Read Hmong Njua Levis Kevcai 5 Bible Online

Levis Kevcai 5 - Hmong Njua bible

Levis Kevcai 5

¹Yuavtsum fij khoom dlaws tej kev txhum le nraag nuav: Yog numtswv hu ib tug twg moog ua timkhawv rua huv tsev tu plaub, yog nwg npog tsi qha tej kws nwg pum lossis nov, nwg yuav tau ris nwg lub txim ntawd.

²Yog ib tug twg moog tuav tej kws tsi huv kws yog tej tsaj tuag, ces txij thaus ntawd lug nwg yog tuabneeg tsi huv, hab muaj txim ib yaam le nwg tau ua txhum.

³Yog ib tug twg moog tuav tej tuabneeg kws tsi huv ib qhov twg, txawm yog nwg tsi paub los thaus nwg paub lawm, nwg muaj txim.

⁴Yog ib tug twg laam coglug, tsi has zoo lossis phem, thaus nwg paub lawm, nwg muaj txim.

⁵Thaus ib tug twg tau ua txhum lawm, nwg yuavtsum leeg nwg lub txim ntawd,

⁶hab nwg yuavtsum raug teem txim vim nwg lub txim ntawd, nwg yuavtsum coj ib tug maum yaaj lossis maum tshis moog tua fij rua tug TSWV. Ces tug povthawj maam le muab coj moog ua khoom fij dlaws tug tuabneeg ntawd lub txim.

⁷Yog tug tuabneeg ntawd tsi muaj yaaj lossis tshis txawm peem, nwg yuavtsum nqaa ob tug nquab taug lossis ob tug nquab nyeg moog fij rua tug TSWV dlaws nwg lub txim, muab ib tug fij dlaws txim, hab muab ib tug hlawv ua khoom fij.

⁸Nwg yuav tau nqaa ob tug nquab ntawd moog rua tug povthawj, tug povthawj yuavtsum muab tug nquab kws dlaws txim fij ua ntej. Nwg muab tug nquab ntawd nyem cejdlaab kuas tuag, tabsis tsi xob ua kuas lub taubhau tu

⁹hab muab cov ntshaav nchus rua lub thaaj ib saab. Muab cov ntshaav kws seem coj moog tso rua ntawm lub taw thaaj. Qhov nuav yog fij khoom dlaws txim povtseg.

¹⁰Ces nwg maam le muab tug nquab kws ua khoom fij lug hlawv fij, lawv le txuj kevcai. Qhov nuav yog tug povthawj fij khoom theej txhoj dlaws tug tuabneeg ntawd lub txim, txhaj yuav zaam tau nwg lub txim.

¹¹Yog tug tuabneeg ntawd tsi muaj ob tug nquab taug lossis ob tug nquab nyeg le, nwg yuavtsum tau nqaa ob taig moov nplej moog fij dlaws nwg lub txim. Tabsis nwg tsi xob laub roj txiv ntoo lossis moov tshuaj tsw qaab xyaw cov moov nplej ntawd le, rua qhov yog coj moog fij dlaws txim.

¹²Nwg nqaa cov moov nplej ntawd moog rua tug povthawj, tug povthawj maam le muab teg yawm ib phoov teg fij ua kev ncu txug rua tug TSWV, hab coj moog tso rua sau lub thaaj ua khoom fij hlawv rua tug TSWV. Cov moov nplej nuav yog ua khoom fij dlaws txim povtseg.

¹³Qhov kws tug povthawj ua le nuav tub yog nwg muab tej khoom theej txhoj lug fij dlaws tug tuabneeg ntawd lub txim, txhaj yuav zaam tau nwg lub txim. Cov moov nplej kws seem ca ua tug povthawj tug, ib yaam le yog muab tej qoobloo coj tuaj fij rua tug TSWV ntaag.

¹⁴Tug TSWV has rua Mauxes has tas,

¹⁵yog leejtwg ua txhum rua tug TSWV tej khoom dlawbhuv, tabsis tsi yog nwg txhobtxwm ua, nwg yuavtsum coj ib tug laug yaaj lossis laug tshis kws tsi muaj ib qhov phem le moog fij rua tug TSWV dlaws nwg lub txim. Tug tsaj ntawd yuavtsum ntaus nqe kuas lawv le numtswv kevcai.

¹⁶Nwg yuavtsum them neeg nkaum feem pua ntxiv rua tej kws nwg tau ua txhum taag lug lawm rov rua tug TSWV. Nwg yuav tau muab cob rua tug povthawj, hab tug povthawj muab tug laug yaaj lossis tug laug tshis ntawd fij dlaws tug tuabneeg ntawd tej kev txhum, txhaj yuav zaam tau nwg lub txim.

¹⁷Yog ib tug twg ua txhum rua tug TSWV tej lug saamfwm ib nqai twg, nwg muaj txim hab yuav tau ris lub txim ntawd.

¹⁸Nwg yuavtsum coj ib tug laug yaaj lossis laug tshis kws tsi muaj ib qhov phem le moog rua tug povthawj fij dlaws nwg lub txim. Tug tsaj ntawd yuavtsum ntaus nqe kuas lawv le numtswv kevcai txhaj tau. Mas tug povthawj muab tug tsaj ntawd fij dlaws tug tuabneeg ntawd tej kev txhum, txhaj yuav zaam tau nwg lub txim.

¹⁹Qhov nuav yog fij khoom dlaws nwg lub txim kws nwg tau ua txhum rua tug TSWV.