Read Hmong Njua Levis Kevcai 14 Bible Online

Levis Kevcai 14 - Hmong Njua bible

Levis Kevcai 14

²“Ntawm nuav yog txuj kevcai rua tug tuabneeg mob ruas, nub kws nwg ua kevcai ntxuav, yuavtsum coj nwg moog cuag tug povthawj,

³hab tug povthawj coj nwg moog rua nrau ntug yeej, tug povthawj tshuaj nwg. Yog nwg tej kaab mob zoo lawm,

⁴ces tug povthawj has kuas nwg nqaa ob tug noog kws tseem caj hab yog tej noog huv, nrug ib dlaim ntoo cab, ib txuj xuv paaj lab hab ib rev nplooj hixauv tuaj rua tug povthawj.

⁵Ces tug povthawj has kuas muab ib tug noog tua rua sau lub taig aav kws ntim cov dlej ntshab kws cug huv qhovdlej lug.

⁶Nwg muab dlua ib tug noog, nrug dlaim ntoo cab, txuj xuv paaj, hab rev nplooj ntoos hixauv coj moog raus rua huv tug noog kws muab tua lawm cov ntshaav huv lub taig.

⁷Tug povthawj yuavtsum muab cov ntshaav noog coj moog nchus rua tug tuabneeg kws nwg ua kevcai ntxuav nwg tej mob ruas xyaa zag. Ces tug povthawj qha rua nwg has tas nwg yog tug tuabneeg huv lawm. Tom qaab ntawd tug povthawj maam le muab tug noog kws tseem caj tso yaa moog rua tom taj nraag.

⁸Ces tug tuabneeg ntawd yuavtsum muab nwg tej khaub dluag coj moog ntxhua, chais nwg cov plaub povtseg hab dlaa dlej; ces nwg txhaj le yuav huv. Nwg txhaj moog tau rua huv yeej, tabsis nwg yuavtsum nyob ntawm nwg lub tsevntaub saab nrau xyaa nub.

⁹Nub xyaa nwg yuavtsum rov chais nwg cov plaubhau, cov fwjtxwv, cov plaub muag hab taagnrho tej plaub kws tuaj thoob plawg nwg lub cev; nwg yuavtsum ntxhua nwg tej rig tsho hab dlaa dlej, ces nwg txhaj le yuav huv.

¹⁰“Nub yim nwg yuavtsum coj ob tug thaav yaaj hab ib tug nwm yaaj noobnyoog ib xyoos kws tsi muaj ib qhov phem le hab tsib choj moov nplej kws ntse xyaw roj txiv ntoo hab ib nraab khob roj txiv ntoo tuaj.

¹¹Tug povthawj yuav coj tug tuabneeg ntawd hab cov khoom fij moog rua ntawm tug TSWV lub Tsevntaub sis ntsib lub qhovrooj.

¹²Ces tug povthawj muab ib tug thaav yaaj nrug ib khob roj txiv ntoo coj moog ua khoom fij dlaws txim. Nwg muab cov khoom ntawd coj moog yom fij rua tug TSWV, cov khoom ntawd muab rua tug povthawj.

¹³Tug povthawj yuavtsum muab tug thaav yaaj ntawd tua rua ntawm qhov chaw dlawbhuv kws ibtxwm tua tej tsaj fij dlaws txim hab hlawv fij. Tug povthawj yuavtsum ua le nuav, rua qhov cov khoom fij dlaws kev txhum zoo ib yaam le cov khoom fij dlaws txim kws puavleej yog tug povthawj tug hab yog yaam kws dlawbhuv heev.

¹⁴Ces tug povthawj yuavtsum muab mivntsiv ntshaav yaaj pleev tug tuabneeg kws tuaj ua kevcai ntxuav ntawd lub taubntseg saab xis, pleev rua tug taubteg saab xis hab tug taubtaws saab xis.

¹⁵Tug povthawj muab cov roj txiv ntoo laub mivntsiv rua huv nwg lub xibteg saab txhumphem,

¹⁶hab muab nwg tug ntivteg saab xis tub cov roj kws nyob huv nwg lub xibteg saab txhumphem, nchus taabmeeg tug TSWV xyaa zag.

¹⁷Tug povthawj muab cov roj huv nwg lub xibteg hab cov ntshaav yaaj coj moog pleev rua tug tuabneeg kws tuaj ua kevcai ntxuav ntawd lub taubntseg saab xis, pleev rua tug taubteg saab xis hab tug taubtaws saab xis.

