Read Hmong Njua Yaxayas 65 Bible Online

Yaxayas 65 - Hmong Njua bible

Yaxayas 65

¹Tug TSWV has tas, “Kuv tog rawv yuav teb kuv tsaav tuabneeg tej lug thov, tabsis puab tsi thov kuv le. Kuv tog rawv puab lug cuag kuv, tabsis puab tsi kaam lug le hab. Txawm yog kuv has tas, ‘Kuv nyob ntawm nuav yuav paab mej’ los puab tsi kaam thov kuv le.

²Kuv naj nub tog ntsoov kuv cov tuabneeg kws muaj lub sab tawv, tabsis puab pheej moog ua txhum lawv le puab lub sab nyam.

³Puab tsi paub txaajmuag, puab txhaj ua kuas kuv chim. Puab muab khoom moog fij rua dlaab huv puab tej vaaj tseemceeb hab hlawv tej moov tshuaj tsw qaab rua sau tej thaaj txi dlaab.

⁴Mo ntuj puab nkaag moog rua huv tej qhov tsua hab tej qhov ntxaa, moog saablaaj rua cov tuabneeg kws tuag lawm tej plig. Puab noj nqaj npuas hab haus tej kua nqaj kws muab fij rua dlaab lawm.

⁵Hab puab tseem has rua luas has tas, ‘Txaav dleb ntawm peb, vim peb huv dlua mej.’ Cov kws has le nuav, kuv ntxub kawg le. Kuv txujkev chim raug puab, mas zoo ib yaam le lub cubtawg kws cig tsi paub tuag.

⁶“Tub muaj lug sau tseg lawm has tas, kuv yuav tsi zaam txim rua puab le, tabsis kuv yuav ua pauj rua puab,

⁷kuv yuav rau txim rua puab tej kev txhum hab puab cov yawmkoob tej kev txhum huv tuabsi, rua qhov puab tau moog hlawv moov tshuaj tsw qaab rua sau tej roob rhuav kuv ntsejmuag. Yog le ntawd kuv txhaj yuav rau txim kuas txaus nkaus rua tej kev phem kws puab ua lug lawm.” Tug TSWV yog tug has le ntawd.

⁸Tug TSWV has tas, “Tsi muaj ib tug twg muab tej txiv maab zoo ua kuas puamtsuaj le; tabsis tsuas yog muab tej txiv maab ntawd lug ua cawv haus xwb. Ib yaam le ntawd, kuv yuav tsi ua rua puab raug kev puamtsuaj, vim puab yog kuv cov tubkhai kws ua kuv teg num.

⁹Kuv yuav foom moov zoo rua cov Yixalayees kws yog xeem Yudas, mas puab caajceg yuav tau kuv lub tebchaws kws muaj roob muaj haav lug ua puab tug. Cov tuabneeg kws kuv xaiv lug ua kuv cov tubkhai yuav tau nyob huv lub tebchaws ntawd.

¹⁰Puab yuav pehawm kuv hab yuav coj puab tej yaaj tej nyuj moog noj zaub huv lub taj Saloos kws nyob saab nubpoob hab huv lub Haav Covnyom kws nyob saab nubtuaj.

¹¹“Tabsis mej cov kws tau tso kuv tseg, mej tsi ncu txug kuv lub Roob Xi-oos kws dlawbhuv, mej teeb thaaj teev tug mlom Nkas, hab tug mlom Menis kws yog cov vaajtswv ntawm txuj moov zoo hab moov phem.

¹²Mej yuav tau qhov phem, mej yuav tuag rua nav ntaaj nav rag, vim thaus kuv hu, mej tsi teb hab thaus kuv has mej tsi noog. Mej too hauv li moog ua kev phem, vim mej tsi noog kuv lug.

¹³Kuv has rua mej has tas, cov tubkhai kws fwm kuv hab noog kuv lug, yuav muaj noj muaj haus nplua mag, tabsis mej yuav tshaib nqhes. Kuv cov tubkhai yuav zoo sab heev, tabsis mej yuav poob ntsejmuag.

¹⁴Kuv cov tubkhai yuav hu nkauj zoo sab, tabsis mej yuav quaj lwj sab ntsuav.

¹⁵Cov tuabneeg kws kuv xaiv tseg lawm, yuav tuav mej lub npe foom tsi zoo, kuv yog tug TSWV kws kaav ib puas tsaav yaam, kuv yuav muab mej tua povtseg; tabsis kuv yuav muab cov tuabneeg kws noog kuv lug tis dlua npe tshab.

¹⁶Cov tuabneeg kws nyob huv lub tebchaws nuav thov koob moov, yuavtsum thov ntawm Vaajtswv tug kws muaj kev ncaaj nceeg. Yog leejtwg yuav coglug, yuavtsum tuav Vaajtswv tug kws muaj kev ncaaj nceeg lub npe cog. Mas mej txhaj tsi ncu txug tej kev txomnyem kws mej raug lug lawm.”

¹⁷Tug TSWV has tas, “Kuv yuav tsim dlua lub ntuj tshab hab lub nplajteb tshab, mej yuav tsi ncu txug tej kws tub muaj taag lug lawm.

¹⁸Mej ca le zoo sab rua tej kws kuv tsim dlua tshab ntawd moog ibtxhis. Cov tuabneeg kws nyob huv lub nroog Yeluxalees tshab kws kuv tsim yuav muaj kev zoo sab hab nyob kaaj sab lug.

¹⁹Kuv yuav zoo sab rua lub nroog Yeluxalees hab txaus sab kawg nkaus rua kuv tsaav tuabneeg; yuav tsi nov suab quaj suab nyav nyob huv lub nroog ntawd ib zag ntxiv le lawm.

²⁰Nyob huv lub nroog ntawd cov mivyuas mog yuav tsi muaj kev pluj kev tuag, hab txhua tug tuabneeg yuav muaj sa nyob ntev. Cov tuabneeg kws muaj noobnyoog ib puas xyoo los tseem zoo le tug hluas. Yog leejtwg tuag ua ntej ntawd, ces yog kuv rau txim rua nwg xwb.

²¹Cov tuabneeg ua tsev, yuav tau nyob huv tej tsev ntawd, tsi muaj lwm tug tau nyob. Puab yuav cog txiv maab hab yuav tau haus tej cawv txiv maab ntawd, tsi yog lwm tug yuav tau haus. Kuv tsaav tuabneeg yuav muaj noobnyoog nyob ntev ib yaam le tej ntoo. Puab yuav zoo sab rua txhua yaam kws puab txhais teg ua tau lug.

²³Txhua yaam kws puab ua yeej yuav tav, hab puab tej mivnyuas yuav tsi raug kev puamtsuaj. Kuv yuav foom koob moov rua puab hab puab cov xeebntxwv ib tam dlhau ib tam moog ibtxhis le.

²⁴Thaus puab tseem thov kuv tsi tau xaus, kuv tub teb puab lawm.

²⁵Maa hab mivnyuas yaaj yuav nrhav noj ua ke, tsuv ntxhuav yuav noj quavnyaab ib yaam le nyuj noj, tuabneeg hab tsaj yuav tsi ntshai naab ntxiv lawm. Sau kuv lub Roob Xi-oos kws dlawbhuv, yuav tsi muaj tej xwm phem dlaabtsi lawm.”