Read Hmong Njua Levis Kevcai 16 Bible Online

Levis Kevcai 16 - Hmong Njua bible

Levis Kevcai 16

¹Tug TSWV has rua Mauxes tom qaab kws Aloos ob tug tub raug tua tuag thaus obtug coj cov ncaig tawg kws tsi dlawbhuv moog fij rua tug TSWV.

²Tug TSWV has rua Mauxes has tas, “Koj ca le qha koj tug tijlaug Aloos has tas, tsuas yog thaus txug lub sijhawm kws teem tseg, nwg txhaj moog tau rua tom qaab dlaim ntaub kws quas Chaav Dlawbhuv kawg nkaus xwb, rua qhov kuv tshwm sau tauv fuab lug nyob rua sau lub Phijxaab kws ntim Vaajtswv tej lug cog tseg. Yog nwg tsi noog lug, nwg yuav tuag.

³Nwg moog tau rua huv Chaav Dlawbhuv kawg nkaus, thaus nwg coj tug ntsuag nyuj moog tua fij dlaws txim hab tug thaav yaaj moog tua hlawv fij nkaus xwb.”

⁴Ua ntej nwg yuav moog rua huv Chaav Dlawbhuv kawg nkaus, nwg yuavtsum dlaa dlej hab naav cev rig tsho povthawj kws yog lub tsho ntaub maag ntev, lub rig tuab lu, sa txuj hlaab ntaub maag hab ntoo txuj phuam.

⁵Cov Yixalayees yuavtsum muab ob tug laug tshis rua Aloos coj moog tuaj fij dlaws txim hab ib tug laug yaaj coj moog tua hlawv fij.

⁶Nwg muab ib tug txiv nyuj coj moog fij ua khoom theej txhoj dlaws nwg hab nwg tsev tuabneeg lub txim.

⁷Ces nwg yuavtsum coj ob tug laug tshis ntawd moog rua ntawm tug TSWV lub Tsevntaub sis ntsib lub qhovrooj.

⁸Aloos muab ob tug tshis ntawd rhu ntawv ib tug rua tug TSWV hab ib tug rua Axaxees.

⁹Aloos yuavtsum muab tug tshis kws rhu ntawv tau rua tug TSWV, tua theej txhoj hab muab fij dlaws txim.

¹⁰Hab muab tug tshis kws rhu ntawv tau rua Axaxees fij caj rua tug TSWV hab muab tso moog rua Axaxees tom taj suabpuam, kuas ris suavdlawg tej kev txhum moog povtseg.

¹¹Thaus Aloos muab tug txiv nyuj lug tua fij dlaws nwg hab nwg tsev tuabneeg lub txim,

¹²nwg yuavtsum muab lub yag rau ncaig tawg moog yawm ib cov ncaig tawg kws tseem cig ntsaa thuav ntawm lub thaaj, hab yawm ob phoov teg moov tshuaj tsw qaab coj moog rua huv Chaav Dlawbhuv kawg nkaus.

¹³Nwg muab cov moov tshuaj tsw qaab tso rua sau cov ncaig tawg taabmeeg tug TSWV, kuas cov paa moov tshuaj tsw qaab nchu tuaj roog lub hau Phijxaab kws ntim Vaajtswv tej lug cog tseg, kuas Aloos tsi xob pum lub hau Phijxaab, nwg txhaj tsi tuag.

¹⁴Aloos yuavtsum nqaa cov ntshaav nyuj moog hab muab nwg tug ntivteg tub cov ntshaav ntawd nchus rua lub hau Phijxaab saab tom hauv ntej hab muab mivntsiv nchus rua lub Phijxaab saab ntawm hauv ntej xyaa zag.

¹⁵Ces tom qaab ntawd, Aloos maam le muab tug laug tshis kws fij dlaws cov pejxeem lub txim tua, hab nqaa cov ntshaav moog rua huv Chaav Dlawbhuv kawg nkaus, muab cov ntshaav ntawd nchus rua lub hau phijxaab hab lub Phijxaab saab hauv ntej, ib yaam le nwg nchus cov ntshaav nyuj.

¹⁶Qhov kws Aloos ua le nuav, yog nwg ua kevcai ntxuav Chaav Dlawbhuv kawg nkaus kuas huv, vim cov Yixalayees tej kev phem kev qas hab puab tej kev txhum. Aloos yuavtsum ua kevcai ntxuav le nuav rua tug TSWV lub Tsevntaub sis ntsib, rua qhov lub Tsevntaub nyob huv plawv yeej kws yog qhov chaw tsi huv.