¹⁸Tug povthawj yuavtsum muab cov roj kws seem huv nwg lub xibteg coj moog pleev rua sau tug tuabneeg ntawd lub taubhau. Qhov kws tug povthawj ua le nuav yog nwg ua kevcai ntxuav rua tug tuabneeg ntawd kuas huv taabmeeg tug TSWV.

¹⁹“Ces tug povthawj yuavtsum muab cov khoom fij dlaws txim coj moog fij hab ua kevcai ntxuav tug tuabneeg ntawd tej kev tsi huv povtseg kuas nwg huv. Tom qaab ntawd, tug povthawj yuavtsum muab tug tsaj lug tua hlawv fij

²⁰hab muab tug tsaj ntawd hlawv fij nrug tej moov nplej rua sau lub thaaj. Tug povthawj yuavtsum ua kevcai ntxuav le nuav, tug tuabneeg ntawd txhaj le yuav huv.

²¹“Yog tug tuabneeg ntawd pluag hab nwg coj tsi tau ib tug thaav yaaj tuaj tua yom fij rua tug TSWV dlaws nwg lub txim kws yog muab rua tug povthawj. Nwg tsuas nqaa ob choj moov nplej kws ntse xyaw roj txiv ntoo hab ib khob roj txiv ntoo tuaj ua khoom fij xwb.

²²Nwg yuavtsum nqaa ob tug nquab taug lossis ob tug nquab nyeg tuaj, muab ib tug tua fij dlaws txim hab muab ib tug tua hlawv fij.

²³Nub yim nwg yuavtsum coj tej khoom nuav tuaj cob rua tug povthawj ntawm tug TSWV lub Tsevntaub sis ntsib lub qhovrooj.

²⁴Ces tug povthawj maam le coj tug yaaj hab cov roj txiv ntoo moog yom fij rua tug TSWV, cov khoom ntawd muab rua tug povthawj.

²⁵Tug povthawj muab tug thaav yaaj tua hab muab mivntsiv ntshaav lug pleev tug tuabneeg kws ua kevcai ntxuav ntawd lub taubntseg saab xis, pleev rua tug taubteg saab xis hab tug taubtaws saab xis.

²⁶Ces tug povthawj muab mivntsiv roj txiv ntoo laub rua huv nwg lub xibteg saab txhumphem,

²⁷hab muab nwg tug ntivteg saab xis tub cov roj ntawd moog nchus taabmeeg tug TSWV xyaa zag.

²⁸Tug povthawj muab mivntsiv roj laub rua huv tuab qhov chaw kws nwg tso cov ntshaav, hab muab mivntsiv coj moog pleev tug tuabneeg kws ua kevcai ntxuav ntawd lub taubntseg saab xis, pleev rua tug taubteg saab xis hab nwg tug taubtaws saab xis.

²⁹Cov roj kws seem huv tug povthawj lub xibteg, yuavtsum muab pleev tug tuabneeg kws ua kevcai ntxuav ntawd lub taubhau hab ua kevcai ntxuav nwg lub txim taabmeeg tug TSWV.

³⁰Ces tug povthawj maam le muab ib tug nquab taug lossis ib tug nquab nyeg fij dlaws txim lawv le nwg muaj,

³¹muab ib tug tua dlaws txim hab muab dlua ib tug tua hlawv fij nrug cov moov nplej ua ke, hab tug povthawj ua kevcai ntxuav tug tuabneeg ntawd lub txim kuas huv taabmeeg tug TSWV.”

³²Qhov nuav yog txuj kevcai rua tug tuabneeg mob ruas kws txomnyem tsi muaj tej khoom moog fij lawv le kevcai.

³³Tug TSWV has rua Mauxes hab Aloos has tas,

³⁴“Thaus mej moog txug huv lub tebchaws Kana-aas kws kuv muab rua mej ua mej tug, yog kuv tso tej pwm lug rua huv lub tsev twg kws nyob huv lub tebchaws,

³⁵ces tug kws yog tug tswv tsev yuavtsum moog qha rua tug povthawj has tas, ‘Kuv pum muaj tej pwm tshwm rua huv kuv tsev.’

