Read Hmong Njua Yaxayas 59 Bible Online

Yaxayas 59 - Hmong Njua bible

Yaxayas 59

¹Tsi xob xaav has tas tug TSWV txhais npaab tuab lu txhaj paab tsi tau mej dlim lossis nwg laag ntseg lawm, nwg txhaj tsi nov mej tej lug thov!

²Tub yog vim mej tej kev txhum, nwg txhaj tsi nov mej tej lug thov. Thaus mej pehawm Vaajtswv, mej tej kev txhum quas mej hab Vaajtswv lawm.

³Mej muaj txim, vim mej has lug dlaag, mej ua limham hab tua tuabneeg.

⁴Mej moog kom luas rua huv tsev tu plaub, tabsis mej tsi ua ncaaj, mej has lug dlaag kuas mej kovyeej luas. Mej tuav tswvyim phem ua kuas luas lwm tug swb.

⁵Mej lub tswvyim phem zoo le tug naab muaj taug cov qai, yog muab lub qai ntawd tsoo, ces naab yeej tawm huv lug.

⁶Tabsis mej tej tswvyim ntawd tsi muaj qaabhau dlaabtsi, tsuas zoo le muab kaab laug tsuv tej saab lug ntus ua ntaub xwb.

⁷Mej naj nub tuav tswvyim ua phem, hab nyag kev ntshis moog ua txhum. Mej lub sab xaav ntsoov qhov phem xwb, mej moog txug qhov twg muaj kev puamtsuaj txug qhov ntawd.

⁸Mej moog txug qhov twg, cov tuabneeg kws nyob qhov ntawd tsi muaj kev kaaj sab le. Tej kws mej ua puavleej tsi ncaaj hab mej taug txujkev nkhaus xwb. Txhua tug kws taug txujkev nkhaus yuav raug puamtsuaj.

⁹Cov pejxeem has tas, “Nwgnuav peb paub has tas, vim le caag Vaajtswv tsi paab peb dlim ntawm cov tuabneeg kws tsimtxom peb. Peb nrhav txujkev kaaj taug, tabsis tsuas tau txujkev tsaus xwb,

¹⁰hab peb maub moog kev ib yaam le tej tuabneeg dligmuag. Txawm yog taav su nrig los peb dlawm qaug puj poog ib yaam le maub mo ntuj, hab ib yaam le peb nyob huv tubtuag teb kws tsaus ntuj nti.

¹¹Peb ntshai hab poob sab heev. Peb tog ntsoov Vaajtswv lug paab kuas peb dlim ntawm txujkev tsimtxom hab ua tsi ncaaj, tabsis nwg tsi lug paab.

¹²“Tug TSWV, peb tau ua txhum ntau kawg rua koj lawm. Peb tej kev txhum kom peb rua koj. Nwgnuav peb pum peb tej kev txhum lawm:

¹³Peb tau ntxeev sab rua koj, tso koj tseg, hab tsi ua lawv le koj txuj kevcai. Peb tsimtxom luas hab tso koj tseg. Tej kws peb xaav los yeej tsi tseeb hab tej lug kws peb has yog lug dlaag xwb.

¹⁴Peb muab txujkev ncaaj nceeg ntab tawm, hab txujkev ua zoo nyob nrug dleb peb. Peb dlawm txujkev tseeb qaug rua huv plawv nroog, hab ua sab dlawb sab zoo tsi tau chaw nyob.

¹⁵Nyob huv peb cov Yixalayees, kev ncaaj nceeg muaj tsawg kawg le. Yog leejtwg tso kev phem tseg mas nwg tseem raug luas tsimtxom hab.” Tug TSWV pum tej nuav, nwg txhaj tsi txaus sab, vim tsi muaj tuabneeg ua ncaaj lawm.

¹⁶Tug TSWV xaav tsi thoob, ua le caag tsi pum muaj leejtwg paab cov tuabneeg kws raug luas tsimtxom. Yog le ntawd nwg txhaj yuav siv nwg lub fwjchim paab kuas puab dlim, hab nwg yuav kovyeej tej tuabneeg phem ntawd.

¹⁷Nwg yuav muab kev ncaaj nceeg lug ua lub tsho hlau naav hab muab txujkev cawm dlim lug ua lub mom hlau ntoo. Nwg muab kev pauj lug ua lub tsho ntev naav, hab muab kev sab kub lug qhwv nwg lub cev.

¹⁸Tug TSWV yuav rau txim rua nwg cov yeebncuab lawv le tej kws puab tau ua lug lawm, txawm yog cov tuabneeg kws nyob tej tebchaws dleb los tug TSWV yuav rau txim huv tuabsi.

¹⁹Txhua tug kws nyob saab nubtuaj moog ti saab nubpoob yuav ntshai nwg lub fwjchim kws luj kawg nkaus. Nwg yuav lug ib yaam le dlej fuam, hab ib yaam le cua dlaaj cua dlub ntsawj.

²⁰Tug TSWV has rua nwg tsaav tuabneeg has tas, “Kuv yuav lug rua huv lub nroog Yeluxalees, cawm mej hab thaiv mej txhua tug kws tso kev txhum tseg lawm.

²¹Hab kuv yuav coglug rua mej le nuav: kuv muab kuv lub fwjchim hab kuv tej lug qha cob rua mej moog ibtxhis, hab txij nub nua moog mej yuavtsum fwm kuv, qha mej cov mivnyuas hab mej tej xeebntxwv kuas txawj fwm kuv moog ibtxhis.”