Read Hmong Njua Yaxayas 66 Bible Online

Yaxayas 66 - Hmong Njua bible

Yaxayas 66

¹Tug TSWV has tas, “Ntuj ceebtsheej yog kuv lub zwmtxwv, nplajteb yog kuv lub chaw tag taw. Mej yuav ua lub tsev zoo le caag rua kuv nyob, hab qhov chaw kws kuv nyob yuav zoo le caag?

²Kuv yog tug kws tsim lub ntuj hab lub nplajteb nuav taagnrho huv tuabsi! Kuv txaus sab heev rua cov tuabneeg kws txu fwjchim, cov tuabneeg kws hloov dlua sab tshab, cov tuabneeg kws fwm kuv hab noog kuv lug.

³“Tuabneeg ua lawv le puab lub sab nyam xwb. Puab tua ib tug txiv nyuj hab tua ib tug tuabneeg hlawv fij los puab suav has tas zoo ib yaam; puab tua ib tug mivnyuas yaaj hab muab ib tug dlev luv cejdlaab hlawv fij los puab suav has tas zoo ib yaam; puab muab nplej hab ntshaav npua fij los puab suav has tas zoo ib yaam; puab hlawv tshuaj tsw qaab hab pe mlom los puab suav has tas zoo ib yaam. Puab nyam ua kev phem kev qas xwb.

⁴Yog le ntawd, kuv yuav tso tej sub tawg sub ntshaa kws puab ntshai lug raug puab, rua qhov thaus kuv hu tsi muaj leejtwg teb, thaus kuv has tsi muaj leejtwg noog. Puab txhobtxwm tsi noog kuv lug hab moog ua phem nkaus xwb.”

⁵Mej cov kws ntshai hab fwm tug TSWV, ca le noog nwg tej lug nuav: “Rua qhov mej muab sab npuab kuv, mej cov tuabneeg muaj qee leej txhaj le ntxub mej hab tsi kaam nrug mej sis raug zoo. Puab thuam mej has tas, ‘Ca tug TSWV ua nwg tej txujci rua mej pum hab cawm kuas mej dlim, peb xaav pum mej txujkev zoo sab kawg le.’ Tabsis puab yuav poob ntsejmuag!

⁶Ua tuab zoo noog! Tej suab nrov ntsoog qeeg huv nroog, hab lub suab kws nrov huv lub Tuamtsev tuaj, tub yog tug TSWV rau txim rua nwg cov yeebncuab ntaag!

⁷“Kuv lub nroog kws dlawbhuv zoo ib yaam le tug quaspuj kws yug tau mivnyuas sai heev, tsi nov mob plaab le tub yug tau nwg tug tub lawm.

⁸Puas muaj leejtwg nov lossis tau pum dlua ib zag le? Puas muaj ib tsaav tuabneeg twg kws tuab nub xwb, txawm yuav ca le sawv ua tau ib lub tebchaws? Lub nroog Xi-oos yuav fuamvaam sai ua ib tsaav tuabneeg, nwg yuav tsi tau tiv kev txomnyem ntxiv lawm.

⁹Mej tsi xob xaav has tas kuv coj kuv tsaav tuabneeg lug txug lub caij yug puab los kuv tseem tsi tau pub yug.” Tug TSWV yog tug kws has tej lug nuav ntaag.

¹⁰Mej cov kws nyam lub nroog Yeluxalees, ca le nrug lub nroog Yeluxalees zoo sab, hab txaus sab rua nwg! Mej cov kws quaj ntsuag rua lub nroog Yeluxalees, mej ca le nrug nwg zoo sab!

¹¹Mej yuav zoo sab rua lub nroog Yeluxalees txujkev vaammeej, ib yaam le tug mivnyuas kws txaus sab tau noj nwg nam lub mig.

