws hlub koj yuav tsi paub kawg le. Kuv coglug tseg has tas yuav muaj kev thaajyeeb, mas kuv yuav ua lawv le kuv tej lug ntawd moog ibtxhis; tug TSWV kws hlub koj yog tug kws has tej lug nuav.”

¹¹Tug TSWV has tas, “Yeluxalees, koj yog lub nroog kws raug kev txomnyem lwj sab, tsi muaj leejtwg paab hab tsi muaj leejtwg nplig koj sab le, kuv yuav muab tej pobzeb muaj nqes lug pua koj.

¹²Kuv yuav muab tej hlaws lunpis puab ua koj tej chaw tsomfaaj, muab tej pobzeb kws ci le nplaim tawg lug ua koj tej roojvaag, hab muab tej hlaws muaj nqes ua tug ntsaa yeej thaiv puagncig koj.

¹³“Kuv yuav qha koj tsaav tuabneeg hab yuav pub kev vaammeej hab kev thaajyeeb rua puab.

¹⁴Txujkev ncaaj nceeg yuav ua rua koj nyob ruaj khov kho, koj yuav tsi raug luas tsimtxom hab yuav tsi muaj kev txhawj kev ntshai.

¹⁵Yog leejtwg tawmtsaam koj los tsi yog kuv tso ncauj, yog leejtwg ntaus koj, tug ntawm yuav swb koj.

¹⁶“Kuv yog tug tsim tug kws ntaus hlau, nwg txhaj teeb lwjhlaus ntaus cuabyeej ua rog. Tub yog kuv tsim tug tubrog, nwg txhaj coj tej cuabyeej moog ua rog.

¹⁷Tsi muaj ib yaam cuabyeej twg kws yuav tawmtsaam tau koj le, koj yuav muaj lug teb cov tuabneeg kws kom koj. Kuv yuav tiv thaiv kuv cov tubkhai hab paab kuas puab yeej.” Tug TSWV yog tug kws has tej lug nuav.