Read Hmong Njua Levis Kevcai 17 Bible Online

Levis Kevcai 17 - Hmong Njua bible

Levis Kevcai 17

¹Tug TSWV has rua Mauxes

²kuas has rua Aloos, Aloos cov tub hab cov Yixalayees suavdlawg has tas,

³ntawm nuav yog tej lug kws tug TSWV has rua cov Yixalayees, yog leejtwg tua nyuj, tua yaaj lossis tua tshis fij rua tug TSWV, nyob ntawm lub yeej saab huv lossis saab nrau, yog tsi coj tuaj tua rua ntawm tug TSWV lub Tsevntaub sis ntsib lub qhovrooj, tug ntawd muaj txim vim nwg tso ntshaav povtseg; yuav muab nwg rhu tawm ntawm Vaajtswv tsaav tuabneeg moog.

⁵Cov lug saamfwm nuav lub ntsab yog kuas cov Yixalayees yuavtsum coj tej tsaj kws puab coj moog tua tom tej taj nraag tuaj fij rua tug TSWV. Txij nuav moog puab yuavtsum coj tej tsaj ntawd tuaj rua tug povthawj ntawm tug TSWV lub Tsevntaub sis ntsib lub qhovrooj hab muab tej tsaj ntawd tua fij rua tug TSWV ua kev sis raug zoo.

⁶Tug povthawj muab cov ntshaav nchus puagncig lub thaaj kws nyob ntawm tug TSWV lub Tsevntaub sis ntsib lub qhovrooj, hab muab cov roj hlawv kuas tsw qaab ntxag ua rua tug TSWV txaus sab heev.

⁷Cov Yixalayees yuavtsum tseg tsi xob ua tsi ncaaj rua tug TSWV vim qhov kws puab pheej tua tej tsaj fij rua tej dlaab tshis tom tej taj nraag. Cov Yixalayees yuavtsum coj txuj kevcai nuav moog ibtxhis le.

⁸Hab koj has rua puab tas, cov Yixalayees lossis cov tuabneeg txawv tebchaws txhua tug kws nrug puab nyob ua ke, yog leejtwg tua tsaj hlawv fij lossis fij theej txhoj

⁹kws yog muab fij rua tug TSWV, tabsis tsi coj tuaj tua rua ntawm tug TSWV lub Tsevntaub sis ntsib lub qhovrooj, yuavtsum muab tug ntawd rhu tawm ntawm Vaajtswv tsaav tuabneeg moog.

¹⁰Yog cov Yixalayees lossis cov tuabneeg txawv tebchaws kws nrug mej nyob ua ke, leejtwg noj tej nqaj kws txhaam ntshaav, tug TSWV yuav tawmtsaam tug ntawd hab yuav muab nwg rhu tawm ntawm Vaajtswv tsaav tuabneeg.

¹¹Txhua yaam kws caj sa, txujsa nyob huv cov ntshaav, tug TSWV txhaj saamfwm kuas muab taagnrho tej ntshaav laub rua sau lub thaaj txhaj dlaws tau tuabneeg tej kev txhum povtseg. Ntshaav yog txujsa, txhaj dlaws tau kev txhum.

¹²Yog le nuav, tug TSWV txhaj saamfwm rua cov Yixalayees, tsi pub puab hab cov tuabneeg txawv tebchaws kws nrug puab nyob ua ke noj tej nqaj kws txhaam ntshaav le.

¹³Yog cov Yixalayees lossis cov tuabneeg txawv tebchaws kws nrug mej nyob ua ke, leejtwg moog tua tsaj lossis noog kws yog yaam tsaj huv lug noj, yuavtsum muab cov ntshaav laub rua huv aav hab muab aav npoog rua.

¹⁴Txhua yaam kws caj sa, txujsa yog nyob huv cov ntshaav xwb. Yog le ntawd, tug TSWV txhaj has rua cov Yixalayees kuas tsi xob noj tej nqaj kws txhaam ntshaav, yog leejtwg noj, yuavtsum muab tug ntawd rhu tawm ntawm Vaajtswv tsaav tuabneeg moog.

¹⁵Txhua tug, tsi has cov Yixalayees lossis cov tuabneeg txawv tebchaws moog hlais tej tsaj kws mob tuag lossis tsaj nyaum tum tuag lug ua noj, nwg yuavtsum hle nwg cev rig tsho moog ntxhua, dlaa dlej hab nyob tog txug thaus tsaus ntuj kuas nwg huv tsaiv.

¹⁶Yog nwg tsi ntxhua nwg tej rig tsho hab dlaa dlej, nwg yuavtsum ris nwg lub txim ntawd.