Read Hmong Njua Levis Kevcai 11 Bible Online

Levis Kevcai 11 - Hmong Njua bible

Levis Kevcai 11

¹Tug TSWV has rua Mauxes hab Aloos obtug has tas,

²Meb yuavtsum qha rua cov Yixalayees has tas, “Mej noj tau txhua yaam tsaj nruab nraag

³kws rau ncau ua ob saab hab yog cov tsaj zum zaub xwb.

⁴Txawm yog le caag los xij, cov tsaj kws zum zaub kws rau tsi ncau, muaj tej yaam mej tsi xob noj: mej tsi xob noj ntxhuav, ntxhuav yog tsaj zum zaub, tabsis rau tsi ncau hab tsi huv rua mej.

⁵Tsi xob noj loobtswb, loobtswb rau ncau tabsis tsi zum zaub, hab tsi huv rua mej.

⁶Hab tsi xob noj luav, luav yog tsaj zum zaub tabsis rau tsi ncau ua ob saab hab tsi huv rua mej.

⁷Tsi xob noj npua, npua tej rau ncau ua ob saab, tabsis npua tsi zum zaub hab tsi huv rua mej.

⁸Tsi xob noj cov tsaj nuav lossis kov cov tsaj nuav tug kws tuag lawm, cov tsaj ntawd tsi huv rua mej.

⁹“Mej noj tau txhua yaam ntseg nyob huv dlej kws muaj xab hab muaj khum,

¹⁰tabsis txhua yaam tsaj nyob huv dlej lossis huv havtxwv kws tsi muaj xab hab tsi muaj nplai, mej yuavtsum tsi xob noj.

¹¹Mej yuavtsum paub has tas, tej tsaj nuav yog hom tsaj tsi huv. Mej yuavtsum tsi xob noj lossis kov cov tsaj nuav, txawm yog nwg tuag lawm los xij.

¹²Mej yuavtsum tsi xob noj txhua yaam tsaj nruab dleg kws tsi muab xab hab tsi muaj nplai hlo le.

¹³“Mej tsi xob noj tej noog kws has nraag qaab nuav, rua qhov tej noog nuav yog tej noog tsi huv rua mej: dlaav dlub, plaas, dlaav qhuav, laj, loobnyuas, dlaav npoj, uab laag, noog ntxhuav, noog tsoo qwj, noog kaw, us dlej, noog noj ntseg, noog dlej, noog cov hauv hab puav.

²⁰“Tej kaab muaj tis kws siv plaub txhais teg taw nkaag yog tej kaab kws tsi huv,

²¹tsuas noj tau tej kaab muaj tis kws muaj plaub txhais teg taw hab dlha tau caws qa xwb.

²²Tej kaab kws mej noj tau mas yog: kooj, kooj txig, zagroj lossis kooj tshuab.

²³Tabsis tej kaab muaj tis kws miv dlua tej nuav hab muaj plaub txhais teg taw nkaag, puavleej yog tej kaab kws tsi huv.

²⁴“Yog leejtwg moog kov tej tsaj tuag le nraag nuav, nwg yuav tsi huv moog txug thaus tsaus ntuj: taagnrho tej tsaj kws muaj rau, tsi has cov kws rau tsi ncau ua ob saab hab zum zaub lossis tej tsaj kws muaj plaub tug rau hab muab lub tsawj teg moog kev los xij. Yog leejtwg moog kov tej tsaj nuav lub cev tuag, nwg yuavtsum hle nwg cev rig tsho moog ntxhua, tabsis nwg tseem tsi tau huv moog txug thaus tsaus ntuj hab.

²⁹“Tej tsaj kws nkaag sau npoo aav, yog tej tsaj kws tsi huv rua mej; tshwblag, tsuag, naab qaa tsav luj,

³⁰naab qaa dlej, naab qaa nqhuab, tsav, naab qaa xuabzeb hab naab qaa ntoo.

³¹Leejtwg kov cov tsaj nuav lossis cov tsaj nuav lub cev tuag, yuav ua rua nwg tsi huv moog txug thaus tsaus ntuj.

