Read Hmong Njua Levis Kevcai 22 Bible Online

Levis Kevcai 22 - Hmong Njua bible

Levis Kevcai 22

¹Tug TSWV has rua Mauxes

²kuas has rua Aloos hab nwg cov tub has tas, “Mej yuavtsum ceev tej khoom fij dlawbhuv kws cov Yixalayees coj tuaj fij rua kuv kuas zoo. Mej txhaj tsi ua rua kuv lub npe kws dlawbhuv raug thuam, kuv yog tug TSWV.

³Yog mej cov xeebntxwv leejtwg, thaus nwg lub cev tseem tsi tau huv, nwg ca le moog ze rua ntawm tej khoom fij dlawbhuv kws cov Yixalayees coj tuaj fij rua kuv, nwg yuav tsi tau ua kuv teg num fij khoom ntawm lub thaaj moog le lawm. Qhov nuav mej yuavtsum coj moog ibtxhis le. Kuv yog tug TSWV.

⁴“Aloos cov xeebntxwv yog muaj leejtwg mob ruas lossis mob ua kuas paug, ces tsi xob pub nwg noj tej khoom fij dlawbhuv moog txug thaus nwg lub cev zoo huv lawm. Tug povthawj kws tsi huv mas yog tug kws moog kov tug tuabneeg tuag lub cev lossis nwg muaj mob ua kua paug rua nwg qhov chaw xis

⁵lossis nwg moog kov tej tsaj tsi huv lossis tej tuabneeg tsi huv.

⁶Tug povthawj twg kws nwg lub cev tsi huv lawm, nwg yuav tsi huv moog txug thaus tsaus ntuj, hab nwg tsi xob noj tej khoom fij kws dlawbhuv moog txug thaus nwg dlaa dlej taag tsaiv.

⁷Tom qaab lub nub poob qho lawm, nwg txhaj le huv, ces nwg maam le noj tau tej khoom fij dlawbhuv kws yog nwg tej zaub mov.

⁸Nwg tsi xob noj tej tsaj kws nwg tuag nwg lossis yog tej tsaj qus tum tuag; cov nqaj ntawd yuav ua rua nwg tsi huv. Kuv yog tug TSWV.

⁹“Txhua tug povthawj yuavtsum fwm tej kevcai kws kuv tau muab rua puab lawm. Yog puab tsi fwm, puab yuav raug txim hab yuav tuag, rua qhov puab tsi fwm kuv tej kevcai kws tseemceeb. Kuv yog tug TSWV hab yog tug ua kuas puab dlawbhuv.

¹⁰“Tsuas yog tug povthawj tsev tuabneeg nkaus xwb, txhaj noj tau tej khoom fij kws dlawbhuv; tsi pub tej tuabneeg saab nrau noj tej khoom fij ntawd le, txawm yog tug tuabneeg kws nrug tug povthawj nyob lossis tug tub zug kws nwg ndlav ua num los yeej noj tsi tau le.

¹¹Tabsis tug povthawj tug tubkhai kws nwg muab nyaj yuav lug lossis tug kws yug huv nwg tsev, txhaj noj tau tej khoom fij kws yog tug povthawj tug.

¹²Tug povthawj tug ntxhais kws moog yuav quasyawg lawm, yog nwg tug quasyawg tsi yog ib tug povthawj, nwg yuavtsum tsi xob noj tej khoom fij kws dlawbhuv ntawd.

¹³Tabsis tug puj ntsuag lossis tug puj nrauj kws tseem tsi tau muaj mivnyuas kws rov lug nrug nwg txiv nyob huv nwg txiv tsev txhaj noj tau tej khoom kws yog tug povthawj tug.

¹⁴“Yog leejtwg tsi yog tug povthawj tsev tuabneeg, yog nwg tsi paub hab moog muab tau tej khoom fij dlawbhuv noj lawm, nwg yuavtsum them cov khoom ntawd puv ntoob rov qaab hab ntxiv neeg nkaum feem pua rua tug povthawj.

