Read Hmong Njua Levis Kevcai 18 Bible Online

Levis Kevcai 18 - Hmong Njua bible

Levis Kevcai 18

¹Tug TSWV has rua Mauxes

²kuas has rua cov Yixalayees has tas, “Kuv yog tug TSWV kws yog mej tug Vaajtswv.

³Mej tsi xob xyum ua lawv le cov tuabneeg Iziv kws nyob nraag qhov chaw kws mej tub moog nyob ib zag lawm lossis tsi xob ua le cov tuabneeg kws nyob huv lub tebchaws Kana-aas kws kuv taabtom coj mej moog nyob pheej ibtxwm ua.

⁴Mej yuavtsum fwm kuv tej kevcai hab ua lawv le tej lug kws kuv tub saamfwm rua mej lawm. Kuv Yog tug TSWV kws yog mej tug Vaajtswv.

⁵Mej yuavtsum xyum hab ua lawv le tej kevcai hab tej lug saamfwm kws kuv muab cob rua mej lawm; yog leejtwg ua lawv le nuav, yuav cawm tau nwg txujsa. Kuv yog tug TSWV.”

⁶Tsi xob moog nrug mej tej tuabneeg kws txheeb ze sis ntxag.

⁷Tsi xob ntxag koj nam, ua rua koj txiv poob ntsejmuag. Koj tsi xob ua rua koj nam poob ntsejmuag.

⁸Tsi xob ntxag koj txiv cov quaspuj ib tug twg, ua rua koj txiv poob ntsejmuag hlo le.

⁹Tsi xob ntxag koj tug muam kws yog koj nam yug lossis tug muam kws tsi nrug koj koom nam, tsi has tug kws yug huv koj tsev lossis coj lwm qhov lug los xij.

¹⁰Tsi xob ntxag koj tug ntxhais xeebntxwv; qhov kws koj ua rua nwg poob ntsejmuag, kuj ua rua koj poob ntsejmuag ib yaam nkaus.

¹¹Tsi xob ntxag koj tug muam kws tsi nrug koj koom nam; nwg tub yog koj tug muam ib yaam nkaus hab.

¹²Tsi xob ntxag koj tug pujnyaaj kws yog koj txiv tug muam lossis koj nam tug taislaug lossis tug nam hluas.

¹⁴Tsi xob ntxag koj tug yawm laug lossis koj tug txiv ntxawm tug quaspuj, rua qhov nwg yog koj tug puj laug lossis koj tug nam ntxawm.

¹⁵Tsi xob ntxag koj tug nyaab, rua qhov nwg yog koj tug tub tug quaspuj.

¹⁶Tsi xob ntxag koj tug tijlaug lossis koj tug kwv tug quaspuj, rua qhov yuav ua rua koj tug tijlaug lossis koj tug kwv poob ntsejmuag.

¹⁷Tsi xob ntxag tug quaspuj kws koj tub tau ntxag dlua lug lawm tug ntxhais lossis nwg tug ntxhais xeebntxwv, rua qhov puab yog koj roj ntshaav, yog koj ua le ntawd txhum kevcai.

¹⁸Tsi xob moog yuav koj tug quaspuj tug nam hluas lug ua koj tug nam yau, thaus koj tug quaspuj tseem ua neej nyob.

¹⁹Tsi xob nrug tug quaspuj kws tseem taabtom coj khaub dluag pw, rua qhov nwg lub cev tsi huv lawm.

²⁰Tsi xob ntxag lwm tug txivneej tug quaspuj; qhov ntawd yuav ua rua koj lub cev tsi huv.

²¹Tsi xob muab mej tej mivnyuas tua txi tug vaajtswv Maulej, rua qhov yuav ua rua mej tug Vaajtswv kws yog tug TSWV lub npe raug luas thuam tsi zoo.

²²Tsi pub tej txivneej ntxag txivneej. Vaajtswv ntxub tej kev phem ntawd kawg le.

²³Mej tsi xob moog ntxag tej tsaj, ua rua mej tsi huv lossis tej quaspuj tsi xob muab nwg lub cev moog rua tej tsaj ntxag. Ua le ntawd yog kev txhum.

²⁴Mej tsi xob ua rua mej tsi huv vim tej kev phem nuav, cov tuabneeg kws ibtxwm nyob huv lub tebchaws nuav pheej ua le ntawd, kuv txhaj muab puab ntab tawm, kuas mej txhaj tau lug nyob rua huv.

²⁵Puab ua rua lub tebchaws nuav tsi huv, yog le ntawd tug TSWV txhaj rau txim rua puab, hab muab puab ntab tawm huv lub tebchaws moog lawm.

²⁶Puab ua ntau yaam kev phem hab ua rua lub tebchaws tsi huv lawm, tabsis mej yuavtsum tsi xob ua tej kev phem ntawd, taagnrho mej suavdlawg, tsi has cov Yixalayees lossis cov tuabneeg txawv tebchaws kws nrug mej nyob los xij, yuavtsum coj tug TSWV tej kevcai hab tej lug saamfwm,

²⁸yog mej tsi ua le ntawd, ces mej yuav raug ntab ntawm huv lub tebchaws nuav moog ib yaam le cov tuabneeg kws nyob ua ntej mej raug ntab tawm lawm.

²⁹Yog leejtwg ua tej kev phem kev qas nuav, yuav muab tug ntawd rhu tawm ntawm Vaajtswv tsaav tuabneeg moog.

³⁰Tug TSWV has tas, “Mej yuavtsum fwm tej lug saamfwm kws kuv muab rua mej hab mej tsi xob xyum ua mej lub neej le cov tuabneeg kws xub nyob huv lub tebchaws nuav hab tsi xob ua rua mej tsi huv vim tej kev txhum nuav. Kuv yog tug TSWV kws yog mej tug Vaajtswv.”