Read Hmong Njua Levis Kevcai 1 Bible Online

Levis Kevcai 1 - Hmong Njua bible

Levis Kevcai 1

¹Tug TSWV hu Mauxes ntawm tug TSWV lub Tsevntaub sis ntsib has tas,

²koj has rua cov Yixalayees hab qha rua puab has tas, Thaus leejtwg coj tsaj tuaj tua hlawv fij, nwg yuavtsum coj ib tug nyuj lossis ib tug yaaj lossis ib tug tshis tuaj fij hab.

³Yog nwg coj ib tug nyuj tuaj tua hlawv fij, nwg yuavtsum coj tug nyuj kws tsi muaj ib qho phem hlo le. Nwg yuavtsum caab tuaj rua ntawm tug TSWV lub Tsevntaub sis ntsib, tug TSWV txhaj txaus sab txais yuav.

⁴Nwg yuavtsum tsaa teg rua sau tug nyuj lub taubhau, tug nyuj ntawd txhaj yuav ua tau khoom theej txhoj tshem nwg lub txim.

⁵Ces nwg muab tug nyuj ntawd tua taabmeeg tug TSWV, hab Aloos cov tub kws yog cov povthawj yuav muab cov ntshaav coj moog fij rua tug TSWV hab muab coj moog laub ywg thoob plawg lub thaaj kws nyob ntawm tug TSWV lub Tsevntaub sis ntsib lub qhovrooj.

⁶Ces nwg muab tug tsaj ntawd laws tawv hab muab txav ua tej thooj,

⁷hab cov povthawj muab tawg coj moog teeb rua sau lub thaaj hab tis suavtawg rua.

⁸Ces Aloos cov tub kws yog cov povthawj maam le muab cov nqaj kws txav ua tej thooj, lub taubhau, hab cov roj moog tso rua sau cov tawg kws teeb sau lub thaaj.

⁹Tug tuabneeg ntawd yuavtsum muab dlej ntxuav tej plaab nyuv, sab ntsws hab ob cegqaab, ces tug povthawj maam le muab hlawv huv tuabsi rua sau lub thaaj ua khoom fij theej txhoj. Tej paa khoom fij nuav yuav tsw qaab ntxag ua rua tug TSWV txaus sab.

¹⁰Yog leejtwg muab nwg ib tug yaaj lossis ib tug tshis tuaj ua khoom fij, mas nwg yuavtsum muab tug txiv kws tsi muaj ib qhov phem hlo le xwb.

¹¹Nwg yuavtsum muab tug tsaj ntawd tua rua ntawm lub thaaj fij saab peg, hab cov povthawj muab cov ntshaav coj moog laub ywg thoob plawg lub thaaj huv tuabsi.

¹²Hab nwg muab tug tsaj ntawd txav ua tej thooj, ces tug povthawj maam le muab lub taubhau hab cov roj moog tso rua sau cov tawg kws teeb rua sau lub thaaj.

¹³Tabsis tug ntawd yuavtsum muab dlej ntxuav tej plaab nyuv hab ob cegqaab, hab tug povthawj muab coj moog fij rua tug TSWV hab muab hlawv fij taagnrho rua sau lub thaaj. Tej khoom kws fij nuav tej paa yuav tsw qaab ntxag ua rua tug TSWV txaus sab.

¹⁴Yog leejtwg muab noog tuaj tua hlawv ua khoom fij, tug noog ntawd yuavtsum yog ib tug nquab taug lossis nquab nyeg.

¹⁵Tug povthawj yuav coj tug noog ntawd moog rua ntawm lub thaaj, muab lub cejdlaab ntswj kuas tu, hab muab lub taubhau hlawv rua sau lub thaaj. Yuavtsum ca cov ntshaav ndlwg lug ywg lub thaaj.

¹⁶Nwg yuav tau muab lub txa dlawj povtseg rua ntawm lub thaaj saab nubtuaj kws yog qhov chaw nchuav cov tshauv.

¹⁷Nwg tuav ob saab tis dlua kuas tug noog lub cev ndluag, tabsis tsi xob dlua ob saab tis kuas tu, hab muab tug noog ntawd hlawv kuas taagnrho rua sau lub thaaj. Tej paa yuav tsw qaab ntxag ua rua tug TSWV txaus sab.