Read Hmong Njua Levis Kevcai 15 Bible Online

Levis Kevcai 15 - Hmong Njua bible

Levis Kevcai 15

¹Tug TSWV has rua Mauxes hab Aloos has tas,

²“Meb qha rua cov Yixalayees has tas, thaus ib tug txivneej twg mob ua kua paug tawm huv nwg qhov chaw xis lug, mas nwg yog tuabneeg tsi huv lawm.

³Txawm yog cov kua paug ntawd tseem tawm lossis tu lawm los nwg lub cev yeej tsi huv.

⁴Lub txaaj kws tug tuabneeg mob ntawd pw hab txhua yaam kws nwg moog nyob sau, yaam ntawd tsi huv lawm.

⁵Txhua tug kws moog tuav tug mob ntawd lub txaaj,

⁶lossis moog nyob sau tej chaw kws tug mob ntawd nyob lawm, nwg yuavtsum hle nwg cev rig tsho moog ntxhua hab dlaa dlej, mas nwg tseem tsi huv moog txug thaus tsaus ntuj.

⁷Yog leejtwg kov tug tuabneeg mob ntawd hab nwg tej kua paug, nwg yuavtsum hle nwg cev rig tsho coj moog ntxhua hab dlaa dlej, mas nwg tseem tsi huv moog txug thaus tsaus ntuj.

⁸Yog has tas tug tuabneeg kws mob ntawd ntu quavncaug moog lu cov tuabneeg kws tub ua kevcai ntxuav lawm ib tug twg, tug ntawd yuavtsum hle nwg cev rig tsho moog ntxhua hab dlaa dlej, mas nwg tseem tsi huv moog txug thaus tsaus ntuj.

⁹Txhua lub eeb neeg kws tug tuabneeg mob ntawd caij lawm, lub eeb neeg ntawd tsi huv lawm.

¹⁰Txhua tug kws moog tuav tej yaam kws tug tuabneeg mob ntawd nyob, nwg yuav tsi huv moog txug thaus tsaus ntuj,

¹¹yog tug tuabneeg kws mob ntawd xub moog tuav tau ib leeg tug twg ua ntej, nwg tsi tau ntxuav teg, mas tug kws nwg tuav ntawd yuavtsum hle nwg cev rig tsho moog txhua hab dlaa dlej, mas nwg tseem tsi huv moog txug thaus tsaus ntuj.

¹²Txhua lub laujkaub kws tug tuabneeg mob ntawd kov lawm, yuavtsum muab tsoo povtseg, hab lub taig ntoo kws tug mob ntawd tuav, yuavtsum muab ntxuav kuas huv.

¹³“Tom qaab kws tug tuabneeg mob ntawd cov kua paug tu lawm, nwg yuavtsum tog xyaa nub, nwg maam hle nwg cev rig tsho txhua hab dlaa cov dlej cag kws ntshab, mas nwg lub cev txhaj yuav huv.

¹⁴Nub yim nwg yuavtsum coj ob tug nquab taug lossis ob tug nquab nyeg moog rua tug povthawj ntawm tug TSWV lub Tsevntaub sis ntsib lub qhovrooj.

¹⁵Tug povthawj muab ib tug nquab tua fij dlaws txim hab muab ib tug tua hlawv fij. Ua le nuav yog tug povthawj ua kevcai ntxuav tug mob ntawd kuas huv.

¹⁶“Yog ib tug txivneej twg cov kua chaw xis tawm lug, nwg yuavtsum dlaa dlej ntxuav nwg lub cev, mas nwg tseem tsi huv moog txug thaus tsaus ntuj.

¹⁷Yog cov kua ntawd lu tej khaub dluag lossis tej rig tsho tawv tsaj, yuavtsum muab coj moog ntxhua, hab tej khaub dluag ntawd tsi huv moog txug thaus tsaus ntuj.

¹⁸Tom qaab kws tug txivneej hab tug quaspuj pw ua ke taag lawm, obtug yuavtsum moog dlaa dlej, mas obtug tsi huv moog txug thaus tsaus ntuj.

¹⁹“Thaus ib tug quaspuj twg coj khaub dluag, nwg tsi huv moog txug xyaa nub. Leejtwg kov tug quaspuj ntawd, tug ntawd tsi huv moog txug thaus tsaus ntuj.

²⁰Txhua yaam kws tug quaspuj ntawd nyob lossis pw sau thaus lub sijhawm kws nwg taabtom coj khaub dluag, mas yaam ntawd tsi huv lawm.

²¹Txhua tug kws tuav tug quaspuj ntawd lub txaaj lossis tej rooj tog kws tug quaspuj ntawd nyob lawm, tug ntawd yuavtsum hle nwg cev rig tsho moog ntxhua hab dlaa dlej, mas nwg tsi huv moog txug thaus tsaus ntuj.

²⁴“Yog ib tug txivneej moog nrug tug quaspuj twg pw thaus nwg tseem taabtom coj khaub dluag, tug quaspuj ntawd cov ntshaav lu tug txivneej ntawd lawm, tug txivneej ntawd tsi huv moog txug xyaa nub, hab txhua lub txaaj kws tug txivneej ntawd pw los tsi huv lawm hab.”

²⁵“Yog tug quaspuj twg nchuav cev ntau nub kws tsi yog nwg lub caij coj khaub dluag, lossis nwg nchuav cev heev rua thaus txug caij nwg coj khaub dluag, nwg nchuav cev ntev npaum le caag, nwg tsi huv ntev npaum le ntawd; ib yaam le thaus nwg coj khaub dluag, nwg lub cev tsi huv ntaag.

²⁶Txhua lub txaaj kws nwg pw hab txhua lub chaw kws nwg nyob, thaus lub sijhawm kws nwg taabtom coj khaub dluag ntawd tsi huv lawm.

²⁷Yog leejtwg moog tuav tej khoom ntawd, nwg yuav tsi huv, mas nwg yuavtsum hle nwg cev rig tsho moog ntxhua hab dlaa dlej; mas nwg tsi huv moog txug thaus tsaus ntuj.

²⁸Tom qaab kws nwg coj khaub dluag dlua lawm, nwg yuavtsum tog xyaa nub, ces nwg maam le moog ua kevcai ntxuav, nwg txhaj yuav huv.

²⁹Nub yim, nwg ca le nqaa ob tug nquab taug lossis ob tug nquab nyeg moog rua tug povthawj ntawm tug TSWV lub Tsevntaub sis ntsib lub qhovrooj.

³⁰Tug povthawj muab ib tug nquab tua fij dlaws txim hab muab ib tug tua hlawv fij. Qhov kws tug povthawj ua le nuav, yog ua kevcai ntxuav tug quaspuj ntawd kuas huv.

³¹“Meb qha rua cov Yixalayees kuas txaav dleb ntawm tej kws tsi huv, puab txhaj tsi ua txhum rua tug TSWV lub Tsevntaub sis ntsib kws nyob huv plawv lub yeej. Yog puab ua txhum, ces puab yuav tuag.”

³²Tej kws has lug nuav yog txuj kevcai has txug tug txivneej kws mob lug kua paug lossis nwg chaw xis lug kua paug,

³³hab tug quaspuj kws coj khaub dluag lossis tug txivneej kws moog nrug tug quaspuj coj khaub dluag pw, nwg tsi huv ib yaam nkaus hab.