Read Hmong Njua Levis Kevcai 9 Bible Online

Levis Kevcai 9 - Hmong Njua bible

Levis Kevcai 9

¹Thaus txug nub yim, Mauxes txawm hu Aloos, Aloos cov tub hab cov Yixalayees tej thawjcoj tuaj cuag nwg;

²Mauxes has rua Aloos has tas, “Ca le coj ib tug ntsuag nyuj hab ib tug laug yaaj kws tsi muaj ib qhov phem le tuaj hab muab tua fij rua tug TSWV, tug ntsuag nyuj yog muab fij dlaws txim hab tug laug yaaj yog muab hlawv fij.

³Hab koj has rua cov Yixalayees has tas, ‘Mej yuavtsum coj ib tug laug tshis moog fij dlaws txim, ib tug ntsuag nyuj hab ib tug laug yaaj noobnyoog ib xyoos kws tsi muaj ib qhov phem le moog tua hlawv fij,

⁴muab tug ntsuag nyuj hab tug laug yaaj tua fij ua kev sis raug zoo. Mej muab cov tsaj nuav fij rua tug TSWV nrug tej ncuav kws zuaj xyaw roj lawm. Mej yuavtsum ua le nuav, rua qhov nub nua tug TSWV yuav lug tshwm rua mej pum.’ ”

⁵Puab coj txhua yaam tuaj tso rua ntawm tug TSWV lub Tsevntaub sis ntsib lawv le Mauxes tau has rua puab, hab taagnrho cov pejxeem tuaj sis sau pehawm tug TSWV rua ntawm qhov chaw ntawd.

⁶Mauxes has tas, “Tug TSWV saamfwm kuas mej ca le ua txhua yaam nuav, yog mej ua le ntawd, nwg lub fwjchim kws ci ntsaa ab txhaj tshwm lug rua mej pum.”

⁷Ces Mauxes has rua Aloos has tas, “Ca le moog rua tom lub thaaj muab khoom fij dlaws txim hab hlawv khoom fij dlaws koj hab cov pejxeem lub txim. Muab tej khoom nuav moog fij dlaws cov pejxeem lub txim lawv le tug TSWV tau has rua kuv lawm.”

⁸Aloos txhaj moog rua tom lub thaaj hab muab tug ntsuag nyuj tua fij dlaws nwg lub txim.

⁹Nwg cov tub nqaa cov ntshaav lug rua nwg, nwg muab nwg tug ntivteg tub cov ntshaav nyuj hab coj moog pleev rua lub thaaj plaub tug kub sau plaub ceg kaum thaaj, hab cov kws seem muab laub ywg thoob plawg lub taw thaaj.

¹⁰Ces nwg muab cov roj, ob lub raum hab nplais sab kws zoo tshaaj plawg coj moog hlawv rua sau lub thaaj lawv le tug TSWV tau has rua Mauxes lawm.

¹¹Tabsis nwg coj cov nqaj hab dlaim tawv moog hlawv rua saab nrau ntug yeej.

¹²Nwg tua tsaj hlawv fij dlaws nwg lub txim. Nwg cov tub nqaa cov ntshaav tsaj lug rua nwg, hab nwg muab laub ywg thoob plawg lub thaaj.

¹³Puab nqaa tug tsaj ntawd lub taubhau hab cov nqaj lug rua nwg, nwg muab coj moog hlawv rua sau lub thaaj.

¹⁴Ces nwg muab lub plaab hab cov nyuv, sab ntsws, hab ob cegqaab ntxuav hab coj moog hlawv rua sau lub thaaj, nrug cov khoom fij kws muab hlawv ntawd.

¹⁵Tom qaab ntawd, nwg maam le muab cov pejxeem tej khoom lug fij. Nwg muab ib tug tshis fij dlaws cov pejxeem lub txim, nwg muab tua hab muab tug tshis ntawd fij, nwg ua ib yaam le nwg tub fij dlaws nwg lub txim ua ntej lawm.

¹⁶Nwg tseem muab tsaj tua hlawv ua khoom fij hab muab tug tsaj ntawd fij lawv le kevcai.

¹⁷Nwg muab tej qoobloo coj moog fij hab yawm ib phoov teg moov nplej coj moog hlawv rua sau lub thaaj. (Cov nuav yog fij ntxiv rua cov khoom kws naj nub coj moog hlawv fij.)

¹⁸Nwg muab tug txiv nyuj hab tug laug yaaj fij ua kev sis raug zoo rua cov pejxeem. Nwg cov tub nqaa cov ntshaav tsaj lug rua nwg, hab nwg muab coj moog nchus thoob plawg lub thaaj.

¹⁹Aloos muab cov roj nyuj hab cov roj yaaj moog

²⁰tso rua sau ob lub hauv nrob hab muab nqaa coj moog tso taagnrho rua sau lub thaaj. Nwg muab cov roj hlawv rua sau lub thaaj

²¹hab muab ob lub hauv nrob hab cegqaab saab xis coj moog yom fij rua tug TSWV, ua cov povthawj tug lawv le Mauxes tau has tseg lawm.

²²Thaus Aloos fij khoom dlaws txim, hlawv khoom fij hab fij khoom ua kev sis raug zoo taag lawm, nwg txawm tsaa nwg ob txhais teg rua sau cov pejxeem, nwg foom koob moov rua puab hab nqeg sau lug.

²³Mauxes hab Aloos obtug moog rua tom tug TSWV lub Tsevntaub sis ntsib, hab thaus obtug tawm lug, obtug foom koob moov rua cov pejxeem hab tug TSWV tug tshwjchim txawm ci ntsaa ab lug rua cov pejxeem suavdlawg pum.

²⁴Taamsim ntawd, tug TSWV txawm tso suavtawg lug kub cov khoom fij hab tej roj sau lub thaaj huv tuabsi lawm. Thaus cov pejxeem pum tug tshwjchim ntawd, puab qw hab txhus caug ndlua pehawm ua ntsejmuag ti nkaus rua huv aav.