Read Hmong Njua Levis Kevcai 12 Bible Online

Levis Kevcai 12 - Hmong Njua bible

Levis Kevcai 12

¹Tug TSWV has rua Mauxes,

²kuas ca le qha rua cov Yixalayees has tas, tug quaspuj kws yug tau ib tug tub, ces nwg lub cev tsi huv xyaa nub, ib yaam le nwg coj khaub dluag ua rua nwg lub cev tsi huv.

³Hab nub yim, ca le muab tug mivtub ntawd ua kevcai txav tawv.

⁴Ces tug quaspuj ntawd yuavtsum caiv peb caug peb nub ntxiv maam le ua kevcai ntxuav qhov kws nwg nchuav cev ntawd; tabsis nwg yuavtsum tsi xob kov tej yaam kws dlawbhuv lossis tsi xob moog rua huv lub Tsevntaub kws dlawbhuv moog txug thaus kws nwg ua kevcai ntxuav taag tsaiv.

⁵Tabsis yog tug quaspuj ntawd yug tau ib tug ntxhais, ces nwg lub cev yuav tsi huv kaum plaub nub ib yaam le nwg coj khaub dluag ua rua nwg lub cev tsi huv; ces nwg yuavtsum caiv rau caum rau nub, maam le ua kevcai ntxuav qhov kws nwg nchuav cev ntawd.

⁶Thaus tug quaspuj ntawd yug tau tub lossis ntxhais, hab thaus nwg ua kevcai ntxuav taag lawm, nwg yuavtsum coj ib tug thaav yaaj noobnyoog ib xyoos moog rua tug povthawj ntawm tug TSWV lub Tsevntaub sis ntsib lub qhovrooj, muab tua hlawv ua khoom fij hab coj ib tug nquab taug lossis ib tug nquab nyeg moog fij dlaws txim.

⁷Tug povthawj yuav muab tug quaspuj ntawd tej khoom fij rua tug TSWV, hab ua kevcai ntxuav tug quaspuj ntawd tej kev tsi huv povtseg, nwg lub cev txhaj rov huv. Qhov nuav yog ib txuj kevcai rua tug quaspuj coj tom qaab kws yug mivnyuas taag, tsi has tub lossis ntxhais.

⁸Yog tug quaspuj ntawd txomnyem coj tsi tau ib tug thaav yaaj moog, nwg coj ob tug nquab taug lossis ob tug nquab nyeg moog xwb los tau, muab ib tug tua hlawv ua khoom fij hab muab ib tug fij dlaws txim, hab kuas tug povthawj ua kevcai ntxuav nwg tej kev tsi huv povtseg, nwg lub cev txhaj rov huv.