Read Hmong Njua Levis Kevcai 21 Bible Online

Levis Kevcai 21 - Hmong Njua bible

Levis Kevcai 21

¹Tug TSWV saamfwm rua Mauxes kuas has rua Aloos cov tub kws yog cov povthawj has tas, “Tsi pub cov povthawj ib tug twg lub cev tsi huv, vim nwg moog quaj nyav tej kwvtij neejtsaa kws tuag lawm,

²tsuas pub nwg quaj nyav tug kws yog nwg tsev tuabneeg, nwg nam, nwg txiv, nwg tug tub, nwg tug ntxhais, nwg tug tijlaug, nwg tug kwv,

³lossis nwg tug muam kws tsi tau yuav quasyawg kws tseem nrug nwg nyob ua ib tse xwb.

⁴Nwg tsi xob ua rua nwg tsi huv kws yog moog saib tej tuabneeg txheeb ze tuag.

⁵“Tsi pub cov povthawj chais plaubhau lossis chais fwjtxwv lossis hlais puab tej nqaj qha rua suavdlawg paub has tas, puab raug kev txomnyem quaj ntsuag.

⁶Puab yuavtsum ua tuabneeg dlawbhuv rua puab tug Vaajtswv, hab tsi xob ua rua puab tug Vaajtswv lub npe raug thuam; vim puab yog cov kws muab tej khoom hlawv fij rua tug TSWV, hab muab tej ncuav fij rua puab tug Vaajtswv; puab yuavtsum yog tuabneeg dlawbhuv.

⁷Puab tsi xob moog yuav tug namndlav lossis tug quaspuj kws tsi huv lawm lossis puab tsi xob moog yuav tug puj nrauj lug ua quaspuj, rua qhov tug povthawj yog tug dlawbhuv rua nwg tug Vaajtswv.

⁸Suavdlawg yuavtsum suav tug povthawj ua tug dlawbhuv, rua qhov nwg yog tug kws muab tej khoom fij rua mej tug Vaajtswv. Kuv yog tug TSWV; kuv yog tug dlawbhuv hab ua kuas mej dlawbhuv.

⁹Yog tug povthawj twg tug ntxhais moog ua namndlav, nwg yog tug kws rhuav nwg txiv ntsejmuag, yuavtsum muab nwg hlawv kuas tuag.”

¹⁰“Tug Povthawj Hlub yog tug kws luas muab cov roj txhawb meejthawj laub rua sau nwg taubhau, tsaa nwg ua tug Povthawj Hlub kws naav cev rig tsho povthawj. Yog le ntawd, nwg yuavtsum ntsis nwg cov plaubhau lossis tsi xob dlua nwg cev rig tsho qha kuas luas paub has tas nwg muaj kev quaj ntsuag.

¹¹Nwg tsi xob ua rua nwg lub cev tsi huv lossis ua rua kuv lub Tsevntaub kws dlawbhuv tsi huv kws yog nwg moog rua huv lub tsev paam tuag, txawm yog tug tuag ntawd yog nwg nam nwg txiv kag los tsi xob moog, rua qhov tub muab nwg tsaa ua povthawj rua kuv lawm. Kuv yog tug TSWV.

¹³Nwg yuavtsum yuav ib tug ntxhais nkaujxwb lug ua nwg quaspuj xwb,

¹⁴tsi xob yuav puj ntsuag, puj nrauj lossis tug hluas nkauj kws moog ua dlua namndlav lawm. Nwg yuavtsum yuav nwg caajceg ib tug ntxhais kws tseem yog nkaujxwb lug ua nwg tug quaspuj.

¹⁵Yog tsi ua le nuav, nyob tsaam nwg cov mivnyuas kws yog cov dlawbhuv yuav ua tuabneeg tsi huv lawm. Kuv yog tug TSWV hab kuv tsaa nwg ua tug Povthawj hlub.”

¹⁶Tug TSWV has rua Mauxes

¹⁷kuas has rua Aloos has tas, “Tsi xob pub koj tej xeebntxwv kws muaj mob tsi huv coj tej khoom tuaj fij rua kuv hlo le. Qhov nuav mej yuavtsum coj moog ibtxhis le.

¹⁸Tsi pub tug tuabneeg kws muaj mob le nraag nuav coj khoom moog fij: tsi pub tug tuabneeg kws dligmuag, luv ceg, ntsejmuag caws plav lossis tug kws teg taw tsi ntev ib yaam.

¹⁹Tsi pub tug tuabneeg qhuav npaab lossis qhuav ceg;

²⁰tsi pub tug tuabneeg khoov dluav lossis tug tuabneeg moj pob; tsi pub tug tuabneeg kws mob qhovmuag lab lossis mob kavlis, hab tug txivneej kws muab saam lawm.

²¹Aloos cov xeebntxwv kws ua povthawj, yog leejtwg muaj mob tsi huv, nwg tsi xob coj khoom tuaj hlawv fij rua kuv.

²²Rua qhov tug txivneej ntawd yuav noj tej zaub mov kws muab fij rua kuv, tsi has cov khoom fij kws dlawbhuv hab cov khoom fij kws dlawbhuv kawg nkaus,

²³tabsis vim qhov kws nwg muaj mob tsi huv, nwg tsi xob moog ze rua ntawm dlaim ntaub thaiv Chaav dlawbhuv hab lub thaaj. Nwg tsi xob moog ua rua tej khoom dlawbhuv tsi huv, vim kuv yog tug TSWV kws ua rua tej khoom ntawd dlawbhuv.”

²⁴Mauxes yeej muab tej nuav qha rua Aloos, Aloos cov tub hab taagnrho cov Yixalayees huv tuabsi lawm.