Read Hmong Njua Yaxayas 62 Bible Online

Yaxayas 62 - Hmong Njua bible

Yaxayas 62

¹Vim Xi-oos, kuv yuav tsi nyob tuabywv; hab vim lub nroog Yeluxalees, kuv yuav tsi nyob ntsag tu moog txug thaus nwg txujkev ncaaj nceeg ci le dluab nub thaus sawv ntxuv, hab nwg txujkev cawm dlim ci le teg tsau thaus tsaus ntuj.

²Yeluxalees, txhua tsaav tuabneeg yuav pum koj txujkev muaj yeej, hab txhua tug vaajntxwv yuav pum koj tau koob meej, hab luas yuav hu koj lub npe tshab kws tug TSWV muab rua koj.

³Koj yuav yog lub mom kub kws zoo nkauj heev ntawm tug TSWV txhais teg, hab yog lub mom vaajntxwv kws nyob ntawm koj tug Vaajtswv lub xibteg.

⁴Luas yuav tsi hu koj has tas, “Raug tso povtseg,” hab koj lub tebchaws yuav tsi raug muab tso tseg nyob qhuav nkuag ca. luas yuav hu koj has tas, “Kuv txujkev zoo sab nyob huv nwg,” hab yuav hu koj lub tebchaws has tas, “Sis yuav zoo sab,” vim tug TSWV txujkev zoo sab nyob huv koj, mas koj yuav zoo le leej txiv rua lub tebchaws.

⁵Ib tug tub hluas yuav ib tug nkaujxwb ua quaspuj le caag, mas tug kws tsim koj yuav koj ib yaam le ntawd, tug nraug vauv txaus sab rua nwg tug quaspuj le caag, mas koj tug Vaajtswv txaus sab rua koj npaum le ntawd ntaag.

⁶Yeluxalees, kuv ca cov tuabneeg faajxwm nyob sau koj tej ntsaa yeej, tsi has nruab nub hab mo ntuj, puab has tsi tseg rua tug TSWV, kuas ncu ntsoov nwg tej lug cog tseg, hab tsi pub kuas tug TSWV tso puab tseg ib zag le.

⁷Puab yuav tsi pub tug TSWV moog su txug thaus nwg txhim khu lub nroog Yeluxalees tav, hab ua kuas tau lub nroog rua txhua tsaav tuabneeg qhuas.

⁸Tug TSWV tau coglug tseg hab yuav ua kuas tav lawv le nwg has: “Kuv yuav tsi pub mov rua mej coj moog yug mej cov yeebncuab ntxiv lawm, hab cov tuabneeg txawv tebchaws yuav tsi haus tej cawv txiv maab kws mej ua tau.

⁹Tabsis koj yog tug cog hab yog tug sau tej qoobloo ntawd; koj yuav tau noj tej ncuav ntawd hab ua Vaajtswv tsaug. Koj yog tug npaaj hab sau tej txiv maab lug ua ke, koj yuav tau tej txiv maab ntawd hab cawv txiv maab lug haus nyob huv kuv lub tuamtsev.”

¹⁰Cov tuabneeg huv lub nroog Yeluxalees, mej ca le moog kuas dlhau plawg cov roojvaag, rhawv kev rua cov pejxeem taug; ca le ncaws txuj nam kev luj, khaws tej pobzeb huv plawv kev povtseg, hab tsaa chij rua txhua tsaav tuabneeg pum.

¹¹Tug TSWV tshaajtawm rua txhua tsaav tuabneeg has tas, “Mej ca le qha rua cov tuabneeg huv lub nroog Yeluxalees has tas, ‘Tsaa qhovmuag saib, mej txujkev cawm dlim tub lug lawm lauj!’ Nwg coj nqe zug lug rua cov tuabneeg kws nwg tub cawm dlim lawm.”

¹²Luas yuav hu mej has tas, “Vaajtswv tsaav tuabneeg kws dlawbhuv, tsaav Tuabneeg kws Vaajtswv Cawm dlim.” Luas yuav hu lub nroog Yeluxalees has tas, “Lub Nroog kws Vaajtswv hlub,” hab “Yog Lub Nroog Kws Vaajtswv Tsi Muab Tso Tseg le.”