³⁶Ces tug povthawj kuas puab ntsaig tej khoom huv tsev tawm kuas taag ua ntej nwg moog tshuaj tej pwm ntawd. Dlua le ntawd, tej khoom kws nyob huv tsev yuav suav has tas yog khoom tsi huv. Ces tug povthawj yuav tau moog tshuaj lub tsev ntawd,

³⁷hab moog tshuaj saib qhov tuaj pwm. Yog cov pwm ntawd ca le ntsuab dlaaj lossis lab dlaaj lig hab tshwm moog noj tej phaab ntsaa lawm,

³⁸nwg yuavtsum tawm huv lub tsev ntawd moog hab laag qhovrooj ca xyaa nub.

³⁹Nub xyaa nwg maam le rov moog tshuaj lub tsev dlua ntxiv. Yog cov pwm fuam tuaj rua ntawm phaab ntsaa,

⁴⁰nwg yuavtsum has kuas muab cov pobzeb kws tuaj pwm ntawd dlawj moog povtseg rua tej qhov chaw tsi huv saab nrau ntug nroog.

⁴¹Tom qaab ntawd nwg yuavtsum muab taagnrho cov pwm ntawm phaab ntsaa saab huv nruab nrog kes tawm hab muab tej moov sib ntawd coj moog povtseg rua qhov chaw tsi huv saab nrau ntug nroog.

⁴²Ces muab dlua ib cov pobzeb lug txhaws rua cov qhov kws muab dlawj ntawd chaw, hab muab cov moov sib tshab lug pleev rua saab phaab ntsaa ntawd.

⁴³“Yog tej pwm ntawd rov tshwm tuaj tom qaab kws tub tshem cov pobzeb hab tub muab tej moov sib kws pleev lub tsev ntawd kes taag lawm,

⁴⁴tug povthawj rov moog tshuaj hab saib dlua, yog qhov tuaj pwm ntawd fuam tuaj dlua, lub tsev ntawd yeej tsi huv.

⁴⁵Yuavtsum muab lub tsev ntawd tsoo povtseg, hab muab tej pobzeb tej ntoo hab taagnrho tej moov sib kws xov lub tsev ntawd coj moog povtseg kuas taag rua ntawm qhov chaw tsi huv saab nrau ntug nroog.

⁴⁶Yog leejtwg moog rua huv lub tsev ntawd thaus kws laag qhovrooj lawm, mas tug ntawd yuav tsi huv moog txug thaus tsaus ntuj.

⁴⁷Yog leejtwg moog pw lossis moog noj mov huv lub tsev ntawd, nwg yuavtsum hle nwg cev rig tsho coj moog ntxhua.

⁴⁸“Yog has tas, thaus tug povthawj tuaj saib, tom qaab kws pleev tej moov sib tshab taag rua lub tsev ntawd tej qhov tuaj pwm tsi rov tuaj pwm lawm, tug povthawj qha has tas, lub tsev ntawd huv, rua qhov tej pwm tub pluj taag lawm.

⁴⁹Tug tswv tsev yuavtsum coj ob tug noog, ib dlaim ntoo cab, ib txuj xuv lab, hab ib rev nplooj hixauv moog ua kevcai ntxuav lub tsev ntawd.

⁵⁰Tug povthawj yuavtsum muab ib tug noog tua rua sau lub taig aav kws ntim cov dlej cag ntshab heev.

⁵¹Ces nwg muab dlaim ntoo cab, rev nplooj hixauv, txuj xuv lab hab tug noog kws tseem caj moog raus rua huv tug noog kws muab tua lawm cov ntshaav hab cov dlej ntshab. Tug povthawj muab nchus rua lub tsev ntawd xyaa zag.

⁵²Qhov kws nwg muab cov ntshaav noog, cov dlej ntshab, tug noog kws tseem caj, dlaim ntoo cab, rev nplooj hixauv hab txuj xuv lab lug ua le nuav, tub yog nwg ua kevcai ntxuav lub tsev ntawd kuas huv.

⁵³Ces nwg maam le muab tug noog kws tseem caj tso yaa huv lub nroog moog rua tom taj nraag. Nwg yuavtsum ua kevcai ntxuav lub tsev ntawd le nuav, lub tsev txhaj yuav huv.”

⁵⁴Tej nuav yog kevcai rua tej kaab mob kws yog mob ruas, mob cos txob,

⁵⁵tuaj pwm rua ntawm tej rig tsho lossis tej tsev,

⁵⁶hab o tuaj lossis tawg pleb lossis dlawb tej thaaj,

⁵⁷Tej kevcai nuav tsuas yog siv qha tej yaam kws huv hab tsi huv xwb.