Read Hmong Njua Yaxayas 60 Bible Online

Yaxayas 60 - Hmong Njua bible

Yaxayas 60

¹Lub nroog Yeluxalees, ca le sawv, vim qhov kaaj tub lug rua koj, hab tug TSWV tug tshwjchim ci ntsaa ab lug rua sau koj lawm.

²Kev tsaus ntuj roog taagnrho lub nplajteb, hab kev tsaus ntuj dlub ncab npug txhua tsaav tuabneeg, tabsis tug TSWV yuav ua qhov kaaj lug rua koj pum kev, hab luas yuav pum nwg tug tshwjchim kws ci ntsaa ab sau koj.

³Txhua tsaav tuabneeg yuav lug rua huv koj txujkev kaaj, hab tej vaajntxwv yuav lug rua huv tug dluab tshaav ntuj kws nyavnyuas tawm nub tshab.

⁴Ca le tsaa qhovmuag saib puagncig koj, hab saib tej kws taabtom tshwmsim lug: koj tsaav tuabneeg taabtom sis sau ua ke yuav rov lug tsev! koj cov tub yuav taug kev dleb rov lug; Luas yuav puag koj cov ntxhais ib yaam le puag mivnyuas lug.

⁵Thaus koj pum tej nuav, koj yuav zoo sab kawg le, koj lub sab yuav tshee nyo hab zoo sab kawg nkaus. Puab yuav nqaa lwm tsaav tuabneeg tej nyaj lug rua koj; tej nyaj hab txhua yaam hlaa havtxwv lug cuag koj.

⁶Yuav muaj ntau paab ntxhuav lug tim tebchaws Midias hab tebchaws Efas lug nyob puv nkaus huv koj lub tebchaws. Cov nxhuav ntawd yuav thauj kub hab tshuaj tsw qaab huv tebchaws Senpas tuaj rua koj. Tuabneeg yuav pav txug txujxuv zoo kws tug TSWV tau ua lawm rua suavdlawg noog.

⁷Luas yuav coj cov tuabneeg Kedas hab cov tuabneeg Nenpayaus tej yaaj tuaj rua koj tua ua khoom fij, hab muab hlawv rua sau lub thaaj kuas hum tug TSWV sab. Tug TSWV yuav ua kuas nwg lub Tuamtsev muaj koob meej dlua qub.

⁸Cov nkoj kws txawj yaa ib yaam le tej fuab hab txawj yaa ib yaam le tej nquab kws yaa lug rua huv zeg ntawd yog cov twg?

⁹Cov nkoj ntawd tuaj ntawm tej tebchaws kws nyob dleb tuaj, yog xaa Vaajtswv tsaav tuabneeg lug tsev. Puab thauj nyaj hab kub lug pub rua tug TSWV kws yog cov Yixalayees tug Vaajtswv dlawbhuv kuas tau koob meej. Vaajtswv ua kuas ib tsoom tebchaws fwm nwg tsaav tuabneeg.

¹⁰Tug TSWV has rua Yeluxalees has tas, “Cov tuabneeg txawv tebchaws yuav puab koj tej ntsaa yeej, hab puab cov vaajntxwv yuav ua koj cov tubkhai; vim kuv chim kuv txhaj rau txim rua koj, tabsis vim kuv taabncuab koj, kuv txhaj hlub koj.

¹¹Koj tej roojvaag yuav qheb taag nub taag mo; kuas txhua tsaav tuabneeg tej vaajntxwv txhaj tau kev coj puab tej nyaj tuaj rua koj.

¹²Tsaav tuabneeg twg lossis lub tebchaws twg kws tsi kaam ua koj tubkhai, yuav raug kev puamtsuaj; puab tej tebchaws yuav raug muab tso tseg nyob qhuav nkuag ca.

¹³“Lenpanoos lub koob meej yuav lug rua koj, nwg tej ntoo thuv, ntoo npeb hab ntoo cab yuav raug txav lug txhim khu kuv lub tuamtsev kuas zoo nkauj, hab kuv yuav ua kuas kuv lub nroog Yeluxalees ci ntsaa ab.

¹⁴Cov tuabneeg kws tsimtxom koj, puab tej tub yuav tuaj pe koj, hab cov tuabneeg kws saib tsi taug koj, yuav tuaj txhus caug ntawm koj xubndlag pe koj. Puab yuav hu koj has tas, ‘Tug TSWV lub Nroog,’ hab hu has tas, ‘Xi-oos yog cov Yixalayees tug Vaajtswv kws dlawbhuv lub Nroog.’

¹⁵“Luas yuav tsi ntxub koj lossis tso koj tseg ua lub nroog kws nyob lwj sab hab qhuav nkuag ca ib zag le lawm. Kuv yuav ua kuas koj vaammeej hab zoo nkauj. Koj yuav yog qhov chaw kws tuabneeg nyob kaaj sab lug moog ibtxhis.

¹⁶Txhua tsaav tuabneeg hab tej vaajntxwv yuav yug koj ib yaam le leej nam pub mig rua nwg tug mivnyuas, koj yuav paub has tas kuv yog tug TSWV kws cawm koj dlim; hab kuv yog cov Yixalayees tug Vaajtswv kws muaj Fwjchim Luj kawg nkaus paab koj dlim.

¹⁷“Kuv yuav muab kub lug hloov tooj lab, muab nyaj hab tooj lab lug hloov hlau hab ntoo; hab yuav muab hlau lug hloov pobzeb rua koj. Koj tej numtswv yuav tsi quab yuam koj ntxiv lawm, kuv yuav kuas puab kaav ncaaj nceeg hab kuas muaj kev thaajyeeb.

¹⁸Tuabneeg yuav tsi nov tej suab sis ntaus sis tua nyob huv koj lub tebchaws; koj lub tebchaws yuav tsi raug kev puamtsuaj ntxiv lawm. Tabsis kuv yuav tiv thaiv koj ib yaam le tug ntsaa yeej, koj yuav qhuas kuv, rua qhov kuv tub paab koj dlim lawm.

¹⁹“Nruab nub lub nub yuav tsi ci rua koj lossis mo ntuj lub hli yuav tsi ci rua koj lawm; tabsis kuv kws yog koj tug TSWV yuav ci ntsaa ab kaaj nrig rua koj moog ibtxhis, kuv tug tshwjchim yuav ci ntsaa ab rua sau koj.

²⁰Koj lub nub yuav tsi poob qho, hab koj lub hli yuav tsi tsaus ntxiv lawm. Vim tug TSWV yuav ua lub teeb ci rua koj pum kev moog ibtxhis, hab koj tej kev nyuaj sab tub yuav xaus.

²¹Koj tsaav tuabneeg yuav ua ncaaj, puab yuav tau lub tebchaws lug ua puab tug moog ibtxhis. Kuv tsim puab, kuv cog puab kuas puab qha kuv lub fwjchim rua suavdlawg.

²²Tsev tuabneeg kws tsawg yuav dlhau moog ua ib xeem, hab xeem kws tsawg yuav dlhau moog ua ib tsaav tuabneeg kws muaj fwjchim. Kuv yog tug TSWV, kuv yuav ua kuas tej nuav muaj lug sai sai ntaag!”