Read Hmong Njua Levis Kevcai 19 Bible Online

Levis Kevcai 19 - Hmong Njua bible

Levis Kevcai 19

¹Tug TSWV has rua Mauxes

²kuas has rua cov Yixalayees has tas, “Mej yuavtsum ua tuabneeg dlawbhuv, rua qhov kuv yog tug TSWV kws yog mej Tug Vaajtswv, kuv yog tug Dlawbhuv.

³Mej txhua tug yuavtsum fwm mej nam mej txiv, hab ceev nub Xanpataus ua nub tseemceeb, lawv le kuv tub saamfwm rua mej lawm. Kuv yog tug TSWV kws yog mej tug Vaajtswv.

⁴“Tsi xob tso kuv tseg hab moog pe mlom; tsi xob muab tooj muab hlau nchuav ua mlom rua mej pe. Kuv yog tug TSWV kws yog mej tug Vaajtswv.

⁵“Thaus mej tua tsaj fij ua kev sis raug zoo rua tug TSWV, mej yuavtsum fwm tej kevcai kws kuv muab rua mej lawm, kuv txhaj txaus sab rua mej tej khoom fij ntawd.

⁶Cov nqaj mej yuavtsum muab noj kuas taag rua nub kws mej tua tug tsaj ntawd lossis nub tom qaab. Nub peb tej nqaj kws seem yuavtsum muab hlawv povtseg,

⁷rua qhov tej nqaj ntawd tsi huv lawm, yog leejtwg noj mas kuv yuav tsi txaus sab rua tug ntawd tej khoom fij.

⁸Txhua tug kws noj cov khoom fij ntawd yuav raug txim, rua qhov nwg ua tsi huv rua tej khoom dlawbhuv kws fij rua kuv ntawd, hab yuav muab nwg rhu tawm ntawm kuv tsaav tuabneeg moog.

⁹“Thaus mej hlais mej tej nplej huv mej tej teb, mej tsi xob hlais cov nplej kws nyob tom ntug teb kuas taag, hab tsi xob rov qaab moog hlais tej naab nplej kws seem.

¹⁰Tsi xob rov qaab moog sau tej txiv maab kws mej sau tsi taag huv mej tej vaaj txiv maab lossis moog khaws tej txiv maab kws poob rua huv aav; tseg tej txiv ntawd rua cov tuabneeg txomnyem hab cov tuabneeg txawv tebchaws. Kuv yog tug TSWV kws yog mej tug Vaajtswv.

¹¹“Mej tsi xob ua tubsaab, tsi xob ua tsi ncaaj rua lwm tug, hab tsi xob dlaag.

¹²Tsi xob tuav kuv lub npe coglug tsi tseeb, yog mej ua le ntawd yog mej saib tsi taug mej tug Vaajtswv lub npe. Kuv yog tug TSWV.

¹³“Mej tsi xob tsimtxom mej tej kwvtij zej zog lossis nyag nwg tug. Tsi xob sej tej tub zug kws mej ndlav tej nqe zug moog txug taagkig sawv ntxuv.

¹⁴Tsi xob foom tug tuabneeg laag ntseg lossis muab tej yaam dlaabtsi moog cuab tug tuabneeg dligmuag kev kuas nwg dlawm qaug. Mej yuavtsum paub ntshai mej tug Vaajtswv. Kuv yog tug TSWV.

¹⁵“Tsi xob tu plaub tsi ncaaj, tsi xob saib tsi taug cov pluag lossis tsaa cov npluanuj cai. Tabsis mej yuavtsum txav txim lawv le kev ncaaj nceeg rua mej tej kwvtij zej zog.

¹⁶Tsi xob moog taug xaiv rua ib leeg tug twg, hab thaus muaj leejtwg raug luas ab lam kws yog lub txim tuag, mej yuavtsum paab has lawv le qhov tseeb kuas dlaws tau nwg dlim. Kuv yog tug TSWV.

¹⁷“Tsi xob ntxub ib leeg tug twg rua nruab sab, tabsis yuavtsum moog nrug nwg sis has kuas hum, mej txhaj yuav tsi ua txhum, vim qhov mej ntxub nwg.

¹⁸Tsi xob ua phem pauj rua ib leeg tug twg lossis pheej ntxub nwg, tabsis yuavtsum hlub mej cov kwvtij zej zog ib yaam le mej hlub mej lub cev. Kuv yog tug TSWV.

