Read Hmong Njua Yaxayas 55 Bible Online

Yaxayas 55 - Hmong Njua bible

Yaxayas 55

¹Tug TSWV has tas, “Leejtwg nqhes dlej, ca le lug haus, muaj dlej nyob ntawm nuav! Leejtwg tsi muaj nyaj, ca le lug yuav dlawb hab noj dlawb! Ca le lug yuav cawv txiv maab hab mig nyuj; tsi taag them nyaj le.

²Vim le caag mej siv mej tej nyaj moog yuav tej kws tsi yog mov? Vim le caag mej siv mej tej nqe zug moog yuav tej kws tsi txaus mej sab? Ca le noog kuv has, mej txhaj tau noj tej zaub mov kws zoo, mej lub sab txhaj tsau npo rua tej zaub mov kws zoo tshaaj plawg.

³“Kuv tsaav tuabneeg, nwgnuav mej ca le noog hab lug cuag kuv, mej txhaj yuav muaj sa nyob; kuv coglug ruaj khov rua mej moog ibtxhis! Hab kuv yuav muab tej koob moov kws kuv tub coglug rua Daviv lawm pub rua mej.

⁴Kuv tsaa Daviv ua ib tug thawjcoj hab kaav txhua tsaav tuabneeg, hab kuv yuav qha kuv lub fwjchim ntawm nwg moog rua puab.

⁵Nwgnuav mej yuav nqua hu ib tsoom tebchaws tuaj; puab yeej ibtxwm tsi tau paub mej le, tabsis nwgnuav puab yuav lug poog mej. Kuv kws yog tug TSWV mej tug Vaajtswv kws yog cov Yixalayees tug Vaajtswv dlawbhuv, kuv yuav ua kuas tej nuav tshwm tuaj; mas kuv yuav ua kuas mej tau koob meej hab fwjchim.”

⁶Ca le nrhav tug TSWV thaus kws tseem yuav ntsib tau nwg, ca le thov nwg paab thaus nwg tseem nyob ze mej.

⁷Ca cov tuabneeg sab phem tso puab tej kev phem tseg, hab ca cov tuabneeg tsi ncaaj tso puab tej kev xaav phem tseg. Ca puab tig lug cuag tug TSWV, Vaajtswv txhaj yuav hlub puab. Lug cuag peb tug Vaajtswv, nwg txhaj yuav zaam puab lub txim.

⁸Tug TSWV has tas, “Tej kws kuv xaav zoo tsi thooj le tej kws mej xaav,” hab tej kws kuv ua zoo tsi thooj le tej kws mej ua.

⁹Lub ntuj nyob sab tshaaj lub nplajteb nuav le caag, tej kws kuv ua hab kuv xaav nyob sab tshaaj tej kws mej ua hab mej xaav npaum le ntawd.

¹⁰“Dlaus hab naag lug sau nruab ntug lug, tsi rov qaab rua sau lawm, yog lug ywg lub nplajteb kuas qoobloo luj hlub tawg paaj txi txiv, txhaj muaj noob tseb hab kuas muaj mov rua tuabneeg noj.

¹¹Tej lug kws kuv has moog lawm zoo ib yaam le ntawd ntaag: tej lug ntawd yuav tsi rov qaab lug cuag kuv dlawb dlo ib zag le; tabsis yuav tawg paaj txi txiv lawv le kuv xaav tseg lawm. Kuv tej lug yuav ua txhua yaam kws kuv tso nwg moog ua.

¹²“Mej yuav tawm huv lub nroog Npanpiloos moog zoo sab hlo, luas yuav coj mej tawm kaaj sab lug huv lub nroog ntawd moog. Tej roob hab tej pov roob yuav tsaa suab hu nkauj, hab tej xyoob tej ntoo yuav qw zoo sab.

¹³Ntoo cab yuav luj hlub tuaj hloov ntoo xuavpaug chaw, hab ntoo tsw qaab yuav tuaj huv haav xuavpaug. Tej nuav yuav ua rua suavdlawg ncu ntsoov, hab ua lub cim ncu txug kuv kws yog tug TSWV tug kws tau ua tej nuav moog ibtxhis le.”