Read Hmong Njua Levis Kevcai 6 Bible Online

Levis Kevcai 6 - Hmong Njua bible

Levis Kevcai 6

¹Tug TSWV has rua Mauxes has tas,

²“Yog ib tug twg ua txhum hab ua tsi ncaaj rua tug TSWV kws yog tsi kaam thim tej khoom kws ib tug kwvtij Yixalayees coj tuaj rua nwg khaws tseg lossis yuam nqe lossis nyag luas tug

³lossis nwg pum luas ib yaam khoom kws pluj lawm los nwg dlaag has tas nwg tsi pum, ces yog nwg ua txhum.

⁴Yog thaus ib tug twg ua txhum le has nuav, nwg yuavtsum muab tej kws nwg tau lug ntawm qhov kws ua tsi ncaaj ntawd xaa rov qaab. Nub kws paub has tas, nwg tau nyag lawm tag, nwg yuavtsum thim cov khoom ntawd kuas puv ntoob rov qaab rua tug tswv hab ntxiv neeg nkaum feem pua rua.

⁶Nwg yuavtsum coj ib tug laug yaaj lossis laug tshis kws tsi muaj ib qhov phem le moog rua tug povthawj muab fij rua tug TSWV dlaws nwg tej kev txhum. Tug tsaj ntawd yuavtsum ntaus nqe kuas lawv le numtswv kevcai.

⁷Tug povthawj yuavtsum muab tug tsaj ntawd fij dlaws tug tuabneeg ntawd txujkev txhum, txhaj yuav zaam tau nwg lub txim.”

⁸Tug TSWV has rua Mauxes

⁹kuas muab tej kevcai hlawv khoom fij le nraag nuav qha rua Aloos hab nwg cov tub. Yaam khoom kws muab hlawv fij ntawd ca nyob rua sau lub thaaj ib mos kaaj ntug plawg, hab lub cubtawg los yuavtsum ca cig ntsaa thuav tsi pub tuag le.

¹⁰Ces tug povthawj naav nwg lub tsho ntaub maag ntev hab lub rig ntaub maag tuab lu, moog muab cov tshauv sau lub thaaj yawm hab muab tso rua ntawm lub thaaj ib saab.

¹¹Ces nwg maam le hloov nwg cev rig tsho hab coj cov tshauv moog nchuav rua ntawm qhov chaw dlawbhuv kws nyob saab nrau ntug yeej.

¹²Cov tawg sau lub thaaj yuavtsum rauv kuas cig tsi xob pub tuag le. Txhua taagkig sawv ntxuv tug povthawj yuavtsum tuaj muab tawg rauv ntxiv rua, hab muab tej khoom fij hab tej roj coj moog hlawv rua sau fij ua kev sis raug zoo.

¹³Lub cubtawg sau lub thaaj mas yuavtsum ca cig tsi xob pub tuag le.

¹⁴“Ntawm nuav moog yog tej kevcai kws coj tej qoobloo moog fij. Aloos cov tub kws yog cov povthawj yuavtsum muab tej qoobloo moog fij taabmeeg rua tug TSWV ntawm lub thaaj fij hauv ntej.

¹⁵Tug povthawj muab ib phoov teg moov nplej hab roj, hab muab moov tshuaj tsw qaab nphoo rua sau cov moov nplej hab coj moog hlawv rua sau lub thaaj kuas tsw qaab ntxag rua tug TSWV txaus sab heev.

¹⁶Aloos hab nwg cov tub yuavtsum noj cov ncuav kws tsi xyaw keeb kws seem huv chaav dlawbhuv huv tug TSWV lub Tsevntaub sis ntsib.

¹⁷Tsi xob muab keeb xyaw cov ncuav ntawd, rua qhov yog puab feem tug, ntawm cov khoom dlawbhuv kws hlawv fij rua kuv, ib yaam le cov khoom fij dlaws txim hab dlaws kev txhum.

¹⁸Txhua tug txivneej kws yog Aloos cov xeebntxwv txhaj muaj cai noj tau tej zaub mov kws coj tuaj fij rua tug TSWV ntawd, ib tam dlhau rua ib tam moog le. Yog leejtwg moog chwv tej khoom fij ntawd, yuav ua rua tug ntawd dlawbhuv.”

¹⁹Tug TSWV has rua Mauxes has tas,

²⁰“Aloos hab nwg cov tub yuavtsum nqaa khoom moog fij rua tug TSWV, nub kws ua kevcai tsaa nwg ua povthawj: Nwg yuavtsum nqaa ob choj moov nplej moog ua khoom fij rua tug TSWV (kuas sis npaug zog le tej moov nplej kws puab naj nub coj moog fij rua tug TSWV), muab ib nraab fij rua thaus sawv ntxuv hab muab ib nraab fij rua thaus tsaus ntuj.

²¹Muab zuaj xyaw roj hab coj moog kib huv yag, thaus tawg paaj lawm maam coj moog ua khoom fij, kuas tej paa tsw qaab ntxag ua rua tug TSWV txaus sab.

²²Aloos cov xeebntxwv txhua tug kws ua tug Povthawj Hlub yuavtsum muab khoom fij rua tug TSWV le nuav ib tam dlhau rua ib tam moog ibtxhis. Tej khoom ntawd muab hlawv taagnrho fij rua tug TSWV.

²³Tej qoobloo kws tug povthawj muab fij ntawd, yuavtsum muab hlawv kuas taag; tsi xob noj hlo le.”

²⁴Tug TSWV has rua Mauxes

²⁵kuas muab tej kevcai fij khoom dlaws txim le nraag nuav qha rua Aloos hab nwg cov tub. Tug tsaj kws fij dlaws txim yuavtsum muab tua rua ntawm lub thaaj saab peg, ntawm qhov chaw kws tua tsaj hlawv ua khoom fij taabmeeg tug TSWV; rua qhov yog yaam khoom fij kws dlawbhuv.

²⁶Tug povthawj yuavtsum noj tug tsaj kws tua fij nuav huv Chaav Dlawbhuv, huv tug TSWV lub Tsevntaub sis ntsib.

²⁷Yog ib tug twg lossis ib yaam dlaabtsi kws moog chwv tug tsaj ntawd cov nqaj, yuav ua rua nwg dlawbhuv. Yog tug tsaj ntawd cov ntshaav txaws lu tej rig tsho, yuavtsum muab tej rig tsho ntawd ntxhua rua huv chaav dlawbhuv xwb.

²⁸Lub laujkaub aav kws muab hau cov nqaj ntawd, yuavtsum muab tsoo povtseg, hab yog muab laujkaub tooj hau los yuavtsum muab txhuam hab ntxuav kuas huv.

²⁹Txhua tug txivneej kws yog cov povthawj tsev tuabneeg yuavtsum noj cov nqaj kws muab ua khoom fij nuav. Cov nqaj ntawd dlawbhuv heev.

³⁰Tabsis tug tsaj theej txhoj kws muab cov ntshaav nqaa moog rua huv tug TSWV lub Tsevntaub sis ntsib fij ua kevcai dlaws txim, tsi xob noj yuavtsum muab hlawv xwb.