Read Hmong Njua Levis Kevcai 27 Bible Online

Levis Kevcai 27 - Hmong Njua bible

Levis Kevcai 27

¹Tug TSWV has rua Mauxes has tas,

²“Koj has rua cov Yixalayees has tas, thaus muaj ib tug twg coglug muab nwg fij pub rua tug TSWV, tug tuabneeg ntawd yuavtsum them nyaj le nraag qaab nuav,

³kom tug nqe lawv le numtswv kevcai: -tug txivneej kws muaj noobnyoog neeg nkaum xyoo moog txug rau caum xyoo: them tsib caug dlaim nyaj. -Tug quaspuj: them peb caug dlaim nyaj -tug txivneej kws muaj noobnyoog tsib xyoos moog txug rau caum xyoo: them neeg nkaum dlaim nyaj. -Tug ntxhais hluas: them kaum dlaim nyaj. -Tug mivnyuas tub kws muaj noobnyoog tsib xyoos rov huv: them tsib dlaim nyaj. -Tug mivnyuas ntxhais kws muaj noobnyoog tsib xyoos rov huv: them peb dlaim nyaj. -Tug txivneej kws muaj noobnyoog rau caum xyoo rov sau: them kaum tsib dlaim nyaj. -Tug quaspuj kws muaj noobnyoog rau caum xyoo rov sau: them kaum dlaim nyaj.

⁸“Yog tug tuabneeg kws coglug tseg ntawd txomnyem them tsi taug lawv le tug nqe kws kom tseg nuav los yuavtsum coj tug tuabneeg ntawd moog cuag tug povthawj, hab tug povthawj yuav muab tug nqe txu kuas tsawg lawv le tug tuabneeg ntawd muaj peevxwm them taug rua nwg them.

⁹“Yog tug tuabneeg ntawd coglug muab tug tsaj kws tsimnyog moog fij rua tug TSWV, mas txhua yaam ntawd yuavtsum yog yaam dlawbhuv.

¹⁰Tug tuabneeg kws coglug ntawd yuavtsum tsi xob muab dlua lwm tug tsaj tuaj hloov tug tsaj ntawd chaw. Yog nwg hloov, ces ob tug tsaj ntawd puavleej yog tug TSWV tug.

¹¹Tabsis yog nwg coglug muab tug tsaj kws tsi tsimnyog fij rua tug TSWV, tug txivneej ntawd yuavtsum coj tug tsaj ntawd moog rua tug povthawj.

¹²Ces tug povthawj maam le muab tug tsaj ntawd lug kom nqe lawv le tug tsaj ntawd zoo lossis phem, hab tsuas ntaus tug nqe lawv le ntawd xwb.

¹³Yog tug tuabneeg ntawd xaav txhwv tug tsaj ntawd rov qaab, nwg yuavtsum them neeg nkaum feem pua ntxiv rua tug nqe tsaj ntawd.

¹⁴“Thaus muaj ib tug twg muab nwg lub tsev fij rua tug TSWV, tug povthawj yuavtsum muab ntaus nqe lawv le lub tsev ntawd zoo lossis phem, tsuas ntaus tug nqe le ntawd xwb.

¹⁵Yog tug kws fij lub tsev ntawd xaav txhwv lub tsev rov qaab, nwg yuavtsum them neeg nkaum feem pua ntxiv rua tug nqe tsev ntawd.

¹⁶“Yog ib tug twg muab nwg dlaim teb ib feem fij rua tug TSWV, tug povthawj yuavtsum muab ntaus nqe kuas tsimnyog lawv le dlaim teb ntawd yuav tseb tau noob qoob npaum le caag rua huv, qhov kws txaus tseb ib kawm noob nplej ntaus nqe kaum dlaim nyaj.

¹⁷Yog dlhau plawg Xyoo Thim, nwg txawm muab nwg dlaim teb fij, ces muab ntaus nqe kuas puv nkaus rua nwg them.

