Read Hmong Njua Yaxayas 58 Bible Online

Yaxayas 58 - Hmong Njua bible

Yaxayas 58

¹Tug TSWV has tas, “Ca le qw kuas kawg koj tug zug! Hab qha rua kuv tsaav tuabneeg Yixalayees kuas puab paub txug puab tej kev txhum!

²Puab pehawm kuv txhua nub, puab ua txuj kub sab lug xaav paub kuv txujkev hab ua lawv le kuv tej kevcai. Puab thov kuas kuv muab txujkev ncaaj nceeg rua puab, puab txhaj txaus sab pehawm kuv.”

³Cov pejxeem nug has tas, “Yog tug TSWV tsi pum, vim le caag peb tsua ua kevcai yoo mov? Yog nwg tsi quavntsej, vim le caag yuav ca peb yoo tshaib tsi noj dlaabtsi?” Tug TSWV teb puab has tas, “Yeej muaj tseeb, rua qhov nub kws mej ua kevcai yoo mov, mej tsuas ua kuas mej tau ntsejmuag hab mej tsimtxom cov tuabneeg kws ua num rua mej xwb.

⁴Qhov tseeb, mej ua kevcai yoo mov yog ua kuas mej tau ua kev phem hab kuas tau kev sis tshe sis ntaus xwb. Mej xaav has tas mej ua le ntawd, kuv yuav noog mej tej lug thov nua los?

⁵Thaus mej ua kevcai yoo mov tsimtxom mej, mej nyo taubhau ib yaam le dlaim nplooj, muab ntaub tsaaj hab muab tshauv pua mej pw. Ua le ntawd mej hu ua kevcai yoo mov hab xaav has tas kuv yuav txaus sab rua tej ntawd nua los?

⁶“Txuj kevcai yoo mov kws kuv txaus sab yog le nuav: yuavtsum tshem tej kev tsimtxom kws zoo le txuj saw hlau, txu txujkev tsi ncaaj kws zoo le tug quabtwg, hab tso cov tuabneeg kws raug tsimtxom tawm moog.

⁷Faib mej tej zaub mov rua cov tuabneeg tshaib plaab noj hab qheb qhovrooj rua cov tuabneeg pluag kws tsi muaj tsev nyob. Pub rig tsho rua cov tuabneeg txomnyem tau naav, hab yuavtsum paab mej tej kwvtij.

⁸“Ces kuv txujkev kaaj yuav ci rua mej ib yaam le lub nub ci thaus sawv ntxuv, hab mej tej qhov txhaab yuav zoo sai. Kuv yuav nrug nraim mej nyob ua mej tug Cawmseej hab kuv lub fwjchim yuav tsomkwm puagncig mej.

⁹Ces thaus mej thov, tug TSWV yuav teb mej; thaus mej hu kuas nwg paab, nwg yuav teb has tas, ‘Kuv nyob ntawm nuav.’ “Yog mej tso txujkev tsimtxom kws zoo le tug quabtwg, tug cwjpwm kws taw teg nki rua luas, hab tej lug phem lug qas tseg;

¹⁰yog mej pub zaub mov rua cov tuabneeg tshaib plaab noj, hab paab cov tuabneeg txomnyem. Ces tej kev tsaus ntuj kws nyob puagncig mej yuav hloov ua lub teeb ci rua mej pum kev ib yaam le thaus taav su.

¹¹Kuv yuav ua tug coj mej kev moog ibtxhis, hab pub txhua yaam zoo rua mej kuas txaus mej sab. Kuv yuav pub mej muaj zug hab noj qaab nyob zoo. Mej yuav zoo ib yaam le lub vaaj kws muaj dlej ywg tsi tseg, hab ib yaam le tug dlej kws ndlwg tsi paub nqhuab le.

¹²Mej tsaav tuabneeg yuav rov txhim khu tej vaaj tse kws thaus u tub puamtsuaj taag lawm, hab yuav rov ua vaaj ua tsev rua tej qub chaw. Luas yuav hu mej has tas, yog cov tuabneeg kws txhim khu ntsaa yeej dlua tshab, hab yog cov khu tej vaaj tse kws tub puamtsuaj taag lawm.”

¹³Tug TSWV has tas, “Yog mej ceev nub Xanpataus ua nub dlawbhuv hab nub ntawd mej tsi ua tej yaam lawv le mej lub sab nyam; hab yog mej fwm kuv nub kws dlawbhuv tsi xob taug kev, tsi xob ua num, hab tsi xob has lug phem,

¹⁴ces mej txhaj yuav tau kev kaaj sab, vim mej noog kuv lug. Kuv yuav kuas txhua tsaav tuabneeg huv qaab ntuj nuav fwm mej. Mej yuav zoo sab heev rua lub tebchaws kws kuv muab pub rua mej yawmkoob Yakhauj lawm. Kuv yog tug TSWV kws has tej lug nuav.”