³²Hab yog cov tsaj nuav lub cev tuag poob rua sau ib yaam khoom twg, yaam khoom ntawd yuav tsi huv lawm hab. Tej khoom ntawd yog: ntoo, khaub dluag, tawv tsaj lossis naab tsaaj hab tej kws yog khoom siv huv tuabsi. Yuavtsum muab yaam khoom ntawd coj moog tsau dlej, yaam khoom ntawd yuav tsi huv moog txug thaus tsaus ntuj, tom qaab ntawd txhaj rov huv.

³³Yog tej tsaj ntawd poob rua huv tej laujkaub, txhua yaam kws nyob huv lub laujkaub ntawd tsi huv lawm. Mej ca le muab lub laujkaub ntawd tsoo povtseg.

³⁴Yog tej zaub mov kws yug ibtxwm noj, ntub cov dlej tsi huv kws laub huv lub laujkaub ntawd lug, ces tej zaub mov ntawd tsi huv lawm, hab txhua yaam kua kws nyob huv lub laujkaub los tsi huv ib yaam nkaus hab.

³⁵Txhua yaam kws tej tsaj tuag poob rua sau yaam ntawd tsi huv lawm, txawm yog qhovtxus lossis qhovcub, yuavtsum muab tsoo povtseg,

³⁶Tabsis lub qhovdlej txhawv lossis lub rhawv dlej tseem huv, tabsis txhua yaam kws moog chwv cov tsaj ntawd ib tug lub cev tuag, yaam ntawd txhaj tsi huv lawm xwb.

³⁷Yog cov tsaj ntawd ib tug poob rua sau tej noob qoob kws yuav coj moog cog, cov noob qoob ntawd tseem huv.

³⁸Tabsis yog tub muab cov noob qoob ntawd tsau dlej lawm, cov tsaj ntawd ib tug maam poob rua sau, ces cov noob qoob ntawd tsi huv lawm.

³⁹“Yog tej tsaj kws mej noj tau ib tug twg tuag, yog leejtwg moog kov tug tsaj tuag ntawd lub cev, ces tug ntawd tsi huv moog txug thaus tsaus ntuj.

⁴⁰Hab yog leejtwg hlais tug tsaj tuag ntawd lug ua noj, nwg yuavtsum hle nwg cev rig tsho moog ntxhua, hab nwg yuav tsi huv moog txug thaus tsaus ntuj; yog leejtwg moog kwv tej tsaj tuag los nwg yuavtsum hle nwg cev rig tsho moog ntxhua, hab nwg tsi huv moog txug thaus tsaus ntuj.

⁴¹“Mej yuavtsum tsi xob noj tej tsaj miv kws nkaag sau npoo aav,

⁴²tsi has tej kws ndlaug lossis siv plaub txhais teg taw moog kev lossis muaj ntau txhais teg taw.

⁴³Tsi xob ua rua mej lub cev tsi huv kws yog noj tej tsaj kws has lug sau nuav.

⁴⁴Kuv yog tug TSWV kws yog mej tug Vaajtswv, mej yuavtsum ua tuabneeg dlawbhuv, rua qhov kuv yog tug kws dlawbhuv. Mej tsi xob ua rua mej tsi huv vim tej tsaj miv miv kws nkaag sau npoo aav.

⁴⁵Kuv yog tug TSWV kws coj mej tawm nraag tebchaws Iziv lug, kuv txhaj yog mej tug Vaajtswv. Mej yuavtsum ua tuabneeg dlawbhuv, rua qhov kuv yog tug kws dlawbhuv.

⁴⁶“Ntawm nuav yog txuj kevcai kws has txug tej tsaj nruab nraag, tej noog, tej tsaj nruab dleg hab txhua yaam tsaj kws nkaag sau npoo aav.

⁴⁷Mej yuavtsum ceevfaaj, saib cov tsaj twg yog cov huv, hab cov tsaj twg yog cov tsi huv, cov tsaj twg yog cov tsimnyog noj, hab cov twg yog cov tsi tsimnyog noj.”