Read Hmong Njua Levis Kevcai 8 Bible Online

Levis Kevcai 8 - Hmong Njua bible

Levis Kevcai 8

¹Tug TSWV has rua Mauxes has tas,

²“Koj ca le coj Aloos hab nwg cov tub moog rua tom tug TSWV lub Tsevntaub sis ntsib lub qhovrooj, hab nqaa cov rig tsho kws cov povthawj naav, cov roj txhawb meejthawj, ib tug ntsuag nyuj fij dlaws txim, ob tug laug yaaj, hab ib tawb ncuav tsi xyaw keeb.

³Ces hu taagnrho cov Yixalayees tuaj sis sau rua tod.”

⁴Mauxes txawm ua lawv le tug TSWV tau has rua nwg, hab thaus cov Yixalayees tuaj sis sau txhij lawm,

⁵nwg has rua puab tas, “Tug TSWV has kuas kuv ca le ua num kuas tav taamsim nuav.”

⁶Ces Mauxes txhaj coj Aloos hab Aloos cov tub moog hab muab dlej ua kevcai ntxuav puab.

⁷Nwg muab lub tsho hab lub tsho ntev rua Aloos naav hab muab txuj hlaab rua Aloos sa. Nwg muab lub tsho efaus rua Aloos naav looj tuaj sau hab muab txuj hlaab ntaub maag zoo zoo lug rua nwg paav dluav.

⁸Mauxes muab dlaim ntaub npug hauvsab lug npug Aloos hauvsab, hab nwg muab lub Ulees hab lub Thumees ntsaws rua huv lub tsho efaus.

⁹Mauxes muab txuj phuam rua Aloos ntoo, hab nwg muab dlaim phaj kub dlawbhuv dlai rua ntawm txuj phuam ntawm Aloos hauvplaj lawv le tug TSWV tau has rua Mauxes lawm.

¹⁰Ces Mauxes txawm muab cov roj txhawb meejthawj nchus rua tug TSWV lub Tsevntaub sis ntsib, hab txhua yaam kws nyob huv lub Tsevntaub. Qhov kws ua le nuav tub yog nwg muab lub Tsevntaub hab txhua yaam fij rua tug TSWV.

¹¹Nwg tseem muab cov roj ntawd moog nchus xyaa zag rua lub thaaj hab tej cuabyeej sau lub thaaj, hab nchus rua lub phab tooj hab lub taw phab hab muab tej ntawd fij rua tug TSWV.

¹²Mauxes muab cov roj txhawb meejthawj laub rua sau Aloos taubhau tsaa nwg ua povthawj.

¹³Tom qaab ntawd, Mauxes maam le coj Aloos cov tub lug rua tom hauv ntej, nwg muab tsho rua puab naav, muab hlaab rua puab sa hab muab phuam rua puab ntoo lawv le tug TSWV tau has rua Mauxes lawm.

¹⁴Ces Mauxes txawm muab ib tug ntsuag nyuj tua fij dlaws txim, nwg kuas Aloos hab Aloos cov tub tsaa teg rua sau tug nyuj ntawd taubhau.

¹⁵Mauxes muab tug nyuj ntawd tua hab nwg muab ntivteg tub cov ntshaav nyuj coj moog pleev rua lub thaaj cov kub sau plaub ceg kaum thaaj kws yog ua kevcai ntxuav lub thaaj. Nwg muab cov ntshaav kws seem moog laub ywg thoob plawg lub taw thaaj. Qhov kws nwg ua le nuav tub yog nwg fij lub thaaj hab ua kevcai ntxuav lub thaaj.

¹⁶Mauxes muab cov npluag roj kws npug lub plaab hab cov nyuv, nplais sab kws zoo tshaaj plawg hab ob lub raum nrug cov roj kws npug ob lub raum coj moog hlawv rua sau lub thaaj.

¹⁷Tabsis nwg coj tug nyuj lub cev, dlaim tawv, cov nqaj hab cov nyuv moog hlawv rua saab nrau ntug yeej, lawv le tug TSWV tau has rua Mauxes lawm.

¹⁸Dlua le ntawd, Mauxes tseem muab ib tug laug yaaj tua hlawv ua khoom fij, ces Aloos hab Aloos cov tub tsaa teg rua sau tug yaaj ntawd taubhau.

¹⁹Ces Mauxes muab tug yaaj ntawd tua hab muab cov ntshaav nchus thoob plawg lub thaaj.

²⁰Hab thaus puab muab tug laug yaaj ntawd txav ua tej thooj lawm, Mauxes muab lub taubhau, cov nqaj hab cov roj coj moog hlawv.

