Read Hmong Njua Yelemis 10 Bible Online

Yelemis 10 - Hmong Njua bible

Yelemis 10

¹Cov Yixalayees, mej ca le noog tej lug kws tug TSWV has rua mej.

²Nwg has tas, “Mej tsi xob ua kev phem kev qas ib yaam le lwm tsaav tuabneeg ua; tsi xob ca tej xwm kws tshwmsim sau nruab ntug ua rua mej xaav tsi thoob, txawm yog lwm tsaav tuabneeg ntshai tej ntawd los xij.

³Cov tuabneeg ntawd tej kev ntseeg tsi muaj qaabhau dlaabtsi; puab moog txav ntoo huv haav zoov lug rua cov kws txua ntoo muab cuabyeej txua

⁴hab muab nyaj muab kub lug vuam rua. puab muab ntsa hlau ntsa kuas tsi xob qaug.

⁵Tej mlom ntawd zoo ib yaam le tej mojzeeg kws luas dlai rua tom tej teb dlib; tej mlom ntawd tsi txawj has lug; luas yuavtsum nqaa tej mlom ntawd, rua qhov tej mlom ntawd tsi txawj moog kev. Mej tsi xob ntshai tej mlom ntawd, rua qhov mlom ua tsi tau phem rua mej hab paab tsi tau mej.”

⁶Tug TSWV, tsi muaj leejtwg yuav zoo npaum le koj; koj yog tug muaj zug luj zug nchaav, koj lub koob lub npe nrov nchaa moo lug hab muaj fwjchim heev.

⁷Tug Vaajntxwv kws kaav txhua tsaav tuabneeg, leejtwg txhaj tsi kaam fwm koj? Koj yog tug kws tsimnyog peb fwm; txhua tsaav tuabneeg tej tuabneeg txawj ntse lossis puab tej vaajntxwv tsi muaj ib tug zoo npaum le koj.

⁸Puab cov ntawd puavleej ruag hab tsi thoob tsib. Tej mlom ntawd yog ntoo xwb, qha tsi tau dlaabtsi rua mej.

⁹Puab muab tej nyaj kws coj tim Xapees tuaj, hab cov kub kws coj huv tebchaws Ufas lug vuam tej mlom ntawd. Tej mlom ntawd puavleej yog cov tuabneeg kws txawj nchuav nyaj nchuav kub hab txawj txua ntoo txua xwb; puab muab tej rig tsho ntaub xav hab ntaub tsaamxem rua tej mlom ntawd naav, tej ntaub ntawd yog cov tuabneeg kws txawj ntus ntaub ntus xwb.

¹⁰Tabsis tug TSWV, koj yog tug Vaajtswv tseeb; koj yog Vaajtswv tug kws muaj sa nyob hab yog tug vaajntxwv kws nyob moog ibtxhis. Thaus koj chim lub nplajteb ua zug koog; txhua tsaav tuabneeg tiv tsi taug koj txujkev chim.

¹¹(Mej yuavtsum qha rua puab has tas tej mlom ntawd tsi yog cov kws tsim lub nplajteb hab lub ntuj; tej mlom ntawd yuav puamtsuaj taag; hab yuav tsi muaj nyob huv lub nplajteb nuav lawm.)

¹²Tug TSWV tsim lub nplajteb lug ntawm nwg lub fwjchim; nwg tsim lub qaab ntuj lug ntawm nwg lub tswvyim, hab nthuav lub ntuj lug ntawm nwg txujkev txawj ntse.

¹³Thaus tug TSWV has rua tej dlej sau nruab ntug, ces tej dlej ntawd txawm nrov nroo ntwg; nwg ua kuas muaj fuab tsaus nti tim qaab ntug lug. Nwg ua kuas muaj tsaglig xub rua thaus naag lug, hab tso cua huv nwg lub txhaab tuaj ntsawj.

¹⁴Tuabneeg txhua tug puavleej ruag hab tsi muaj kev txawj ntse; cov tuabneeg nchuav mlom yuav raug txaajmuag, rua qhov tej mlom kws puab nchuav tsi caj sa hab cuav xwb.

¹⁵Tej mlom ntawd tsi muaj nqes hab tsimnyog raug thuam; thaus tug TSWV txav txim rua puab, puab yuav puamtsuaj taag.

¹⁶Yakhauj tug Vaajtswv tsi zoo le tej mlom ntawd; nwg yog tug kws tsim ib puas tsaav yaam, hab nwg yog tug xaiv cov Yixalayees ua nwg tsaav tuabneeg. Nwg lub npe hu ua tug TSWV kws muaj Fwjchim Luj kawg nkaus.

¹⁷Cov tuabneeg kws nyob huv lub nroog Yeluxalees, luas tuaj vij mej lawm! Mej ca le sawbsim mej tej khoom.

¹⁸Tug TSWV yuav ntab mej tawm huv lub tebchaws nuav moog; nwg yuav tso kev txomnyem lug rua mej moog txug nub kws mej puamtsuaj taag tsi tshuav ib tug seem le. Tug TSWV has le ntawd.

¹⁹Cov tuabneeg kws nyob huv lub nroog Yeluxalees txhaj has tas, “Peb raug mob saab kawg le! Peb tej qhov txhaab yuav khu tsi zoo le. Peb xaav has tas, peb yuav tiv taug tej nuav!

²⁰Peb tej tsevntaub puamtsuaj taag; tej hlua kws nqug los po hab tu taag. Peb tej mivnyuas pluj taag tsi tshuav ib tug nrug peb nyob paab peb tsaa tsevntaub; hab tsi tshuav ib tug paab peb dlai tej ntaub thaiv qhovrais lawm!”

²¹Kuv teb has tas, “Peb cov thawjcoj ruag kawg le; puab tsi thov tug TSWV ua tug coj kev. Tub yog vim le nuav puab txhaj ua tsi tau ib yaam dlaabtsi le, hab peb cov tuabneeg txhaj tsiv moog nyob ua saab ua sua taag lawm.

²²Mej ca le noog! Muaj ib tsaab xuv tuaj! Yog lub suab ua tsuv ua rog nrov dloog dlaj saab qaumteb tuaj; puab yuav tuaj ua kuas cov Yudas tej nroog ua suabpuam taag ua chaw rua tej maa nyob.”

²³Tug TSWV, kuv paub has tas tsi muaj leejtwg kws nwg rov ua tug tswv kaav nwg; hab tsi muaj leejtwg kws nwg rov tswj nwg lub neej.

²⁴Tug TSWV, thov koj ntuag koj tsaav tuabneeg, tabsis thaus koj chim, thov koj tsi xob ua nruj ua tsiv lossis rau txim nyaav rua peb, nyob tsaam peb tuag lawm.

²⁵Thov tshem koj txujkev chim moog rua txhua tsaav tuabneeg kws tsi pehawm koj hab cov tuabneeg kws tso koj tseg lawm. Puab tua koj tsaav tuabneeg, puab ua rua peb puamtsuaj, hab ua rua peb lub tebchaws puamtsuaj taag dlu lug lawm.