Read Hmong Njua Levis Kevcai 4 Bible Online

Levis Kevcai 4 - Hmong Njua bible

Levis Kevcai 4

¹Tug TSWV saamfwm rua Mauxes has tas,

²“Koj qha rua cov Yixalayees paub has tas, yog leejtwg txhobtxwm ua txhum hab tsi muab sab npuab tug TSWV tej lug saamfwm, yuav tau ua lawv le tej kevcai nraag qaab nuav.”

³Yog tug Povthawj Hlub twg tau ua txhum hab nwg tej kev txhum ntawm lug raug rua cov pejxeem, nwg yuavtsum tau coj ib tug ntsuag nyuj kws tsi muaj ib qhov phem le tuaj tua fij rua tug TSWV dlaws nwg lub txim.

⁴Nwg yuavtsum caab tug nyuj ntawd moog rua ntawm tug TSWV lub Tsevntaub sis ntsib lub qhovrooj, tsaa nwg txhais teg rua sau tug nyuj taubhau hab muab tua taabmeeg tug TSWV rua ntawd.

⁵Ces tug Povthawj Hlub yuavtsum nqaa tug ntsuag nyuj ntawd cov ntshaav ib qho moog rua huv tug TSWV lub Tsevntaub sis ntsib.

⁶Mas tug povthawj yuavtsum muab nwg tug ntivteg tub cov ntshaav ntawd coj moog nchus rua dlaim ntaub kws quas Chaav Dlawbhuv xyaa zag.

⁷Hab tug povthawj muab ib cov ntshaav pleev lub thaaj hlawv moov tshuaj tsw qaab cov kub sau plaub ceg kaum thaaj kws nyob huv tug TSWV lub Tsevntaub sis ntsib. Dlua le ntawd nwg muab cov ntshaav kws seem coj moog laub rua lub taw thaaj kws hlawv tej khoom theej txhoj ntawm tug TSWV lub Tsevntaub sis ntsib lub qhovrooj.

⁸Nwg yuavtsum muab tug nyuj ntawd tej roj luas tawm kuas taag huv tuabsi nrug cov npluag roj kws npug lub plaab hab cov nyuv,

⁹ob lub raum hab cov roj kws npug ob lub raum, hab nplais sab kws zoo tshaaj plawg.

¹⁰Ces tug povthawj maam le muab cov roj coj moog hlawv rua sau lub thaaj kws hlawv tej khoom fij, ib yaam le nwg muab tej tsaj kws tua fij ua kev sis raug zoo tej roj coj moog hlawv hab ntaag.

¹¹Tabsis nwg yuavtsum muab dlaim tawv, cov nqaj, lub taubhau, plaub ceg hab tej nyuv mog cov nyuv luj huv tuabsi,

¹²nqaa tawm moog rua saab nrau ntug yeej ntawm qhov chaw dlawbhuv kws pheej coj cov tshauv moog nchuav rua. Nwg muab tej nqaj nyuj tso rua sau pawg tawg hab muab hlawv.

¹³Yog cov Yixalayees tau yuam kev ua txhum kws yog txhum rua tug TSWV tej lug saamfwm ib nqais twg kws tsi yog txhobtxwm ua,

¹⁴thaus suavdlawg paub has tas, muaj txujkev txhum ntawd lawm, cov pejxeem yuavtsum coj ib tug ntsuag nyuj moog tua fij dlaws kev txhum rua ntawm tug TSWV lub Tsevntaub sis ntsib;

¹⁵cov thawjcoj ntawm cov pejxeem lug tsaa puab tej teg rua sau tug nyuj ntawd taubhau hab muab tug nyuj tua rua ntawd.

¹⁶Tug Povthawj Hlub maam le nqaa ib cov ntshaav moog rua huv tug TSWV lub Tsevntaub sis ntsib,

¹⁷muab nwg tug ntivteg tub cov ntshaav ntawd, hab muab nchus rua dlaim ntaub kws quas Chaav Dlawbhuv xyaa zag.

¹⁸Hab nwg muab ib cov ntshaav coj moog pleev lub thaaj kws hlawv moov tshuaj tsw qaab cov kub sau plaub ceg kaum thaaj kws nyob huv tug TSWV lub Tsevntaub sis ntsib hab muab cov ntshaav kws seem laub rua lub taw thaaj kws hlawv tej khoom fij ntawm tug TSWV lub Tsevntaub sis ntsib lub qhovrooj.

¹⁹Ces nwg muab taagnrho tej roj coj moog hlawv rua sau lub thaaj.

