Read Hmong Njua Yaxayas 9 Bible Online

Yaxayas 9 - Hmong Njua bible

Yaxayas 9

¹Txawm le ntawd los yuav tsi muaj kev nyuaj sab rua cov tuabneeg kws tub raug kev txomnyem lug lawm. Yaav taag lug nwg tau coj kev txaajmuag lug rua xeem Xenpuloos lub tebchaws hab xeem Nathalis lub tebchaws, tabsis yaav tom ntej nuav moog, txij ndlua ntawm ntug Havtxwv Meditelanees saab nubtuaj moog txug ncua lub tebchaws kws nyob saab ntug dlej Yauladees tim u, hab peg Kalilais kws cov tuabneeg txawv tebchaws nyob, nwg yuav ua kuas puab rov tau ntsejmuag.

²Cov tuabneeg kws taug kev tsaus ntuj nti, tau pum kev kaaj nrig. Puab nyob huv lub tebchaws kws tsaus ntuj nti, nwgnuav tshaav ntuj ci kaaj nrig rua puab lawm.

³Tug TSWV, koj ua rua puab muaj kev zoo sab heev, tub yog koj pub puab tau zoo nyob kaaj sab lug. Puab txhua tug zoo sab kawg rua tej kws koj tau ua, ib yaam le cov tuabneeg kws zoo sab thaus sau qoobloo, lossis zoo sab ib yaam le thaus faib tej kws moog txeeb tau lug.

⁴Rua qhov koj tub muab tug quabtwg kws tsuam puab xubpwg, hab muab tug nplawm kws luas nplawm puab nrausqaum luv lawm.

⁵Txhua nkawm khau kws cov tubrog rau hab puab cov rig tsho kws lu ntshaav yuav muab sau huv tuabsi coj moog hlawv.

⁶Muaj ib tug mivnyuas tub lug yug huv peb cov lawm! Vaajtswv muab ib tug tub pub rua peb! Hab nwg yuav ua tug kaav peb, nwg lub npe yuav hu ua, “Tug Tuavxaam kws muaj Txujci.” “Vaajtswv tug muaj Fwjchim,” “Vaaj Leej Txiv tug kws Nyob Moog Ibtxhis,” “Vaajntxwv tug kws muaj kev thaajyeeb.”

⁷Nwg kev tswjfwm yuav nthuav luj zuj zug hab kev thaajyeeb yuav muaj tsi paub kawg, nyob sau Daviv lub zwmtxwv hab thoob plawg nwg lub tebchaws. Txij nuav moog, nwg yuav txhim khu lub tebchaws, hab tswjfwm moog rua qhov tseeb, hab coj ncaaj nceeg moog ibtxhis tsi kawg. Tug TSWV kws muaj Fwjchim Luj kawg nkaus txav txim sab yuav ua lawv le tej nuav.

⁸Tug TSWV txav txim rua Yakhauj cov xeebntxwv hab lub tebchaws Yixalayees.

⁹Txhua tug tuabneeg yuav paub zaaj nuav, cov Efalayees hab cov tuabneeg kws nyob huv lub nroog Xamalis khaavtheeb has tas,

¹⁰“Tej thwvcib tub pob taag lawm, tabsis peb yuav muab tej pobzeb lug txhim rua, muab tej nqaaj ntoo xikamaus txav povtseg taag lawm, tabsis peb yuav muab tej nqaaj ntoo thuv kws khov heev lug hloov.”

¹¹Tug TSWV tshoov puab cov yeebncuab sab kuas tuaj tawmtsaam puab.

¹²Cov Xilias kws nyob saab nub tuaj hab cov Filitees kws nyob saab nubpoob rua puab tej qhovncauj tuaj nqog tsaav tuabneeg Yixalayees. Txawm muaj le ntawd los Vaajtswv tseem chim rua puab, hab nwg txhais teg tseem rau txim rua puab tsi tseg.

¹³Txawm yog tug TSWV kws muaj Fwjchim Luj kawg nkaus tub rau txim rua cov Yixalayees lawm los puab tseem tsi zeem hab tsi tig rov lug cuag tug TSWV le.

¹⁴Tug TSWV yuav ua ib nub txav cov Yixalayees tej taubhau, tej kutwv, tej nplooj toovlaaj hab nplooj tauj kuas taag huv tuabsi povtseg.

¹⁵Tug tuabneeg laug hab tug muaj meejmom yog lub taubhau, hab cov cevlug kws qha tej lug dlaag yog tug kutwv!

¹⁶Cov tuabneeg kws coj tsoom pejxeem nuav tub yog cov coj puab yuam kev, hab txhua tug kws puab coj puavleej raug luas nqog huv tuabsi lawm.

¹⁷Vim le ntawd, tug TSWV txhaj tsi zoo sab rua puab cov tub hluas, hab nwg yuav tsi hlub cov mivnyuas ntsuag hab cov puj ntsuag, rua qhov txhua tug puavleej tsi fwm tug TSWV hab muaj lub sab phem kawg le, hab tej lug kws puab has puavleej yog lug phem xwb. Vim yog muaj tej nuav tug TSWV txhaj chim hab nwg txhais teg tseem rau txim tsi tseg rua puab.

¹⁸Cov tuabneeg ua phem tej kev txhum cig ib yaam le lub cub suavtawg, kub tej ntoo xuavpaug hab maab xuavpaug, hab tej toj roob hauv peg nchu paa auv nab.

¹⁹Vim tug TSWV kws muaj Fwjchim Luj kawg nkaus chim heev, lub tebchaws txhaj raug kub nyab, tej tuabneeg txhaj zoo le cov roj kws raug suavtawg kub; tsi muaj leejtwg yuav cawm tau nwg tej kwvtij le.

²⁰Cov pejxeem thoob tebchaws xawb txhua tsaav yaam lug noj, tabsis tsi tsau puab plaab, puab tseem rov noj puab tej mivnyuas!

²¹Cov Manaxes tawmtsaam cov Efalayees hab cov Efalayees tawmtsaam cov Manaxes; hab ob paab nuav sis sau tawmtsaam cov Yudas. Vim tej nuav tug TSWV txhaj chim heev, hab nwg txhais teg tseem rau txim tsi tseg le.