Read Hmong Njua Levis Kevcai 10 Bible Online

Levis Kevcai 10 - Hmong Njua bible

Levis Kevcai 10

¹Aloos ob tug tub, Nadas hab Anpihus obtug ib leeg nqaa ib laujkaub ncaig tawg kws muaj thee cig ntsaa thuav, muab moov tshuaj tsw qaab tso rua hab coj moog fij rua tug TSWV, tabsis cov ncaig tawg ntawd tsi dlawbhuv, rua qhov tug TSWV tsi tau kuas obtug coj cov khoom ntawd moog fij.

²Taamsim ntawd tug TSWV txawm tso suavtawg lug kub kag obtug tuag taabmeeg tug TSWV.

³Ces Mauxes has rua Aloos has tas, “Ntawm nuav yog tej lug kws tug TSWV tau has tseg ca lawm has tas, ‘Cov kws ua kuv teg num yuavtsum saib taug kuv kws yog tug dlawbhuv; hab kuv yuav qha kuv tug tshwjchim rua kuv tsaav tuabneeg.’ ” Tabsis Aloos nyob tuabywv, tsi has ib lu lug le.

⁴Mauxes hu Aloos tug txiv ntxawm Uxiyees ob tug tub, Mixayees hab Exafas kuas tuaj cuag nwg hab nwg has rua obtug has tas, “Meb ca le lug ntawm nuav hab coj meb ob tug kwvtij ob lub cev tawm huv lub Tsevntaub tseemceeb nuav moog tso rua saab nrau ntug yeej.”

⁵Yog le ntawd, obtug txhaj lug muab khaub dluag qhwv ob lub cev tuag hab coj moog tso rua saab nrau ntug yeej lawv le Mauxes tau has rua obtug.

⁶Ces Mauxes has rua Aloos hab Aloos ob tug tub Ele-axas hab Ithamas has tas, “Tsi xob ca mej cov plaubhau ntxhuv nyo lossis dlua mej tej rig tsho kuas luas paub has tas mej muaj kev quaj ntsuag. Yog mej ua le ntawd, mej yuav tuag hab tug TSWV yuav chim rua ib tsoom pejxeem suavdlawg. Tabsis tso rua ib tsoom Yixalayees lug ua cov quaj nyav hab paam ob tug tuag kws tug TSWV tso suavtawg lug kub tuag ntawd.

⁷Tsi xob tawm dlhau ntawm tug TSWV lub Tsevntaub sis ntsib lub qhovrooj moog rua saab nrau, yog mej tawm, mej yuav raug tua tuag, rua qhov tub muab tug TSWV cov roj txhawb meejthawj pleev mej lawm.” Puab txawm ua lawv le Mauxes has ntawd.

⁸Tug TSWV has rua Aloos has tas,

⁹“Tom qaab kws koj hab koj cov tub haus cawv txiv maab lossis haus cawv ntsim lawm, mej tsi xob moog huv kuv lub Tsevntaub sis ntsib; yog mej moog rua huv, mej yuav tuag. Nuav yog txuj kevcai rua koj hab koj cov xeebntxwv yuavtsum coj moog ibtxhis le.

¹⁰Koj yuavtsum paub saib qhov twg yog Vaajtswv tug hab qhov twg yog mej tug, paub qhov twg huv hab qhov twg tsi huv.

¹¹Koj yuavtsum muab tej kevcai kws kuv kuas Mauxes muab rua koj nuav qha rua ib tsoom Yixalayees suavdlawg.”

¹²Mauxes has rua Aloos hab Aloos ob tug tub kws yog Ele-axas hab Ithamas kws tseem ua neej nyob has tas, “Muab cov moov nplej seem kws fij rua tug TSWV ntawd zuaj ua ib cov ncuav tsi xyaw keeb hab coj moog noj tom lub thaaj ib saab rua qhov yog cov khoom fij kws dlawbhuv heev.

¹³Tej khoom kws fij rua tug TSWV, feem twg yog koj hab koj cov tub tug, mej ca le coj moog noj huv qhov chaw dlawbhuv. Rua qhov tug TSWV tau saamfwm rua kuv le ntawd lawm.

¹⁴Tabsis lub hauv nrob hab cegqaab kws muab yom fij rua tug TSWV, koj coj moog hau noj huv qhov chaw dlawbhuv, koj hab koj cov tub cov ntxhais nrug koj noj, rua qhov cov khoom fij ua kev sis raug zoo kws cov Yixalayees coj tuaj fij ntawd, yog koj hab koj cov tub tug.

¹⁵Puab yuavtsum nqaa cegqaab hab lub hauv nrob tuaj thaus lub sijhawm kws puab nqaa cov roj tuaj hlawv fij rua tug TSWV. Cegqaab hab lub hauv nrob yog koj hab koj cov mivnyuas tug moog ibtxhis lawv le tug TSWV tau has tseg lawm.”

¹⁶Mauxes nug txug tug tshis kws muab tua fij dlaws txim, puab qha has tas, puab tub muab tug tshis ntawd hlawv taag lawm. Qhov nuav ua rua Mauxes chim heev rua Ele-axas hab Ithamas obtug, hab nwg nug has tas,

¹⁷“Vim le caag mej tsi coj cov khoom fij dlaws txim nuav moog noj huv qhov chaw dlawbhuv? Rua qhov yog yaam khoom fij dlawbhuv, hab tug TSWV tub muab rua mej coj moog fij dlaws cov pejxeem lub txim povtseg taabmeeg tug TSWV lawm.

¹⁸Txawm yog cov ntshaav los tub tsi pub nqaa moog rua huv Chaav Dlawbhuv huv lub Tsevntaub. Mej yuavtsum noj tej khoom nuav rua huv qhov chaw dlawbhuv lawv le kuv tub has rua mej lawm.”

¹⁹Aloos teb has tas, “Nub nua cov pejxeem coj puab tej khoom fij dlaws txim moog fij rua tug TSWV, hab puab coj puab tej khoom tuaj hlawv fij huv tuabsi, tabsis tseem muaj tej kev ntshai nuav tshwm lug rua kuv hab. Yog kuv ca le noj cov nqaj kws fij dlaws txim ntawd nub nua, puas yuav hum tug TSWV sab?”

²⁰Thaus Mauxes nov cov lug nuav, nwg kuj pum zoo lawv le Aloos has hab.