Read Hmong Njua Yaxayas 63 Bible Online

Yaxayas 63 - Hmong Njua bible

Yaxayas 63

¹“Tug kws tuaj huv lub nroog Npauxelas kws nyob huv tebchaws Edoos tuaj yog leejtwg? Tug kws naav cev rig tsho lab kws taug kev khov kho tuaj ntawd yog leejtwg?” Tub yog tug TSWV kws muaj fwjchim cawm tau tuabneeg dlim, taabtom tuaj qha nwg txujkev muaj yeej lawm.

²“Vim le caag tug TSWV cev rig tsho txhaj lab zoo le tug txivneej kws tsuj txiv maab ua cawv cev rig tsho?”

³Tug TSWV teb has tas, “Kuv muab txhua tsaav tuabneeg tsuj ib yaam le tsuj txiv maab, mas tsi muaj leejtwg tuaj paab kuv le. Kuv chim kuv txhaj tsuj puab, hab puab tej ntshaav txaws lu kuv cev rig tsho taag.

⁴Tub txug lub sijhawm kws kuv cawm kuv tsaav tuabneeg; hab rau txim rua puab cov yeebncuab lawm.

⁵Kuv tsaa qhovmuag saib puagncig, tsi muaj leejtwg tuaj paab kuv, mas kuv xaav tsi thoob le. Tabsis vim kuv txujkev chim, ua rua kuv muaj zug heev, kuv txhaj kovyeej.

⁶Vim kuv txujkev chim, kuv txhaj muab txhua tsaav tuabneeg lug tsuj paim pis txua. Kuv muab puab cov ntshaav laub rua huv aav.”

⁷Kuv yog Yaxayas, kuv qha tug TSWV txujkev hlub kws tsi paub kawg; kuv qhuas nwg vim tej kws nwg tau ua rua peb taag lug lawm. Nwg foom koob moov nplua mag rua cov Yixalayees, rua qhov nwg muaj txujkev hlub moog ibtxhis.

⁸Tug TSWV has tas, “Puab yog kuv tsaav tuabneeg; puab yuav tsi dlaag kuv ib zag le.” Yog le ntawd, nwg txhaj cawm puab

⁹kuas puab dlim ntawm puab tej kev txomnyem. Tub yog tug TSWV tso nwg tug timtswv lug cawm puab ntaag. Vim nwg txujkev hlub hab kev ua sab ntev, nwg txhaj tso puab dlim. Nwg yeej ibtxwm tsomkwm puab thaus u lug,

¹⁰tabsis puab ntxeev sab rua nwg hab ua rua nwg tug ntsujplig dlawbhuv tu sab; yog le ntawd nwg txhaj ua yeebncuab rua puab hab tawmtsaam puab.

¹¹Tabsis puab ncu txug txheej thaus u, tam kws tug TSWV tug tubkhai Mauxes nyob, puab txhaj nug has tas, “Nwgnuav tug TSWV kws cawm nwg tsaav tuabneeg cov thawjcoj kws hlaa havtxwv lug nyob qhov twg? Tug TSWV kws pub nwg tug ntsujplig rua Mauxes nyob qhov twg?

¹²Tug TSWV kws has kuas Mauxes ua tej txujci tseemceeb qha nwg lub fwjchim rua suavdlawg pum, nwg muab havtxwv faib rua ob saab, ua kev rua nwg tsaav tuabneeg taug lug, kuas nwg tau ntsejmuag moog ibtxhis nyob twg lawm?”

¹³Vim tug TSWV coj puab kev lug, puab kutaw muab nplua ib yaam le tej neeg qus, hab puab tsi qaug le.

¹⁴Tug TSWV coj nwg tsaav tuabneeg moog su ib yaam le luas coj tej tsaj moog rua lub haav kws muaj zaub mog nyoos. Nwg coj nwg tsaav tuabneeg kev, nwg lub npe txhaj muaj koob meej.

¹⁵Tug TSWV, thov tsaa qhovmuag sau ntuj saib tuaj rua peb, sau ntuj yog koj qhov chaw nyob dlawbhuv kws muaj koj tug tshwjchim ci ntsaa ab. Koj txujkev hlub hab mob sab rua peb nyob qhov twg lawm? Koj tsi xaam muaj peb le lawm los? Tug TSWV, thov koj tsi xob muab peb tso tseg.

¹⁶Tug TSWV, koj txhaj yog peb txiv. Txawm yog Anplahaas hab Yakhauj obtug yog peb yawmkoob los obtug yeej tsi paub txug peb le. Tabsis tug TSWV, tsuas yog koj tuab leeg kws yog peb txiv, koj txhaj yog tug kws ibtxwm paab peb dlim xwb.

¹⁷Vim le caag koj ca peb yuam kev ua tsi lawv le koj txujkev lawm? Vim le caag koj ca peb tawv ncauj ua luaj, peb txhaj tso koj tseg lawm? Thov tig lug saib koj cov tubkhai hab koj tsaav tuabneeg.

¹⁸Peb yog koj tsaav tuabneeg kws dlawbhuv, peb raug yeebncuab lawv tawm moog ib ntus hab peb cov yeebncuab muab koj lub chaw kws dlawbhuv ua puamtsuaj taag.

¹⁹Koj ua rua peb ib yaam le koj yeej tsi tau kaav peb dlua, hab ib yaam le peb tsi yog koj tsaav tuabneeg le ntaag.