Read Hmong Njua Yaxayas 61 Bible Online

Yaxayas 61 - Hmong Njua bible

Yaxayas 61

¹Tug TSWV kws kaav txhua yaam tug ntsujplig lug kaav kuv lub sab, rua qhov tug TSWV tau xaiv kuv coj txujmoo zoo moog qha rua cov tuabneeg pluag, hab moog nplig cov tuabneeg kws muaj kev lwj sab, qha txujkev dlim rua cov kws raug luas nteg, hab qha kev thaajyeeb rua cov tuabneeg raug txim.

²Nwg khaiv kuv moog qha kuas suavdlawg paub has tas tub txug lub sijhawm kws tug TSWV yuav cawm nwg tsaav tuabneeg, hab nwg ntaus yeej puab cov yeebncuab lawm. Nwg khaiv kuv moog nplig txhua tug kws muaj kev quaj ntsuag

³hab muab kev zoo sab pauj kev quaj ntsuag, rua cov tuabneeg kws nyob huv lub nroog Xi-oos, muab kev zoo sab hab kev kaaj sab pauj kev lwj sab, muab zaaj nkauj kws hu qhuas tug TSWV pauj kev txomnyem nyuaj sab. Puab yuav zoo ib yaam le tsob ntoo kws tug TSWV cog tseg. Puab yuav ua ncaaj ua nceeg, mas suavdlawg yuav qhuas Vaajtswv, vim tej num zoo kws nwg tau ua.

⁴Puab yuav rov txhim khu tej qub nroog kws puamtsuaj taag lawm, hab rov khu tej chaw kws muab tso tseg tau ntau tam dlhau lug lawm dlua tshab.

⁵Cov tuabneeg txawv tebchaws yuav yug mej tej tsaj, laij mej tej teb hab tu mej tej vaaj txiv maab;

⁶luas yuav hu mej has tas yog tug TSWV cov povthawj, hab hu mej has tas yog cov kws tuav Vaajtswv teg num. Mej yuav tau txhua tsaav tuabneeg tej nyaj, hab mej yuav khaav ntxhas rua luas tej nyaj kws mej tau lug ntawd.

⁷Mej txujkev txaajmuag hab kev poob ntsejmuag tub dlhau lawm. Mej yuav tau nyob huv mej lub tebchaws. Mej yuav tau nyaj hab txhua tsaav yaam ib npaug ntxiv; hab mej yuav zoo sab moog ibtxhis le.

⁸Tug TSWV has tas, “Vim kuv nyam txujkev ncaaj nceeg, kuv ntxub txujkev ua tubsaab hab ua kev txhum kawg le. Vim kuv yog tug kws ncaaj nceeg kuv yuav muab nqe zug rua kuv tsaav tuabneeg, hab kuv yuav coglug rua puab moog ibtxhis le.

⁹Kuv tsaav tuabneeg yuav tau koob meej ntawm ib tsoom tebchaws, txhua tug kws pum puab yuav paub has tas puab yog tsaav tuabneeg kws kuv foom koob moov rua lawm.”

¹⁰Yeluxalees zoo sab heev rua tej kws tug TSWV tau ua lawm. Nwg zoo le tug nkauj nyaab hab nraug vauv kws naav tau cev tsoog moog rua huv rooj tshoob. Vaajtswv yuav muab kev cawm dlim hab kev muaj yeej rua nwg naav.

¹¹Ib yaam le tej noob qoob kws muab tseb lawm, yeej yuav tuaj taug kaug. Tug TSWV kws kaav ib puas tsaav yaam yuav cawm nwg tsaav tuabneeg, hab txhua tsaav tuabneeg yuav qhuas tug TSWV.