Read Hmong Njua Levis Kevcai 2 Bible Online

Levis Kevcai 2 - Hmong Njua bible

Levis Kevcai 2

¹Thaus ib tug twg coj qoobloo tuaj fij rua tug TSWV, nwg yuavtsum xub muab cov nplej ntawd zum ua moov. Nwg yuavtsum muab roj txiv ntoo hab moov tshuaj tsw qaab nphoo rua sau cov moov nplej ntawd huv tuabsi,

²hab coj tuaj cob rua Aloos cov tub kws yog cov povthawj. Ces tug Povthawj Hlub maam le yawm ib phoov teg moov nplej, muab cov roj hab cov moov tshuaj tsw qaab coj moog hlawv rua sau lub thaaj ib yaam le ua kevcai ncu txug fij rua tug TSWV. Tej paa khoom fij nuav yuav tsw qaab ntxag ua rua tug TSWV txaus sab.

³Tej qoobloo kws seem fij tsi taag ntawd puavleej yog cov povthawj tug, txij thaus puab coj tej qoobloo ntawd tuaj fij rua tug TSWV lawm, tej ntawd yeej dlawbhuv lawm.

⁴Yog muab tej ncuav kws cub huv qhovtxus tuaj ua khoom fij, mas cov ncuav ntawd yuavtsum tsi xob muab keeb xyaw. Yuavtsum yog muab moov nplej zuaj xyaw roj txiv ntoo puab ua tej lub ncuav tuab tuab lossis muab roj txiv ntoo zuaj xyaw puab ua tej lub ncuav nyag nyag xwb.

⁵Yog muab cov ncuav nthee huv yag tuaj ua khoom fij, muab tej moov nplej ntawd zuaj xyaw roj txiv ntoo xwb, tsi xob muab keeb xyaw.

⁶Ca le muab puab ua tej lub hab muab cov roj laub rua sau, thaus mej coj moog ua khoom fij.

⁷Yog mej muab tej ncuav kws cub huv laujkaub coj moog fij, cov ncuav ntawd yuavtsum yog muab moov nplej hab roj txiv ntoo ua xwb.

⁸Coj lub ncuav ntawd moog fij rua tug TSWV hab muab cob rua tug povthawj, nwg maam le coj moog tso rua sau lub thaaj.

⁹Tug povthawj yuav muab ndlais ib nraab coj moog fij ua kev ncu txug rua tug TSWV, hab nwg yuav coj moog hlawv rua sau lub thaaj. Tej paa khoom kws fij nuav yuav tsw qaab ntxag ua rua tug TSWV txaus sab.

¹⁰Tej khoom fij kws seem puavleej yog cov povthawj tug, txij thaus kws coj tej ncuav ntawd moog fij rua tug TSWV lawm, tej ntawd yeej dlawbhuv lawm.

¹¹Mej tsi xob muab tej moov nplej kws xyaw keeb tuaj fij rua tug TSWV; mej tsi xob muab tej moov nplej kws xyaw keeb lossis xyaw zib ntaab hlawv fij rua tug TSWV.

¹²Txhua xyoo thaus mej sau qoobloo, mej yuavtsum coj mej thawj phaum qoob tuaj fij rua tug TSWV, tabsis tsi xob muab hlawv rua sau lub thaaj kuas tej paa tsw qaab ntxag.

¹³Muab ntsev nphoo rua sau txhua yaam qoobloo kws mej coj tuaj fij ntawd, rua qhov cov ntsev ntawd yog sawv cev cov lug cog tseg ntawm Vaajtswv hab mej ntaag. Mej yuavtsum nphoo ntsev taagnrho rua sau mej tej khoom fij huv tuabsi.

¹⁴Thaus mej sau qoobloo hab coj thawj phaum qoob tuaj fij rua tug TSWV, muab tej nplej ntawd kib kuas nkig hab muab tuav kuas ua moov coj tuaj fij.

¹⁵Muab roj txiv ntoo laub rua hab muab moov tshuaj tsw qaab nphoo rua sau cov moov nplej ntawd.

¹⁶Tug povthawj yuav muab cov moov nplej, cov roj hab cov moov tshuaj tsw qaab coj moog hlawv ua khoom fij ua kev ncu txug rua tug TSWV.