Read Hmong Njua Levis Kevcai 7 Bible Online

Levis Kevcai 7 - Hmong Njua bible

Levis Kevcai 7

¹Ntawm nuav yog tej kevcai fij khoom dlaws kev txhum kws yog cov khoom dlawbhuv heev.

²Muab tug tsaj kws fij dlaws txim ntawd tua rua ntawm lub thaaj saab peg kws yog qhov chaw tua tej tsaj hlawv ua khoom fij, hab muab cov ntshaav coj moog laub ywg thoob plawg lub thaaj.

³Muab cov roj luas kuas taag coj moog fij rua sau lub thaaj, cov roj ntawm tug kutwv, cov npluag roj kws npug lub plaab hab cov nyuv,

⁴ob lub raum hab cov roj kws npug ob lub raum, hab nplais sab kws zoo tshaaj plawg.

⁵Ces tug povthawj muab cov roj coj moog hlawv rua sau lub thaaj ua khoom fij rua tug TSWV. Qhov nuav yog tug tsaj kws tua fij dlaws kev txhum.

⁶Txhua tug txivneej kws yog cov povthawj tsev tuabneeg noj tau tug tsaj ntawd cov nqaj, tabsis yuavtsum coj moog noj huv ib chaav dlawbhuv, rua qhov tug tsaj ntawd yog yaam khoom dlawbhuv heev.

⁷Muaj ib txuj kevcai fij khoom dlaws kev txhum hab zaam txim, tug povthawj twg yog tug fij tej khoom theej txhoj, mas cov nqaj ntawd yog nwg tug.

⁸Tug tsaj kws coj tuaj rua tug povthawj tua hlawv ua khoom fij ntawd, dlaim tawv yuavtsum yog tug povthawj kws hlawv tug tsaj ua khoom fij ntawd tug.

⁹Tej qoobloo kws muab puab ua ncuav cub huv qhovtxus lossis cub huv laujkaub lossis kib huv yag kws coj moog ua khoom fij, tug povthawj twg fij tej ncuav ntawd rua Vaajtswv, cov ncuav ntawd puavleej yog nwg tug.

¹⁰Tabsis taagnrho cov moov nplej kws tsi tau muab cub coj moog ua khoom fij, txawm yog muab zuaj xyaw roj lossis tseem ua moov qhuav los yeej yog Aloos cov tub kws ua cov povthawj tug, hab muab faib kuas sis npaug zog rua puab.

¹¹“Ntawm nuav yog tej kevcai kws tuabneeg nqaa khoom tuaj fij rua tug TSWV ua kev sis raug zoo.

¹²Yog ib tug twg muab cov khoom fij nuav moog fij ua Vaajtswv tsaug, nwg yuavtsum muab tej ncuav tsi xyaw keeb le nraag nuav moog fij nrug tug tsaj ntawd: Cov ncuav tuab kws zuaj xyaw roj txiv ntoo, cov ncuav nyag kws muab roj txiv ntoo pleev rua sau hab cov ncuav moov nplej mog kws muab zuaj xyaw roj txiv ntoo.

¹³Dlua le ntawd, nwg yuavtsum muab tej ncuav kws zuaj xyaw keeb lawm lug ntxiv rua hab.

¹⁴Nwg yuavtsum muab cov ncuav ntawd ib yaam ib lub coj moog fij rua tug TSWV; cov ncuav ntawd yog tug povthawj kws coj cov ntshaav tsaj moog nchus rua lub thaaj tug.

¹⁵Tug tsaj cov nqaj yuavtsum tau noj kuas taag rua nub kws fij tug tsaj ntawd ntaag, tsi pub kuas tshuav ib qho nqaj seem moog txug taagkig kaaj ntug.

¹⁶Tabsis yog ib tug twg coj khoom tuaj fij ua kev sis raug zoo lawv le nwg tau coglug tseg lossis lawv le nwg txaus sab coj tuaj fij; ca le muab tug tsaj kws nwg coj tuaj tua fij ntawd cov nqaj hau noj nub ntawd, tabsis yog noj tsi taag, taagkig yuavtsum muab tej nqaj kws seem lug noj dlua.

¹⁷Tej nqaj kws seem, nub peb ca le muab coj moog hlawv povtseg.