¹⁹“Mej yuavtsum ua lawv le kuv tej lug saamfwm. Tsi xob muab ib yaam tsaj lug tso taw rua ib yaam tsaj kuas txuam tsoov. Tsi xob muab ob yaam noob qoob moog tseb rua huv ib dlaim teb, tsi xob naav tej rig tsho kws muab ob yaam ntaub lug xaws ua ke.

²⁰“Yog ib tug ntxhais qhev twg leeg moog ua ib tug txivneej twg tug nam yau lawm, tabsis tug txivneej ntawd tseem tsi tau them nqe hab coj nwg moog, yog muaj lwm tug txivneej tuaj ntxag nwg, mas obtug yuavtsum raug txim, tabsis tsi xob muab tua, rua qhov nwg tseem yog ib tug txhais qhev.

²¹Tug txivneej ntawd yuavtsum coj ib tug laug yaaj moog rua ntawm lub Tsevntaub sis ntsib lub qhovrooj, muab tua fij rua tug TSWV dlaws tug ntawd tej kev txhum,

²²hab tug povthawj muab tug laug yaaj fij dlaws tug txivneej ntawd txujkev txhum, Vaajtswv txhaj yuav zaam nwg lub txim.

²³“Thaus mej moog txug rua huv lub tebchaws Kana-aas hab cog txhua yaam txiv ntoo, mej yuavtsum suav ntsoov thawj peb lub xyoo cov txiv ntoo ntawd tseem tsi tau huv. Thaus lub sijhawm ntawd mej tsi xob dle cov txiv ntoo ntawd lug noj.

²⁴Xyoo plaub txhua yaam txiv maab txiv ntoo yuavtsum muab fij rua kuv kws yog tug TSWV.

²⁵Tabsis xyoo tsib mej maam le dle cov txiv ntoo ntawd lug noj. Yog mej ua txhua yaam nuav, mej tej txiv ntoo yuav txi txiv ncw. Kuv yog tug TSWV kws yog mej tug Vaajtswv.

²⁶“Mej tsi xob noj tej nqaj kws txhaam ntshaav. Mej tsi xob xyum ua txhua yaam yeegsiv lossis ua neeb ua yaig.

²⁷Mej tsi xob txav mej cov plaubhau ntawm ob saab pobkub lossis chais mej cov fwjtxwv.

²⁸Mej tsi xob muab koob nkaug ua tej tug dluab rua ntawm mej lub cev, hab tsi xob muab mej tej nqaj hlais kuas to moog quaj nyav tej tuabneeg tuag. Kuv yog tug TSWV.

²⁹“Tsi xob ua rua mej tej ntxhais txaajmuag kws yog tso puab moog ua namndlav, yog mej ua le ntawd, mej yuav moog pe lwm tug vaajtswv hab lub tebchaws yuav puv nkaus kev nkauj kev nraug.

³⁰Ncu ntsoov nub Xanpataus yog nub su, hab fwm lub chaw kws mej moog pehawm kuv. Kuv yog tug TSWV.

³¹“Mej tsi xob moog cuag txivneeb lossis saib yaig hlo le. Yog mej moog ua le ntawd, mej yuav ua tuabneeg tsi huv. Kuv yog tug TSWV kws yog mej tug Vaajtswv.

³²“Mej yuavtsum fwm hab ua ncaaj rua cov tuabneeg laug. Mej yuavtsum paub ntshai kuv; kuv yog tug TSWV.

³³“Tsi xob saib tsi taug cov tuabneeg txawv tebchaws kws nrug mej nyob huv mej lub tebchaws.

³⁴Ua zoo rua puab ib yaam le mej ua zoo rua mej cov Yixalayees, hab hlub puab ib yaam le mej hlub mej lub cev. Ncu ntsoov has tas, thaus u mej tau thojnaam ib zag moog nyob rua nraag tebchaws Iziv lawm. Kuv yog tug TSWV kws yog mej tug Vaajtswv.

³⁵“Tsi xob ua tuabneeg tsi ncaaj kws muab raab teev ntxo luj rua luas, tsi xob txaav txuj hlua ntsuag noj luas, hab tsi xob muab lub kawm tsi txwm luj rua luas.

³⁶Siv raab teev kws tsi ntxo, lub thauj kws hum txaj hab lub kawm kws txwm sab. Kuv yog tug TSWV kws yog mej tug Vaajtswv, kuv coj mej tawm nraag tebchaws Iziv lug.

³⁷Mej yuavtsum fwm kuv tej kevcai hab tej lug saamfwm. Kuv yog tug TSWV.”