¹⁵Cov povthawj yuavtsum ceev tej khoom dlawbhuv kws cov Yixalayees coj tuaj fij rua tug TSWV ntawd kuas zoo, tsi xob ua rua tej khoom ntawd tsi huv

¹⁶kws yog ca tug tuabneeg tsi muaj cai tau noj tej khoom fij ntawd; qhov nuav yuav ua rua tug tuabneeg ntawd ua txhum hab raug txim. Kuv yog tug TSWV hab yog tug ua rua tej khoom fij ntawd dlawbhuv.”

¹⁷Tug TSWV has rua Mauxes

¹⁸kuas muab tej kevcai nuav qha rua Aloos, Aloos cov tub hab cov Yixalayees has tas, thaus cov Yixalayees lossis cov tuabneeg txawv tebchaws kws nrug mej nyob, coj khoom tuaj hlawv fij, tsi has fij ua tsaug rua tej lug cog tseg lossis coj tuaj fij ntawm lub sab dlawb paug, tug tsaj ntawd yuavtsum muab tug kws tsi muaj ib qhov phem hlo le.

¹⁹Tug tsaj ntawd tsi has nyuj, tshis lossis yaaj, yuavtsum yog tug txiv hab tsi muaj ib qhov phem hlo le, txhaj hum tug TSWV sab.

²⁰Yog mej muab tej tsaj phem tuaj fij, tug TSWV yuav tsi yuav tug tsaj ntawd.

²¹Thaus mej leejtwg muab khoom tuaj fij ua kev sis raug zoo rua tug TSWV lossis fij ua tsaug rua tej lug cog tseg lossis coj tuaj fij ntawm lub sab dlawb paug, yuavtsum yog tug tsaj kws tsi muaj ib qhov phem le txhaj hum tug TSWV sab.

²²Tsi xob muab tej tsaj dligmuag, luv ceg, tu ceg, mob rwj, mob txhaab qawj lossis muaj caws plav, coj moog tua ua khoom fij lossis muab hlawv rua sau lub thaaj fij rua tug TSWV hlo le.

²³Tej tsaj kws mej coj moog tua fij ntawm lub sab dlawb paug, txawm yog to mivntsiv lossis tsi zoo pistsawg los tau, tabsis tsi xob muab moog fij ua tsaug rua tej kev coglug.

²⁴Tsi xob muab tug tsaj kws noobqais mob, tawg, to lossis muab saam lawm, coj moog fij rua tug TSWV. Tsi pub mej ua le nuav nyob huv mej lub tebchaws.

²⁵Tsi xob muab tej tsaj kws mej yuav ntawm lwm tsaav tuabneeg lug tua ua khoom fij rua tug TSWV. Tej tsaj ntawd yog tsaj tsi zoo hab tsi huv, kuv tsi yuav tej tsaj ntawd ua khoom fij.

²⁶Tug TSWV has rua Mauxes has tas, thaus tug mivnyuas nyuj lossis mivnyuas yaaj lossis mivnyuas tshis nyavnyuas yug, yuavtsum ca nrug leej nam xyaa nub, tom qaab ntawm maam le muab coj moog tua hlawv fij txhaj hum tug TSWV sab.

²⁸Tsi xob muab tug maum nyuj hab tug mivnyuas lossis tug maum yaaj hab tug mivnyuas, lossis tug maum tshis hab tug mivnyuas ua ib nub tua ua khoom fij.

²⁹Thaus mej muab khoom moog fij ua tug TSWV tsaug, mej yuavtsum ua kuas lawv le kevcai txhaj hum tug TSWV sab,

³⁰ca le noj tej khoom fij kuas taag rua nub ntawd hab tsi pub kuas seem ib dlaim nqaj moog txug nub tom qaab le.

³¹Tug TSWV has tas, “Mej yuavtsum ua lawv le kuv tej lug saamfwm; kuv yog tug TSWV.

³²Mej tsi xob ua rua kuv lub npe kws dlawbhuv raug luas txobthuam; taagnrho cov Yixalayees yuavtsum paub has tas, kuv yog tug dlawbhuv hab yog tug kws ua kuas mej dlawbhuv;

³³hab kuv yog tug kws coj mej tawm nraag tebchaws Iziv lug, kuas kuv tau ua mej tug Vaajtswv. Kuv yog tug TSWV.”