Read Hmong Njua Yaxayas 8 Bible Online

Yaxayas 8 - Hmong Njua bible

Yaxayas 8

¹Tug TSWV has rua kuv tas, “Koj ca le moog muab ib dlaim txag ntoo luj lug hab sau tej tug tsaj ntawv luj has le nuav: ‘Maaj Nrooj Moog Fuab, Ceev Nrooj Moog Txeeb.’

²Hab kuas Uliyas kws yog tug povthawj hab Yenpelekhiyas tug tub Xakaliyas kws yog ob tug tuabneeg kws mej ca sab rua, lug nrug ua timkhawv.”

³Tau tsi ntev tom qaab nuav kuv tug quaspuj txawm xeeb tub. Thaus yug tau wb tug tub, tug TSWV has rua kuv tas, “Koj tis nwg lub npe hu ua ‘Maaj Nrooj Moog Fuab, Ceev Nrooj Moog Txeeb.’

⁴Ua ntej tug mivtub nuav txawj hu ‘Nam’ lossis ‘Txiv’, tej txhaab nyaj kws nyob huv lub nroog Damaxes hab tej khoom kws fuab tau huv lub nroog Xamalis lug, yuav raug tug vaajntxwv kws kaav tebchaws Axilias tuaj nqaa moog taag huv tuabsi.”

⁵Vaajtswv has dlua ib zag ntxiv.

⁶Nwg has tas, “Vim cov tuabneeg nuav tsi leeg paub tug dlej Silau-as kws ndlwg ntsag tu, hab ntshai Vaajntxwv Lexees hab Vaajntxwv Pekas tshee nyo.

⁷Kuv kws yog tug TSWV yuav coj tug Dlej Efalates tuaj tawmtsaam puab, nwg muaj zug hab coob kawg le, nwg yog tug vaajntxwv kws kaav tebchaws Axilias hab taagnrho nwg cov tubrog; nwg yuav ndlwg thoob plawg tej kwj hab fuam puv nkaus ntug;

⁸nwg yuav ndlwg moog thoob plawg lub tebchaws Yudas, yuav nyaab ntaa yeeg txij nkaus xubpwg hab nyaab txhua tsaav yaam huv tuabsi.” Tabsis Vaajtswv, thov nthuav koj ob phob tis roog taagnrho koj lub tebchaws.

⁹Txhua tsaav tuabneeg, mej ca le ntshai hab tuaj txoos ua ke los mas! Tej tebchaws kws nyob dleb, mej ca le noog! Mej npaaj rawv tog tawmtsaam, tabsis mej ntshai heev! Yog tag, mej yeej npaaj kuas txhij, tabsis mej ntshai kawg!

¹⁰Ca le npaaj tswvyim, tabsis yuav ua tsi tav. Mej yuav ua tsi tau le mej has, rua qhov Vaajtswv nrug nraim peb.

¹¹Tug TSWV has rua kuv thaus nwg txhais teg kws muaj fwjchim tuav nkaus kuv, nwg ceebtoom kuas kuv tsi xob nrug cov tuabneeg nuav taug puab txujkev. Nwg has tas,

¹²“Tsi xob koom nrug cov tuabneeg kws tuavhuv ua phem hab tsi xob ntshai tej kws puab ntshai.

¹³Koj yuavtsum ncu ntsoov has tas, kuv yog tug TSWV kws muaj Fwjchim Luj kawg nkaus, kuv yog tug dlawbhuv, kuv tuab leeg txhaj yog tug kws koj yuavtsum ntshai.

¹⁴Rua qhov kuv yog tug dlawbhuv kawg nkaus; kuv yuav yog lub pobzeb kws cov Yudas hab cov Yixalayees dlawm qaug. Hab nwg yuav ua ib rooj ntaa npuj caws tog cov tuabneeg kws nyob huv lub nroog Yeluxalees.

¹⁵Muaj ntau leej dlawm qaug; puab yuav qaug ua rua puab nqaj ndluag ntshaav nrug, puab yuav maag rooj ntaa npuj hab lub vuj hlua.”

¹⁶Mej cov kws yog kuv cov thwjtim, mej yuavtsum ceev hab khaws tej lug saamfwm kws Vaajtswv muab cob rua kuv ntawd.

¹⁷Kuv yuav nyob tog tug TSWV, txawm yog nwg zais nwg lub ntsejmuag tsi pub Yakhauj tsev tuabneeg pum los kuv tseem tso sab plhuav rua nwg.

¹⁸Kuv nyob ntawm nuav nrug cov mivnyuas kws tug TSWV muab pub rua kuv. Tug TSWV kws muaj Fwjchim Luj kawg nkaus lub zwmtxwv nyob sau lub Roob Xi-oos, nwg khaiv peb lug ua cim rua cov Yixalayees.

¹⁹Tabsis cov tuabneeg yuav kuas mej ca le moog nug cov tuabneeg saib moov hab saib yaig kws puab has lug tujtawg. Puab yuav has tas, “Puas tsimnyog cov pejxeem moog tuavxaam nrug puab tej vaajtswv hab moog tuavxaam nrug cov tuabneeg tuag kuas paab cov tuabneeg caj?”

²⁰Mej yuavtsum teb puab has tas, “Noog tej lug kws tug TSWV qha rua mej xwb! Tsi xob noog cov tuabneeg txawj saib yaig tej lug, tej kws puab qha yuav tsi muaj dlaabtsi zoo rua mej.”

²¹Cov pejxeem yuav taug kev moog thoob plawg lub tebchaws, tsi muaj kev ca sab hab tshaib plaab qaug quas zig. Thaus puab tshaib plaab hab puab chim, puab yuav foom phem rua puab tug vaajntxwv hab puab tej vaajtswv. Puab yuav tsaa qhovmuag saib sau ntuj

²²lossis saib huv aav, tabsis tsuas pum muaj kev nyuaj sab hab kev tsaus ntuj xwb. Luas yuav lawv puab tsiv moog rua huv qhov tsaus ntuj nti kws ua rua puab ntshai heev. Puab yuav tsiv tsi dlim tej kev txomnyem ntawd ib zag le.