¹⁷Thaus Aloos moog rua huv Chaav Dlawbhuv kawg nkaus, moog ua kevcai ntxuav nwg tsev tuabneeg hab cov Yixalayees kuas huv, mas tsi pub ib tug tuabneeg nyob huv tug TSWV lub Tsevntaub sis ntsib moog txug thaus kws nwg tawm rov lug;

¹⁸Aloos yuavtsum moog hlawv khoom fij ntawm lub thaaj hab ua kevcai ntxuav lub thaaj. Nwg yuavtsum muab mivntsiv ntshaav nyuj hab ntshaav tshis pleev rua plaub tug kub sau plaub ceg kaum thaaj.

¹⁹Hab nwg yuavtsum muab nwg tug ntivteg tub cov ntshaav ntawd nchus rua lub thaaj xyaa zag. Qhov kws nwg ua le nuav yog nwg ua kevcai ntxuav lub thaaj, vim cov Yixalayees tej kev txhum hab ua kuas lub thaaj dlawbhuv.

²⁰Thaus Aloos ua kevcai ntxuav Chaav Dlawbhuv kawg nkaus huv tug TSWV lub Tsevntaub sis ntsib, hab lub thaaj taag lawm, nwg maam le muab tug tshis kws rhu ntawv tau rua Axaxees, fij caj rua tug TSWV.

²¹Aloos tsaa nwg ob txhais teg rua sau tug tshis ntawd lub taubhau hab leeg taagnrho cov Yixalayees tej kev phem kev qas, tej txim hab tej kev ntxeev sab, muab tej ntawd foom huv tuabsi rua sau tug tshis lub taubhau. Ces kuas tug tuabneeg kws tub npaaj tau lawm, caab tug tshis ntawd moog tso rua tom taj suabpuam.

²²Ces tug tshis ntawd yuav ris puab tej txim sau nwg lub taubhau nrug nwg moog povtseg rua thaaj chaw kws tsi muaj tuabneeg nyob hlo le.

²³Ces Aloos yuavtsum rov moog rua huv tug TSWV lub Tsevntaub sis ntsib, muab cev rig tsho povthawj kws nwg naav ua ntej nwg moog rua huv Chaav Dlawbhuv kawg nkaus hle hab muab tso rua huv.

²⁴Nwg yuavtsum moog dlaa dlej huv ib chaav dlawbhuv hab naav nwg cev rig tsho. Tom qaab ntawd, nwg maam le tawm lug hab muab khoom moog hlawv fij dlaws nwg hab cov Yixalayees lub txim.

²⁵Nwg yuavtsum muab cov roj tsaj moog hlawv rua sau lub thaaj fij dlaws txim.

²⁶Tug tuabneeg kws caab tug tshis moog rua Axaxees tom taj suabpuam, yuavtsum hle nwg cev rig tsho ntxhua hab dlaa dlej ua ntej kws nwg yuav rov lug rua huv lub yeej.

²⁷Tug txiv nyuj hab tug laug yaaj kws tua fij dlaws txim kws tub muab cov ntshaav nqaa moog ua kevcai dlaws txim rua huv Chaav Dlawbhuv kawg nkaus lawm, yuavtsum coj moog rua saab nrau ntug yeej, ob dlaim tawv, cov nqaj hab cov plaab nyuv yuavtsum muab hlawv kuas taag huv tuabsi.

²⁸Tug kws moog hlawv tej ntawd, nwg yuavtsum hle nwg cev rig tsho ntxhua hab dlaa dlej ua ntej kws nwg yuav rov lug rua huv lub yeej.

²⁹Yuavtsum coj lawv le tej kevcai nuav moog ibtxhis. Lub xyaa hli ntuj nub xab kaug, cov Yixalayees hab cov tuabneeg txawv tebchaws kws nrug mej nyob ua ke, yuavtsum ua kevcai yoo mov hab tsi xob ua ib yaam num dlaabtsi hlo le.

³⁰Nub ntawd yuavtsum ua kevcai dlaws taagnrho mej tej kev txhum, mej txhaj le yuav ua tau tuabneeg huv.

³¹Nub ntawd yog nub dlawbhuv, nub ntawd mej yuavtsum yoo mov ib nub hab tsi xob ua ib yaam num le. Tej nuav yog tej kevcai kws mej yuavtsum coj hab ua moog ibtxhis le.

³²Tug Povthawj Hlub kws tsaa lug hloov nwg txiv chaw, yog tug kws ua kevcai ntxuav rua suavdlawg kuas huv, nwg yuavtsum naav cev rig tsho povthawj

³³hab ua kevcai ntxuav Chaav Dlawbhuv kawg nkaus, tug TSWV lub Tsevntaub sis ntsib, lub thaaj hab cov Yixalayees suavdlawg.

³⁴Tej kevcai nuav yog tej kws mej yuavtsum coj hab ua lawv le nuav moog ibtxhis, yuavtsum ua txuj kevcai nuav rua cov Yixalayees ib xyoos ib zag ntxuav puab tej kev txhum povtseg. Yog le ntawd Mauxes txhaj ua lawv le tej lug kws tug TSWV tau saamfwm tseg rua nwg lawm.