Read Hmong Njua Levis Kevcai 26 Bible Online

Levis Kevcai 26 - Hmong Njua bible

Levis Kevcai 26

¹Tug TSWV has tas, “Mej tsi xob puab mlom lossis puab mojzeeg, tsaa ncej zeb lossis muab pobzeb txaug ua mlom rua mej pe huv mej lub tebchaws. Kuv Yog tug TSWV kws yog mej tug Vaajtswv.

²Mej yuavtsum ceev kuv cov nub Xanpataus hab fwm qhov chaw pehawm kuv ua qhov chaw dlawbhuv. Kuv yog tug TSWV.

³“Yog mej ua neej lawv le kuv tej kevcai hab fwm kuv tej lug,

⁴kuv yuav tso dlej tso naag lug rua mej lawv caij lawv nyoog, kuas mej lub tebchaws ntsu qoobloo hab tej txiv ntoo los yuav txi txiv ncw heev.

⁵Mej tej qoobloo yuav zoo heev ua rua mej muaj nplej hlais moog txug thaus lub caij dle txiv maab, hab mej yuav dle txiv maab moog txug thaus lub caij kws mej cog qoob. Mej yuav muaj noj muaj haus nplua mag, hab mej yuav tau zoo nyob kaaj sab lug huv mej lub tebchaws moog le.

⁶“Kuv yuav pub kuas mej lub tebchaws muaj kev thaajyeeb, hab mej yuav tau zoo pw tsaug zug tsi muaj leejtwg yuav ua rua mej ntshai. Kuv yuav muab tej tsaj nyaum huv lub tebchaws ua kuas tu noob taag, hab yuav tsi muaj kev tsuv kev rog nyob huv lub tebchaws le.

⁷Mej yuav kovyeej mej cov yeebncuab. Mej raab ntaaj yuav ua rua puab swb,

⁸Mej tsib leeg yuav tua yeej luas ib puas leej hab mej ib puas leej yuav tua yeej luas kaum txheeb leej.

⁹Kuv yuav foom koob moov rua mej hab pub kuas mej muaj tubki coob heev; kuv yuav ua lawv le kuv tej lug cog tseg kws kuv tau nrug mej sis coglug lawm.

¹⁰Mej yuav sau tau qoobloo ntau nplua mag txaus mej noj thawm xyoo, hab yuav tau muab tej qoob qub kws tseem noj tsi taag yawm moog povtseg txhaj muaj chaw rau tej qoob tshab.

¹¹Kuv yuav nrug mej nyob huv kuv lub Tsevntaub kws dlawbhuv, hab kuv yuav tsi tso mej tseg ib zag le.

¹²Kuv yuav nrug mej nyob; kuv yuav yog mej tug Vaajtswv, hab mej yuav yog kuv tsaav tuabneeg.

¹³Kuv yog tug TSWV kws yog mej tug Vaajtswv kws coj mej tawm nraag tebchaws Iziv lug, kuas mej txhaj tsi tau ua luas qhev ntxiv lawm. Kuv tub muab mej tej quabtwg luv povtseg hab ca mej tsaa taug taubhau moog kev.”

¹⁴Tug TSWV has tas, “Yog mej tsi noog kuv tej lug, mej yuav raug txim.

¹⁵Yog mej tsi ua lawv kuv tej kevcai hab kuv tej lug saamfwm, hab tsi coj lawv le kuv tau coglug tseg rua mej,

¹⁶kuv yuav rau txim rua mej. Kuv yuav tso sub tawg sub ntshaa lug rua mej, tej kaab mob kws khu tsi zoo hab tej kaab mob npaws yuav ua rua mej dligmuag hab ua rua mej lub neej suam kaum zuj zug. Mej cog qoobloo, tabsis yuav tsi tau noj, rua qhov mej tej yeebncuab yuav tua yeej mej hab tau noj tej qoob kws mej cog.

¹⁷Kuv yuav tawmtsaam mej, mej yuav swb, hab cov tuabneeg kws ntxub mej yuav ua cov tswj mej; mej yuav ntshai heev. Txawm yog tsi muaj leejtwg caum mej los mej yuav tsiv tsi saib qaab.

¹⁸“Tom qaab kws mej raug tej xwmtxheej nuav taag lawm, yog mej tseem tsi fwm kuv, kuv yuav rau txim rua mej kuas nyaav tshaaj qhov qub xyaa npaug ntxiv.

¹⁹Kuv yuav rhuav mej txujkev tawv ncauj hab khaavtheeb kuas puamtsuaj moog. Kuv yuav tsi tso naag lug rua mej lub tebchaws, aav yuav qhuav tawv cuag hlau.

²⁰Mej yuav khwv kawg mej lub zug los tsi muaj qaabhau rua mej, rua qhov mej lub tebchaws yuav tsi zoo qoob hab tej txiv ntoo los yuav tsi txi txiv.

²¹“Yog mej tseem tawmtsaam kuv hab tsi noog kuv lug, kuv yuav tsub kev rau txim rua mej kuas nyaav tshaaj qhov qub xyaa npaug ntxiv.

²²Kuv yuav tso tej tsaj qus kws nyaum heev lug tawmtsaam mej; tej tsaj ntawd yuav tum mej tej mivnyuas, tum mej tej tsaj txhu kuas tu noob hab ua kuas mej tshuav tsawg heev tsi pum muaj tuabneeg taug kev le lawm.

²³“Yog tom qaab tej kev rau txim nuav dlhau lawm, mej tseem tsi tig lug noog kuv lug, tabsis tseem pheej rau sab ntso tawmtsaam kuv ntxiv,

²⁴ces kuv yuav tawmtsaam mej hab rau txim rua mej kuas nyaav tshaaj qhov qub kws taag lug lawm xyaa npaug ntxiv.

