Read Hmong Njua Levis Kevcai 24 Bible Online

Levis Kevcai 24 - Hmong Njua bible

Levis Kevcai 24

¹Tug TSWV has rua Mauxes has tas.

²“Koj ca le has rua cov Yixalayees kuas ca le nqaa tej tseem roj txiv ntoo kws zoo tshaaj plawg tuaj saam rua cov teeb huv lub Tsevntaub, tej nplaim teeb txhaj yuav cig pum kev laam lug moog le.

³Txhua mo Aloos yuavtsum moog taws cov teeb kws nyob saab nrau dlaim ntaub thaiv lub Phijxaab huv Chaav Dlawbhuv kawg nkaus huv tug TSWV lub Tsevntaub sis ntsib, kuas cov teeb cig laam lug ib mos kaaj ntug. Mej yuavtsum coj txuj kevcai nuav moog ibtxhis le.

⁴Aloos yuavtsum tu ntshis cov teeb sau tug ncej kws muab kub ua, hab saib cov teeb kuas cig laam lug taabmeeg tug TSWV moog le.

⁵“Muab neeg nkaum choj moov nplej coj lug ntse puab ua kaum ob lub ncuav coj moog cub.

⁶Muab cov ncuav ntawd coj moog tso taabmeeg tug TSWV rua sau lub rooj kws muab kub vuam, hab muab teeb ua ob leej, ib leejtwg rau lub.

⁷Muab tej tseem moov tshuaj tsw qaab lug nphoo rua sau ob leej ncuav ntawd, ib yaam le muab ua khoom fij hloov cov ncuav ntawd chaw ua kev ncu txug rua tug TSWV.

⁸Txhua nub Xanpataus yuavtsum coj ncuav moog tso rua sau lub rooj taabmeeg tug TSWV. Cov Yixalayees yuavtsum ua le nuav moog ibtxhis le.

⁹Cov ncuav nuav yog Aloos hab nwg cov xeebntxwv tug, puab yuavtsum coj moog noj huv ib chaav dlawbhuv, rua qhov yog ib feem dlawbhuv ntawm cov khoom kws coj moog fij rua tug TSWV kws yog cov povthawj tug.”

¹⁰Muaj ib tug txivneej, nwg txiv yog tuabneeg Iziv hab nwg nam yog tuabneeg Yixalayees kws yog Dilis tug ntxhais hu ua Silaumis hab yog xeem Daas. Tug txivneej ntawd txawm nrug ib tug Yixalayees sis tshe huv lub yeej. Thaus obtug taabtom sis tshe, tug txivneej ntawd txawm tsawm foom tug TSWV, yog le ntawd, puab txhaj le coj nwg moog cuag Mauxes,

¹²hab tso tuabneeg zuv nwg, tog saib tug TSWV yuav qha kuas puab ua le caag rua nwg.

¹³Tug TSWV has rua Mauxes has tas,

¹⁴“Koj ca le coj tug txivneej nuav tawm huv lub yeej nuav moog rua saab nrau ntug yeej, kuas txhua tug kws nov tug txivneej ntawd tshev, yuavtsum tsaa nwg txhais teg rua sau tug txivneej ntawd taubhau ua timkhawv has tas, nwg yeej yog tuabneeg txhum tag. Ces cov pejxeem ca le muab pobzeb ntaus kuas nwg tuag.

¹⁵Hab qha rua cov Yixalayees txhua tug has tas, yog leejtwg tsawm foom Vaajtswv, nwg yuavtsum ris lub txim ntawd,

¹⁶hab muab nwg tua kuas tuag. Cov Yixalayees txhua tug lossis cov tuabneeg txawv tebchaws kws nyob huv tebchaws Yixalayees, yog leejtwg tsawm foom tug TSWV, ces cov Yixalayees yuavtsum muab pobzeb ntaus kuas tug ntawd tuag moog.

¹⁷“Yog leejtwg tua tuabneeg, yuavtsum muab tug ntawd tua povtseg,

¹⁸hab yog leejtwg tua tej tuabneeg zej zog tej tsaj tuag, yuavtsum muab tsaj moog pauj tsaj xwb. Lub ntsab lug mas yog muab sav pauj sav.

¹⁹“Yog leejtwg ua rua nwg tej phoojywg zej zog ib tug twg raug mob, nwg ua rua luas le caag, yuavtsum muab nwg ua kuas zoo le ntawd.

²⁰Yog nwg luv luas ib tug txhaa, yuavtsum muab nwg ib tug txhaa luv pauj; yog nwg kaus luas ib lub qhovmuag, yuavtsum muab nwg ib lub qhovmuag kaus pauj. Yog nwg tsoo luas ib tug nav luv, yuavtsum muab nwg ib tug nav tsoo kuas luv pauj. Nwg ua rua lwm tug raug mob le caag, yuavtsum ua kuas nwg raug mob ib yaam le ntawd hab.

²¹Leejtwg tua ib tug tsaj tuag, nwg yuavtsum muab ib tug tsaj moog them tug ntawd, tabsis yog leejtwg tua tuabneeg tuag, yuavtsum muab nwg tua pauj xwb.

²²Txuj kevcai nuav muab cob rua mej txhua tug kws yog cov Yixalayees hab cov tuabneeg txawv tebchaws kws nrug mej nyob, rua qhov kuv yog tug TSWV kws yog mej tug Vaajtswv.”

²³Thaus Mauxes has le nuav rua cov Yixalayees lawm, puab txhaj coj tug txivneej kws tsawm foom Vaajtswv ntawd moog rua nrau ntug yeej hab suavdlawg muab pobzeb ntaus nwg tuag lawm. Qhov nuav yog cov Yixalayees ua lawv le tug TSWV tau saamfwm rua Mauxes lawm.