¹²Tug TSWV has tas, “Kuv yuav coj kev vaammeej lug rua mej moog ibtxhis, txhua tsaav tuabneeg tej nyaj yuav ndlwg laub lug lug rua mej ib yaam le tug dlej ndlwg tsi paub nqhuab le. Mej yuav zoo le tug mivnyuas kws leej nam puag rawv huv xubndlag noj mig, mas nwg hlub kawg le.

¹³Kuv yuav nplig mej sab huv lub nroog Yeluxalees ib yaam le leej nam nplig nwg cov mivnyuas sab.

¹⁴Thaus mej pum tej xwm nuav tshwmsim lug, mej yuav zoo sab; qhov ntawd yuav ua rua mej muaj zug hab noj qaab nyob zoo. Ces mej txhaj yuav paub has tas kuv yog tug TSWV kws paab cov tuabneeg noog kuv lug, hab kuv chim rua kuv cov yeebncuab.”

¹⁵Tug TSWV yuav nrug nplaim tawg ua ke lug. Nwg yuav caij rawv cua dlaaj cua dlub lug, hab nwg yuav rau txim rua tug kws ua rua nwg chim.

¹⁶Tug TSWV yuav tso suavtawg hab ntaaj lug rau txim rua txhua tsaav tuabneeg nyob huv nplajteb kws nwg pum has tas ua txhum, mas tej tuabneeg yuav raug tua tuag coob kawg le.

¹⁷Tug TSWV has tas, “Cov tuabneeg kws ua kevcai ntxuav kuas puab huv moog pe dlaab rua huv tej vaaj txi dlaab, noj nqaj npuas, noj tsuag, hab noj tej zaub mov kws kuv txwv tsi pub noj, yuav raug kev puamtsuaj taag.

¹⁸Kuv yeej paub tej num kws puab ua, hab tej kws puab lub sab xaav. Kuv yuav sau txhua tsaav tuabneeg lug ua ke. Thaus puab lug txhij lawm, puab yuav pum kuv lub fwjchim,

¹⁹hab paub has tas kuv yog tug kws txav txim rua puab. “Tabsis kuv yuav tseg qee leej nyob hab khaiv puab moog qha txhua tsaav tuabneeg hab tej tebchaws dleb dleb kws tsi tau nov kuv lub npe hab tsi tau pum dlua kuv lub fwjchim, hab moog rua tim tebchaws Xapees, tebchaws Linpias hab tebchaws Lidias kws muaj cov tuabneeg txawj tua neevnti, hab huv tebchaws Thunpas hab peg tebchaws Kilis. Puab yuav moog qha kuv lub fwjchim kws luj rua huv cov tebchaws ntawd.

²⁰Puab yuav coj mej cov kwvtij tawm huv txhua lub tebchaws rov lug rua kuv. Puab yuav coj mej cov kwvtij caij neeg, caij zaag, caij ntxhuav, caij tsheb neeg ua rog hab caij tsheb nyuj lug rua ntawm kuv lub roob dlawbhuv, ib yaam le cov Yixalayees muab moov nplej ntim rua huv tej taig phab kws ntxuav huv lawm, hab yuav coj moog fij rua huv lub Tuamtsev.

²¹Kuv yuav tsaa puab qee leej ua povthawj hab ua cov Levis, tug TSWV has le ntawd.”

²²Tug TSWV has tas, “Kuv lub fwjchim yuav tuav lub ntuj tshab hab lub nplajteb tshab kuas nyob ruaj, mas mej caajceg hab mej lub npe yuav nyob ruaj khov ib yaam le ntawd.”

²³Tug TSWV has tas, “Txhua nub Hli Xab hab nub Xanpataus, mas txhua tsaav tuabneeg yuav tuaj pehawm kuv huv lub nroog Yeluxalees nuav.

²⁴Thaus puab tawm moog, puab yuav pum cov tuabneeg kws ntxeev sab rua kuv tej cev tuag. Cov kaas kws noj puab tej cev yuav tsi tuag, hab yuav tsi muaj leejtwg tua tau tej suavtawg kws kub puab ntawd le. Tej cev tuag ntawd yuav qas thoob nplajteb.”