²⁵Kuv yuav tso tuabneeg tuaj ua rog rua mej hab rau txim rua mej, vim mej rhuav kuv tej lug cog tseg hab txawm yog mej sis sau moog nyob huv mej tej nroog kuas mej muaj kev kaaj sab los kuv yuav tso tej mob phem lug raug mej, hab yuav muab mej cob rua mej cov yeebncuab teg.

²⁶Kuv yuav ua kuas mej tsi muaj mov noj, kaum leej quaspuj yuav koom ib lub qhovtxus cub tej mov kws puab muaj xwb. Puab yuav muab cov mov ntawd lug luj sis faib, hab thaus mej noj taag los tsi tsau.

²⁷“Yog tom qaab kws dlhau tej kev rau txim nuav taag lawm, mej tseem tawv hab tsi noog kuv lug,

²⁸ces kuv yuav chim rua mej, hab rau txim rua mej nyaav tshaaj qhov qub xyaa npaug ntxiv.

²⁹Mej yuav muaj kev tshaib nqhes heev, hab mej yuav noj mej tej tub tej ntxhais kws mej yug.

³⁰Kuv yuav rhuav tshem mej tej chaw pe dlaab sau tej ncov roob, muab mej tej thaaj hlawv moov tshuaj tsw qaab tsoo povtseg, hab muab mej tej cev tuag pov rua sau tej mlom kws yog mlom tuag; kuv yuav ntxub mej heev.

³¹Kuv yuav muab mej tej nroog ntxeev kuas puag taag, kuv yuav rhuav tshem mej tej chaw pe mlom kuas puamtsuaj, hab kuv yuav tsi txais mej tej khoom fij kws tsw qaab ntxag ntawd.

³²Kuv yuav rhuav kuas mej lub tebchaws puamtsuaj qhuav nkig nkuav ua rua mej cov yeebncuab kws tuaj tswjfwm mej xaav tsi thoob le.

³³Kuv yuav tso tuabneeg tuaj ua rog rua mej hab muab mej lawv kuas tawg ri sua moog nrug tej tuabneeg txawv tebchaws nyob. Mej lub tebchaws yuav caj nroj tsuag, hab ca mej tej nroog raug puamtsuaj taag tsi muaj tuabneeg nyob.

³⁴Ces mej lub tebchaws yuav zoo sab rua ntau xyoo kws tau su pauj rua tej kws mej tsi pub kuas tau su; mej lub tebchaws yuav tau zoo pw hab su thaus mej raug ntab tawm moog ua tuabneeg thojnaam nyob rua huv mej cov yeebncuab lub tebchaws lawm.

³⁶“Kuv yuav ua kuas mej cov kws raug ntab tawm moog ntawd ntshai heev nyob huv mej cov yeebncuab lub tebchaws. Cua ntsawj tej nplooj ntoos nrov xwb los mej yuav dlha tsi saib qaab. Mej yuav dlha cuag le thaus luas caum mej huv tshaav rog, txawm yog tsi muaj yeebncuab nyob ze los mej yuav qaug pawg lug.

³⁷Mej ib leeg yuav dlawm ib leeg qaug, thaus tsi muaj leejtwg caum nteg mej, hab mej yuav tsi muaj cuabkaav tua mej cov yeebncuab hlo le.

³⁸Mej yuav tuag taag rua huv luas teb luas chaw, hab mej cov yeebncuab lub tebchaws yuav muab mej nqog taag huv tuabsi.

³⁹Mej cov kws seem nyob huv mej cov yeebncuab lub tebchaws, tej roj ntshaa yuav sem zuj zug, vim mej tej kev txhum hab mej cov yawmkoob tej kev txhum.

⁴⁰“Tabsis yog mej cov xeebntxwv leeg puab tej kev txhum hab puab cov yawmkoob tej kev txhum kws puab tau tawmtsaam kuv hab ntxeev sab rua kuv,

⁴¹hab ua rua kuv muab puab ntab moog nyob rua huv puab cov yeebncuab lub tebchaws, yog has tas puab txu puab lub sab kws tsi fwm Vaajtswv hab nyob puab lub txim taag lawm;

⁴²kuv yuav ncu txug tej lug kws kuv cog tseg rua Yakhauj, Ixaj hab Anplahaas puab, hab kuv yuav rov ncu txug lub tebchaws kws kuv muab rua kuv tsaav tuabneeg lawm.

⁴³Tabsis yuavtsum xub muab cov tuabneeg huv lub tebchaws ntawd ntab tawm ua ntej, kuas lub tebchaws txhaj tau su. Hab puab yuavtsum raug txim vim qhov kws puab muab kuv tej kevcai hab tej lug saamfwm tso tseg lawm.

⁴⁴Tabsis txawm le ntawd los xij, thaus puab tseem nyob huv puab cov yeebncuab lub tebchaws, kuv yuav tsi tso puab tseg lossis rhuav kuas puab puamtsuaj tu noob. Kuv yuav tsi rhuav lu lug kws kuv cog tseg rua puab lawm, hab kuv yog tug TSWV puab tug Vaajtswv.

⁴⁵Kuv yuav rov coglug rua puab ib yaam le kuv tau coglug rua puab cov yawmkoob kws thaus kuv lub fwjchim tau coj kuv tsaav tuabneeg tawm nraag tebchaws Iziv lug taabmeeg txhua tsaav tuabneeg lawm, kuv yog puab tug Vaajtswv. Kuv yog tug TSWV.”

⁴⁶Taagnrho tej nuav puavleej yog tej kevcai hab tej lug saamfwm kws tug TSWV muab rua Mauxes sau Roob Xinais, kuas muab qha rua cov tuabneeg Yixalayees.