Read Hmong Njua Levis Kevcai 20 Bible Online

Levis Kevcai 20 - Hmong Njua bible

Levis Kevcai 20

¹Tug TSWV has rua Mauxes

²kuas ca le has rua cov Yixalayees has tas, “Mej cov Yixalayees txhua tug lossis cov tuabneeg txawv tebchaws kws nrug mej nyob ua ke, yog leejtwg muab nwg cov mivnyuas rua luas tua txi tug vaajtswv Maulej, ces kuas tej tuabneeg zej zog muab pobzeb ntaus tug ntawd kuas tuag moog.

³Yog leejtwg muab nwg ib tug mivnyuas txi tug vaajtswv Maulej, ua rua kuv lub Tsevntaub kws dlawbhuv tsi huv, hab ua rua kuv lub npe dlawbhuv raug thuam, kuv yuav tawmtsaam nwg hab muab nwg rhu tawm ntawm kuv tsaav tuabneeg moog.

⁴Tabsis yog cov pejxeem tsi quavntsej tug kws muab nwg tug mivnyuas txi tug vaajtswv Maulej hab tsi muab tug ntawd tua kuas tuag,

⁵kuv yuav tawmtsaam tug ntawd hab nwg tsev tuabneeg, hab cov tuabneeg kws tso kuv tseg moog pe tug vaajtswv Maules. Kuv yuav muab puab rhu tawm ntawm kuv tsaav tuabneeg moog.

⁶“Yog leejtwg moog thov tej txivneeb ua neeb saib nwg, kuv yuav tawmtsaam tug ntawd hab yuav muab nwg rhu tawm ntawm kuv tsaav tuabneeg moog.

⁷Mej yuavtsum ua tuabneeg ncaaj nceeg hab dlawbhuv, rua qhov kuv yog tug TSWV kws yog mej tug Vaajtswv.

⁸Mej ca le coj lawv le kuv tej kevcai, rua qhov kuv yog tug TSWV hab yog tug ua kuas mej dlawbhuv.

⁹“Yog leejtwg foom tsi zoo rua nwg txiv lossis nwg nam, yuavtsum muab tug ntawd tua kuas tuag; vim nwg tau foom tsi zoo rua nwg txiv lossis Nwg nam, lub txim tuag txhaj poob rua sau nwg.

¹⁰“Yog tug txivneej twg moog ntxag tej tuabneeg zej zog quaspuj, ca le muab ob tug kws sis ntxag ntawd tua povtseg.

¹¹Yog tug txivneej twg ntxag nwg txiv tug quaspuj, ua rua nwg txiv poob ntsejmuag, ca le muab obtug tua povtseg. Vim obtug tau ua txhum, lub txim tuag txhaj poob rua sau obtug.

¹²Yog tug txivneej twg ntxag nwg tug nyaab, ca le muab obtug tua povtseg. Vim obtug tau ua txhum, lub txim tuag txhaj poob rua sau obtug.

¹³Yog ob tug txivneej twg sis ntxag, yog obtug ua le ntawd, yog obtug ua kev phem kev qas heev, yuavtsum muab obtug tua povtseg, vim obtug tau ua txhum, lub txim tuag txhaj poob rua sau obtug.

¹⁴Yog leejtwg yuav leej nam hab tug ntxhais lug ua quaspuj huv tuabsi. Qhov kws ua le ntawd, yog kev phem kev qas heev, yuavtsum muab suavtawg hlawv puab kuas tuag; txhaj yuav tsi muaj txujkev phem kev qas nuav nyob huv mej lub tebchaws ntxiv lawm.

¹⁵Yog tug txivneej twg ntxag tej tsaj txhu, yuavtsum muab nwg hab tug tsaj ntawd tua povtseg.

¹⁶Yog tug quaspuj twg ntxag tsaj, yuavtsum muab nwg hab tug tsaj ntawd tua povtseg; vim obtug tau ua txhum, lub txim tuag txhaj poob rua sau obtug.

¹⁷“Yog leejtwg yuav nwg tug muam kws koom nam koom txiv lossis txiv tshab lossis nam tshab tug ntxhais ua quaspuj, obtug yuav raug kev txaajmuag taabmeeg tebchaws. Ca le muab obtug ntab tawm ntawm suavdlawg moog, rua qhov nwg yuav nwg tug muam, nwg txhaj yuavtsum ris lub txim ntawd.

¹⁸Yog tug txivneej twg nrug ib tug quaspuj twg pw thaus tug quaspuj ntawd taabtom coj khaub dluag, ca le muab obtug ntab tawm ntawm suavdlawg moog, rua qhov obtug ua txhum tej kevcai kws has txug kev ua tsi huv lawm.

¹⁹“Yog tug txivneej twg ntxag nwg txiv cov muam lossis nwg nam cov vivncaug, obtug yuavtsum ris lub txim kws ua txhum ntawd, rua qhov yog tej txheeb ze sis ntxag.

²⁰Yog tug txivneej twg moog ntxag nwg tug yawm laug lossis nwg tug txiv ntxawm tug quaspuj, vim nwg ua rua nwg tug yawm laug lossis tug txiv ntxawm poob ntsejmuag, obtug yuavtsum raug txim; hab obtug yuav tsi muaj mivnyuas moog txug nub tuag.

²¹Yog tug txivneej twg txeeb nwg tug tijlaug lossis nwg tug kwv tug quaspuj yuav, obtug yuav tsi muaj mivnyuas moog txug nub tuag, vim nwg ua tej yaam tsi huv hab rhuav nwg tug tijlaug lossis nwg tug kwv ntsejmuag.”

²²Tug TSWV has tas, “Mej yuavtsum coj lawv le kuv tej kevcai hab kuv tej lug saamfwm, mej txhaj yuav tsi raug ntab tawm huv lub tebchaws Kana-aas kws kuv muab rua mej lawm.

²³Mej tsi xob moog coj cov tuabneeg kws ibtxwm nyob huv lub tebchaws ntawd tej kevcai; kuv muab cov tuabneeg ntawd ntab tawm moog, mej txhaj tau moog nyob huv lub tebchaws ntawd. Puab pheej ua tej kev phem kev qas, kuv txhaj ntxub puab heev.

²⁴Tabsis kuv tau coglug muab lub tebchaws aav rog hab zoo qoob rua mej ua mej tug, hab rua mej nyob moog le. Kuv yog tug TSWV kws yog mej tug Vaajtswv. Kuv yog tug kws muab mej cais tawm ntawm lwm tsaav tuabneeg moog nyob rua ib caag.

²⁵Yog le ntawd, mej yuavtsum saib tej tsaj hab tej noog kuas tseeb saib yaam twg huv hab yaam twg tsi huv. Tsi xob noj tej tsaj lossis tej noog kws tsi huv. Kuv tub qha tej tsaj tsi huv rua mej lawm, yog mej noj tej tsaj ntawd yuav ua rua mej tsi huv.

²⁶Mej yog kuv tsaav tuabneeg hab yog kuv tug, mej yuavtsum ua tuabneeg dlawbhuv, rua qhov kuv yog tug TSWV hab kuv yog tug dlawbhuv. Kuv tau xaiv mej tawm ntawm lwm tsaav tuabneeg lug ua kuv tug.

²⁷“Tug txivneej lossis tug quaspuj twg ua neeb hab ua khawvkoob, yuavtsum muab pobzeb ntaus nwg kuas tuag. Tug kws ua tej nuav lub txim tuag yuav poob rua sau nwg.”