²⁰Nwg fij tug nyuj nuav ib yaam nkaus le nwg fij tug kws ntxuav tej kev txhum ntaag, hab qhov kws nwg ua le nuav tub yog nwg fij khoom ntxuav cov pejxeem lub txim, txhaj yuav zaam tau puab lub txim.

²¹Ces nwg maam coj tug nyuj moog hlawv rua saab ntug yeej nrau, ib yaam le nwg hlawv tug nyuj kws fij dlaws nwg lub txim. Qhov nuav yog fij khoom ua kevcai tshem cov pejxeem tej kev txhum moog povtseg.

²²Yog ib tug numtswv tau yuam kev ua txhum kws yog txhum rua tug TSWV tej lug saamfwm ib nqais twg kws tsi yog txhobtxwm ua,

²³thaus kws luas qha nwg txujkev txhum rua nwg paub lawm, nwg yuavtsum coj ib tug laug tshis kws tsi muaj ib qhov phem le moog tua fij theej txhoj.

²⁴Nwg yuavtsum tsaa nwg txhais teg rua sau tug tshis ntawd taubhau hab muab tug tshis ntawd tua rua ntawm lub thaaj saab peg, ntawm qhov chaw kws tua tsaj hlawv ua khoom fij. Qhov nuav yog fij khoom ua kevcai tshem nwg tej kev txhum povtseg.

²⁵Tug povthawj yuavtsum muab nwg tug ntivteg tub cov ntshaav tsaj coj moog pleev rua lub thaaj kws hlawv khoom fij cov kub sau plaub ceg kaum thaaj, hab muab cov ntshaav kws seem laub ywg lub taw thaaj.

²⁶Ces nwg muab taagnrho tej roj coj moog hlawv rua sau lub thaaj, ib yaam le nwg hlawv tej roj kws yog tej tsaj kws tua fij ua kev sis raug zoo. Tug povthawj fij khoom theej txhoj tshem tug nom ntawd lub txim, txhaj yuav zaam tau nwg lub txim.

²⁷Yog cov pejxeem ib tug twg tau ua txhum kws yog ua txhum rua tug TSWV tej lug saamfwm ib nqais twg kws tsi yog txhobtxwm ua,

²⁸ces thaus kws luas qha nwg txujkev txhum rua nwg paub lawm, nwg yuavtsum coj ib tug maum tshis kws tsi muaj ib qhov phem le moog tua fij theej txhoj.

²⁹Nwg yuavtsum tsaa nwg txhais teg rua sau tug maum tshis ntawd taubhau, hab muab tug maum tshis ntawd tua rua ntawm lub thaaj saab peg, ntawm qhov chaw kws tua tsaj hlawv ua khoom fij.

³⁰Ces tug povthawj maam le muab nwg tug ntivteg tub cov ntshaav tshis coj moog pleev rua lub thaaj cov kub sau plaub ceg kaum thaaj, hab muab cov ntshaav kws seem laub ywg lub taw thaaj.

³¹Ces nwg muab taagnrho tej roj luas tawm ib yaam le luas tej tsaj kws tua fij ua kev sis raug zoo tej roj, hab tug povthawj maam le muab coj moog hlawv rua sau lub thaaj kuas tsw qaab ntxag ua rua tug TSWV txaus sab heev. Qhov nuav yog tug povthawj fij khoom theej txhoj dlaws tug tuabneeg ntawd lub txim, txhaj yuav zaam tau nwg lub txim.

³²Yog ib tug twg coj ib tug yaaj tuaj tua dlaws nwg lub txim, mas tug yaaj ntawd yuavtsum yog tug maum, hab tsi muaj ib qhov phem le.

³³Nwg yuavtsum tsaa nwg txhais teg rua sau tug maum yaaj ntawd taubhau, hab muab tug maum yaaj ntawd tua rua ntawm lub thaaj saab peg, ntawm qhov chaw kws tua tsaj hlawv ua khoom fij.

³⁴Tug povthawj maam le muab nwg tug ntivteg tub cov ntshaav tsaj coj moog pleev rua lub thaaj cov kub sau plaub ceg kaum thaaj, hab muab cov ntshaav kws seem laub ywg lub taw thaaj.

³⁵Ces nwg muab cov roj luas tawm kuas taag, hab nwg muab coj moog hlawv rua sau lub thaaj fij rua tug TSWV. Qhov nuav yog tug povthawj fij khoom theej txhoj dlaws tug tuabneeg ntawd lub txim, txhaj yuav zaam tau nwg lub txim.