²¹Hab thaus puab muab dlej ntxuav tej plaab nyuv, sab ntsws hab plaub ceg lawm, puab maam le muab rua Mauxes coj moog hlawv. Cov nuav yog muab hlawv ua khoom fij rua tug TSWV, hab cov khoom nuav yuav tsw qaab ntxag ua rua Tug TSWV txaus sab, lawv le tug TSWV tau has rua Mauxes lawm.

²²Ces Mauxes rov muab dlua ib tug laug yaaj tua ua kevcai tsaa cov povthawj, Aloos hab Aloos cov tub tsaa teg rua sau tug yaaj ntawd taubhau.

²³Mauxes muab tug yaaj ntawd tua hab muab cov ntshaav coj moog pleev Aloos lub taubntseg saab xis, tug taubteg saab xis hab tug taubtaws saab xis.

²⁴Ces Mauxes maam le moog coj Aloos cov tub lug hab muab ntshaav pleev puab cov taubntseg saab xis, cov taubteg saab xis hab cov taubtaws saab xis. Mauxes muab cov ntshaav kws seem coj moog nchus thoob plawg lub thaaj huv tuabsi.

²⁵Mauxes muab cov roj ntawm tug kutwv, cov npluag roj kws npug lub plaab hab cov nyuv, nplais sab kws zoo tshaaj plawg, ob lub raum nrug cov roj kws npug ob lub raum hab cegqaab saab xis.

²⁶Ces Mauxes muab ib lub ncuav tsi xyaw keeb kws tub muab fij rua tug TSWV lawm huv lub tawb kws rau cov ncuav tsi xyaw keeb, ib lub ncuav zuaj xyaw roj, hab ib lub ncuav nyag nyag, coj moog tso rua sau cov roj hab cegqaab saab xis.

²⁷Mauxes muab tej khoom ntawd rua Aloos hab Aloos cov tub, ces puab muab yom fij rua tug TSWV.

²⁸Ces Mauxes muab cov khoom ntawd rov lug hab coj moog hlawv rua sau lub thaaj, yog cov khoom fij ua kevcai tsaa povthawj. Cov nuav yog tej khoom hlawv fij, hab tsw qaab ntxag ua rua tug TSWV txaus sab.

²⁹Ces Mauxes muab lub hauv nrob coj moog yom fij rua tug TSWV. Tug yaaj kws muab tua ua kevcai tsaa povthawj ntawd, yog muab rua Mauxes. Mauxes ua txhua yaam lawv le tug TSWV tau has rua nwg lawm.

³⁰Mauxes muab cov roj txhawb meejthawj hab cov ntshaav yaaj sau lub thaaj lug nchus rua Aloos, Aloos cov tub hab rua puab tej rig tsho. Qhov kws Mauxes ua le ntawd tub yog nwg muab puab hab puab tej rig tsho fij rua tug TSWV.

³¹Mauxes has rua Aloos hab Aloos cov tub has tas, “Coj cov nqaj nuav moog hau rua ntawm tug TSWV lub Tsevntaub sis ntsib lub qhovrooj, hab noj ntxuag cov ncuav tsi xyaw keeb kws nyob huv lub tawb kws muab fij ua kevcai tsaa povthawj lawv le tug TSWV tau has rua kuv lawm has tas, Aloos hab nwg cov tub yuav noj tej ntawd.

³²Muab tej nqaj lossis tej ncuav kws seem hlawv povtseg huv tuabsi.

³³Mej tsi xob tawm ntawm tug TSWV lub Tsevntaub sis ntsib lub qhovrooj moog rua saab nrau kuas txwm xyaa nub moog txug nub kws mej ua kevcai tsaa povthawj tav taag tsaiv, rua qhov kevcai tsaa povthawj yuavtsum yog xyaa nub txhaj tav.

³⁴Tej kws peb ua nub nua tub yog tug TSWV has kuas ua dlaws mej tej kev txhum povtseg.

³⁵Mej Yuavtsum nyob tuabywv ntawm tug TSWV lub Tsevntaub sis ntsib lub qhovrooj xyaa nub xyaa mo hab ua lawv le tug TSWV tau has tseg lawm. Yog mej tsi ua le ntawd, mej yuav tuag. Ntawm nuav yog tej lug kws tug TSWV tau saamfwm rua kuv lawm.”

³⁶Yog le ntawd, Aloos hab Aloos cov tub txhaj ua txhua yaam lawv le tej lug kws tug TSWV tau has rua Mauxes lawm.