¹⁸Yog leejtwg tseem noj tug tsaj ntawd tej nqaj txug nub peb, Vaajtswv yuav tsi txais yuav tug tuabneeg ntawd tej khoom fij. Tej khoom fij ntawd yuav tsi suav ua tug tuabneeg ntawd tug, tabsis yuav muab suav ua cov khoom fij kws tsi huv, hab yog leejtwg noj, nwg yuav tau ris lub txim ntawd.

¹⁹Yog tej nqaj ntawd chwv raug tej yaam kws tsi huv, yuavtsum tsi xob noj, ca le muab hlawv povtseg. “Txhua tug kws yog tuabneeg huv lawm txhaj noj tau cov nqaj ntawd xwb,

²⁰tabsis tug kws tsi huv, nwg noj tug tsaj kws fij ua kev sis raug zoo nrug tug TSWV ntawd, ca le muab tug ntawd rhu tawm ntawm Vaajtswv tsaav tuabneeg moog.

²¹Yog leejtwg noj tej nqaj ua khoom fij tom qaab kws nwg moog tuav tej yaam tsi huv, tsi has tuabneeg lossis tsaj, yuavtsum muab nwg rhu tawm ntawm Vaajtswv tsaav tuabneeg moog.”

²²Tug TSWV has rua Mauxes

²³kuas qha rua cov Yixalayees has tas, tsi pub ib tug twg noj tej roj nyuj, roj yaaj lossis roj tshis hlo le.

²⁴Tsi xob noj tej roj tsaj kws mob tuag lossis tsuv tum tuag le, tabsis ca siv ua lwm yaam los tau.

²⁵Yog leejtwg noj tug tsaj kws tua fij rua tug TSWV lawm tej roj, tug ntawd yuav raug rhu tawm tsi tau ua Vaajtswv tsaav tuabneeg lawm.

²⁶Txawm yog cov Yixalayees nyob qhov twg los xij, txwv tu nrho tsi pub muab ntshaav noog lossis ntshaav tsaj lug ua zaub noj.

²⁷Yog leejtwg txhobtxwm rhuav txuj cai nuav, nwg yuav tsi tau ua Vaajtswv tsaav tuabneeg ntxiv le lawm.

²⁸Tug TSWV has rua Mauxes

²⁹kuas qha rua cov Yixalayees has tas, yog leejtwg muab khoom moog fij ua kev sis raug zoo rua tug TSWV, nwg yuavtsum nqaa ib feem ntawm tug tsaj moog fij rua tug TSWV.

³⁰Nwg yuavtsum yog tug kws nqaa cov khoom ntawd moog, nwg yuavtsum nqaa tug tsaj ntawd cov roj nrug lub hauv nrob moog fij rua tug TSWV.

³¹Tug povthawj yuavtsum muab cov roj ntawd hlawv rua sau lub thaaj, tabsis muab lub hauv nrob rua Aloos hab Aloos cov tub.

³²Hab tug tsaj ntawd cegqaab saab xis yog muab

³³rua tug povthawj kws yog Aloos tug tub kws muab cov ntshaav hab tej roj fij ua kev sis raug zoo ntawd.

³⁴Tug TSWV kuas cov Yixalayees muab cov tsaj ntawd lub hauv nrob hab cegqaab saab xis rua tug povthawj Aloos hab nwg cov tub. Cov Yixalayees yuavtsum muab le nuav rua cov povthawj moog ibtxhis le.

³⁵Qhov nuav yog muab ib feem ntawm cov khoom kws fij rua tug TSWV, rua Aloos hab nwg cov tub, txij nub kws tsaa puab ua povthawj moog.

³⁶Txij nub ntawd lug tug TSWV txhaj saamfwm kuas cov Yixalayees yuavtsum muab ib feem ntawm cov khoom nuav rua cov povthawj. Txuj kevcai nuav cov Yixalayees yuavtsum coj moog ibtxhis le.

³⁷Cov nuav yog tej kevcai hlawv khoom fij, fij tej qoobloo, fij khoom dlaws txim, fij khoom zaam kev txhum, fij khoom ua kevcai tsaa povthawj hab fij khoom ua kev sis raug zoo,

³⁸yog cov lug kws tug TSWV saamfwm rua Mauxes sau Roob Xinais nub kws nwg kuas cov Yixalayees nqaa khoom tuaj fij rua tug TSWV nyob nraag taj suabpuam Xinais.