¹⁸Yog tub dlhau Xyoo Thim lawm, nwg maam le muab nwg dlaim teb fij, tug Povthawj yuav nrug kom tug nqe lawv le tej xyoo ntawd moog txug Xyoo Thim, hab muab tug nqe txu kuas qeg.

¹⁹Yog tug kws fij nwg dlaim teb ntawd xaav txhwv rov qaab, nwg yuavtsum them neeg nkaum feem pua ntxiv rua tug nqe ntawd.

²⁰Yog nwg tsi xaav txhwv nwg dlaim teb rov qaab lossis nwg tub xub muab muag rua lwm tug lawm, ces nwg tsi muaj cai txhwv dlaim teb ntawd rov qaab le lawm.

²¹Ces thaus rov txug Xyoo Thim, dlaim teb ntawd yuav ua tug TSWV tug moog le, hab yog cov povthawj tug.

²²“Yog ib tug twg muab nwg dlaim teb kws nwg yuav lug fij rua tug TSWV,

²³tug nqe yuavtsum kom lawv le tej xyoo moog txug rua Xyoo Thim, hab tug tuabneeg ntawd yuavtsum them tug nqe rua nub ntawd. Cov nyaj ntawd yog tug TSWV tug.

²⁴Thaus txug Xyoo Thim, yuavtsum muab dlaim teb ntawd thim rov rua tug tswv qub lossis nwg cov xeebntxwv.

²⁵“Txhua yaam nqe yuavtsum muab kom kuas lawv le numtswv txuj cai.

²⁶“Thawj tug mivnyuas tsaj yeej yog tug TSWV tug le lawm, tsi pub leejtwg muab tug tsaj ntawd tuaj fij ua kev zoo sab rua nwg, tsi has mivnyuas nyuj, mivnyuas yaaj lossis mivnyuas tshis los puavleej yog tug TSWV tug,

²⁷tabsis yog cov tsaj kws tsi huv thawj tug mivnyuas, yuavtsum txhwv rov qaab lawv le tug nqe kws tau kom tseg hab ntxiv ib feem tsib rua tug nqe ntawd. Yog nwg tsi txhwv tug tsaj ntawd rov qaab, ces muab muag rua lwm tug lawv le tug nqe kws tau kom tseg lawm los tau.

²⁸“Txhua yaam kws tau coglug muab fij rua tug TSWV lawm, txawm yog tuabneeg lossis tsaj txhu lossis teb, tsi pub muab muag lossis txhwv rov qaab le. Rua qhov tej ntawd yog yaam dlawbhuv heev rua tug TSWV lawm.

²⁹Yog tau coglug nrug tug TSWV lawm has tas, yuav muab ib tug twg ua kuas puamtsuaj moog, mas tsi pub txhwv rov qaab le lawm, yuavtsum muab tug ntawd tua kuas tuag xwb.

³⁰“Taagnrho tej qoobloo huv tej teb lossis tej txiv maab, txiv ntoo ib feem kaum, yeej yog tug TSWV tug.

³¹Yog leejtwg xaav txhwv qee yaam rov qaab, nwg yuavtsum them ib feem tsib ntxiv rua tug nqe kws tau kom tseg.

³²Taagnrho tej tsaj nyeg los ib feem kaum yeej yog tug TSWV tug. Thaus suav tej tsaj txhu, kaum tug twg muab ib tug ua tug TSWV tug.

³³Tug tswv tsaj tsi xob xaiv tug tsaj zoo tawm ntawm tug tsaj phem, hab tsi xob muab tej tsaj lug sis hloov. Yog nwg muab tug tsaj nuav moog hloov tug tsaj tom chaw, ces ob tug tsaj ntawd puavleej yog tug TSWV tug huv tuabsi, hab txhwv tsi tau rov qaab le lawm.”

³⁴Ntawm nuav yog cov lug saamfwm kws tug TSWV has rua Mauxes sau Roob Xinais, kuas coj lug qha rua cov Yixalayees.